ગીતશાસ્ત્ર 14 FHB Father's Heart Bible™

14 ¹મૂર્ખ પોતાના મનમાં કહે છે, “ઈશ્વર નથી.” તેઓ ભ્રષ્ટ છે, તેમનાં કાર્યો અધમ છે; સારું કરનાર કોઈ નથી.

²આપણા પિતા આકાશમાંથી માનવસંતાનો પર દૃષ્ટિ કરે છે, કે સમજનાર, તેમને શોધનાર કોઈ છે કે નહિ. ³તેઓ બધા ભટકી ગયા છે; સૌ મળીને ભ્રષ્ટ થઈ ગયા છે; સારું કરનાર કોઈ નથી, એક પણ નહિ.

⁴શું આ બધા દુષ્કર્મીઓ કશું જાણતા નથી, જેઓ રોટલી ખાતા હોય તેમ મારા લોકોને ખાઈ જાય છે, અને આપણા પિતાને કદી પોકારતા નથી? ⁵ત્યાં તેઓ ભયથી ગભરાઈ ગયા, કારણ કે આપણા પિતા નેકીવાનોની પેઢીની સાથે છે. ⁶ઓ દુષ્કર્મીઓ, તમે ગરીબની યોજનાઓ નિષ્ફળ કરવા ઇચ્છો છો, પણ આપણા પિતા તેનો આશ્રય છે.

⁷અરે, ઇઝરાયલનો ઉદ્ધાર સિયોનમાંથી આવે તો કેવું સારું! જ્યારે આપણા પિતા પોતાના લોકોની આબાદી પાછી લાવશે, ત્યારે યાકૂબ આનંદ કરે, ઇઝરાયલ હરખાય.