Pinadayag 18

18 ¹Human niini nakita nako ang laing anghel nga nanaog gikan sa langit, nga adunay dakong awtoridad; ang yuta nalamdagan sa iyang himaya. ²Misinggit siya sa makusog, “Napukan, napukan ang bantogang Babilonia! Nahimo siyang puloy-anan sa mga yawa, tagoanan sa tanang mahugaw nga espiritu, tagoanan sa tanang mahugaw nga langgam, tagoanan sa tanang mahugaw ug dulumtanan nga mananap. ³Kay ang tanang kanasoran nakainom sa bino sa kaibog sa iyang pakighilawas; ang mga hari sa yuta nakighilawas kaniya, ug ang mga magpapatigayon sa yuta nangadato gumikan sa gahom sa iyang kaharuhay.”

⁴Unya nadungog nako ang laing tingog gikan sa langit, “Gula kamo gikan kaniya, akong katawhan, aron dili kamo makaambit sa iyang mga sala ni makadawat sa iyang mga hampak;

⁵kay ang iyang mga sala nagtapun-og sama kataas sa langit, ug nahinumdoman sa atong Amahan ang iyang mga kalapasan. ⁶Baslan siya sumala sa iyang gibayad, ug basli siya sa doble alang sa iyang nabuhat; sa kopa nga iyang gisagol, pagsagol ug doble nga bahin alang kaniya. ⁷Maingon nga iyang gihimaya ang iyang kaugalingon ug nagpuyo sa kaharuhay, hatagi siya sa samang sukod sa kasakit ug kasubo; kay sa iyang kasingkasing nag-ingon siya, ‘Naglingkod ako sa trono ingon nga rayna; dili ako balo, ug dili gayod ako makakita ug kasubo.’ ⁸Tungod niini moabot ang iyang mga hampak sa usa ka adlaw—kamatayon ug kasubo ug kagutom—ug siya pagasunogon sa kalayo; kay gamhanan ang atong Amahan, nga naghukom kaniya.”

⁹Ang mga hari sa yuta nga nakighilawas ug nag-ambit sa kaharuhay uban kaniya mohilak ug magbangotan tungod kaniya, sa makita nila ang aso sa iyang pagkasunog. ¹⁰Nga nagtindog sa layo, nga nahadlok sa iyang kasakit, moingon sila, “Alaot, alaot, bantogang siyudad, Babilonia, gamhanang siyudad! Sa usa ka takna miabot ang imong paghukom.” ¹¹Ang mga magpapatigayon sa yuta mohilak ug magbangotan tungod kaniya, kay wala nay mopalit sa ilang mga baligya. ¹²Mga baligya nga bulawan, plata, mahalong bato, mga perlas, pinong lino, purpura, seda, eskarlata; tanang humot nga kahoy, matag butang nga hinimo sa garing, mahalong kahoy, bronse, puthaw, marmol. ¹³Kanela, panakot, insenso, mira, kamangyan, bino, lana sa olibo, pinong harina, trigo, mga baka, mga karnero, mga kabayo, mga karwahe, ug mga lawas ug mga kalag sa tawo.

¹⁴“Ang hinog nga bunga nga gipangandoy sa imong kalag mibiya na kanimo; nawala ang tanan mong bahandi ug kahalangdon, dili na gayod hikaplagan.” ¹⁵Ang mga magpapatigayon niining mga butanga nga nangadato gumikan kaniya motindog sa layo, nga mahadlok sa iyang kasakit, nga manghilak ug magbangotan, ¹⁶ug manunggo, “Kasubo, kasubo sa bantogang siyudad, nga nagsul-ob ug pinong lino, purpura, ug eskarlata, nga gidayandayanan ug bulawan, mga alahas, ug mga perlas! Sa usa ka takna nalaglag ang maong bahandi.” ¹⁷Ug ang matag kapitan sa barko, ang tanang naglawig sa kadagatan, ang mga marinero, ug ang tanang nagakabuhi gikan sa dagat nagtindog sa layo, ¹⁸ug misinggit sa pagkakita sa aso sa iyang pagkasunog, “Unsang siyudara ang sama sukad sa bantogang siyudad?” ¹⁹Gisaboran nila ug abog ang ilang mga ulo ug misinggit, nga nanghilak ug nagbangotan, “Alaot, alaot ang bantogang siyudad, diin ang tanang may mga barko sa dagat nangadato gumikan sa iyang bahandi! Sa usa ka takna nalaglag siya.” ²⁰Paglipay tungod kaniya, langit, ug kamong mga balaan ug mga apostoles ug mga propeta! Kay gihukman sa atong Amahan ang inyong kaso batok kaniya.

²¹Usa ka gamhanang anghel milabay ug bato nga sama sa dakong galingan ngadto sa dagat, nga nag-ingon, “Sa ingon niini igalabay nga mapintas ang Babilonia, ang bantogang siyudad, ug dili na gayod hikaplagan. ²²Ang tingog sa mga mangangalpa ug mga musikero, sa mga tigpatingog ug plawta ug mga tigpatingog ug trumpeta, dili na gayod madungog diha kanimo pag-usab. Walay bisan unsang batid nga magbubuhat ang hikaplagan diha kanimo pag-usab. Ang tingog sa galingan dili na gayod madungog diha kanimo pag-usab. ²³Ang kahayag sa suga dili na gayod mosidlak diha kanimo pag-usab. Ang tingog sa pamanhonon ug pangasaw-onon dili na gayod madungog diha kanimo pag-usab. Kay ang imong mga magpapatigayon mao ang mga dagko sa yuta, ug ang tanang kanasoran gilimbongan pinaagi sa imong salamangka. ²⁴Diha kaniya hikaplagan ang dugo sa mga propeta ug mga balaan, ug sa tanang gipamatay sa yuta.”