வெளிப்படுத்துதல் 18

18 ¹இதற்குப் பின்பு, மற்றொரு தூதன் மிகுந்த அதிகாரத்தை உடையவராய் வானத்திலிருந்து இறங்கி வருவதைக் கண்டேன்; அவருடைய மகிமையால் பூமி ஒளிர்ந்தது. ²அவர் உரத்த சத்தமிட்டு: “விழுந்தது, விழுந்தது—மகா பாபிலோன்! அவள் பேய்களுக்கு உறைவிடமாகவும், அசுத்த ஆவிகள் அனைத்திற்கும் தங்குமிடமாகவும், அசுத்தமான பறவைகள் அனைத்திற்கும் தங்குமிடமாகவும், அசுத்தமும் அருவருப்புமான மிருகங்கள் அனைத்திற்கும் தங்குமிடமாகவும் ஆனாள். ³ஏனெனில் அவளுடைய வேசித்தனத்தின் மோகமாகிய மதுவை எல்லா ஜாதிகளும் குடித்தார்கள்; பூமியின் ராஜாக்கள் அவளோடு வேசித்தனம் செய்தார்கள், பூமியின் வர்த்தகர்கள் அவளுடைய செல்வச்செருக்கின் வல்லமையால் ஐசுவரியவான்களானார்கள்.”

⁴பின்பு, வானத்திலிருந்து மற்றொரு சத்தம் கேட்டேன்: “என் ஜனங்களே, அவளுடைய பாவங்களில் பங்குகொள்ளாமலும், அவளுடைய வாதைகளைப் பெறாமலும் இருக்கும்படி, அவளை விட்டு வெளியே வாருங்கள்;

⁵ஏனெனில் அவளுடைய பாவங்கள் வானபரியந்தம் குவிந்திருக்கின்றன, எங்கள் பிதா அவளுடைய அக்கிரமங்களை நினைவுகூர்ந்தார். ⁶அவள் செலுத்தினபடியே அவளுக்குச் செலுத்துங்கள், அவள் செய்த செய்கைகளுக்குத்தக்கதாக இரட்டிப்பாக அவளுக்குப் பதிலளியுங்கள்; அவள் கலந்த பாத்திரத்தில் அவளுக்கு இரட்டிப்பாகக் கலந்துகொடுங்கள். ⁷அவள் தன்னை மகிமைப்படுத்திச் செல்வச்செருக்கில் வாழ்ந்ததற்குச் சமமாக, வேதனையையும் துக்கத்தையும் அவளுக்குக் கொடுங்கள்; ஏனெனில் அவள் தன் இருதயத்தில், ‘நான் ராணியாய் சிங்காசனத்தில் அமர்ந்திருக்கிறேன்; நான் விதவை அல்ல, நான் ஒருபோதும் துக்கத்தைக் காணமாட்டேன்’ என்று சொல்லுகிறாள். ⁸இதன் காரணமாக, அவளுடைய வாதைகள் ஒரே நாளில் வரும்—மரணமும், துக்கமும், பஞ்சமும்—அவள் அக்கினியால் சுட்டெரிக்கப்படுவாள்; ஏனெனில் அவளை நியாயந்தீர்த்த எங்கள் பிதா வல்லமையுள்ளவர்.”

⁹அவளோடு வேசித்தனம் செய்து செல்வச்செருக்கில் பங்குகொண்ட பூமியின் ராஜாக்கள், அவள் எரிகிற புகையைப் பார்த்து, அவளுக்காக அழுது புலம்புவார்கள். ¹⁰அவளுடைய வேதனைக்குப் பயந்து, தூரத்திலே நின்று அவர்கள் சொல்வார்கள்: “ஐயோ, ஐயோ, மகா நகரமே, பாபிலோனே, வல்லமையான நகரமே! ஒரே மணி நேரத்தில் உன் நியாயத்தீர்ப்பு வந்துவிட்டதே.” ¹¹பூமியின் வர்த்தகர்கள் அவளுக்காக அழுது துக்கிக்கிறார்கள், ஏனெனில் அவர்களுடைய சரக்குகளை இனி ஒருவரும் வாங்குகிறதில்லை; ¹²பொன், வெள்ளி, இரத்தினங்கள், முத்துக்கள், மெல்லிய பட்டு, இரத்தாம்பரம், பட்டாடை, சிவப்பாடை என்னும் சரக்குகள்; எல்லாவித நறுமண மரங்கள், தந்தத்தினால் செய்யப்பட்ட ஒவ்வொரு பொருள், விலையுயர்ந்த மரம், வெண்கலம், இரும்பு, சலவைக்கல். ¹³இலவங்கப்பட்டை, வாசனைத்திரவியம், தூபவர்க்கம், வெள்ளைப்போளம், சாம்பிராணி, மது, ஒலிவஎண்ணெய், மெல்லிய மாவு, கோதுமை, மாடு, ஆடு, குதிரைகள், இரதங்கள், மனிதருடைய சரீரங்களும் ஆத்துமாக்களும்.

¹⁴“உன் ஆத்துமா வாஞ்சித்த கனிந்த பழம் உன்னைவிட்டுப் போய்விட்டது; உன் ஐசுவரியங்களும் மினுக்கமும் அனைத்தும் இழந்துபோயின, இனி ஒருபோதும் காணப்படுவதில்லை.” ¹⁵அவளால் ஐசுவரியவான்களான இப்பொருள்களின் வர்த்தகர்கள், அவளுடைய வேதனைக்குப் பயந்து, அழுது துக்கித்து, தூரத்திலே நிற்பார்கள், ¹⁶அவர்கள் கூப்பிட்டு: “ஐயோ, ஐயோ, மெல்லிய பட்டும் இரத்தாம்பரமும் சிவப்பாடையும் தரித்து, பொன்னாலும் இரத்தினங்களாலும் முத்துக்களாலும் அலங்கரிக்கப்பட்டிருந்த மகா நகரமே! ஒரே மணி நேரத்தில் இத்தனை ஐசுவரியம் பாழாய்ப்போயிற்றே.” ¹⁷ஒவ்வொரு கப்பலின் தலைவனும், கடல்களில் பயணிக்கிற ஒவ்வொருவனும், மாலுமிகளும், கடலினால் பிழைப்பு நடத்துகிற அனைவரும் தூரத்திலே நின்று, ¹⁸அவள் எரிகிற புகையைப் பார்த்து: “மகா நகரத்திற்கு ஒப்பான நகரம் எது?” என்று கூக்குரலிட்டார்கள். ¹⁹அவர்கள் தங்கள் தலைகளின்மேல் புழுதியைப் போட்டுக்கொண்டு, அழுது துக்கித்து: “ஐயோ, ஐயோ, மகா நகரமே, கடலில் கப்பல்களை உடைய அனைவரும் உன் செல்வத்தால் ஐசுவரியவான்களானார்களே! ஒரே மணி நேரத்தில் அவள் பாழாய்ப்போனாளே” என்று கூக்குரலிட்டார்கள். ²⁰வானமே, பரிசுத்தவான்களே, அப்போஸ்தலர்களே, தீர்க்கதரிசிகளே, அவளுக்காக மகிழ்ந்து களிகூருங்கள்! ஏனெனில் அவளுக்கு எதிரான உங்கள் வழக்கை எங்கள் பிதா நியாயந்தீர்த்தார்.

²¹வல்லமையுள்ள ஒரு தூதன் பெரிய ஏந்திரக்கல்லைப்போன்ற ஒரு கல்லை எடுத்துக் கடலில் எறிந்து: “இப்படியே பாபிலோன் என்னும் மகா நகரம் பலமாகத் தள்ளியெறியப்படும், இனி ஒருபோதும் காணப்படுவதில்லை. ²²சுரமண்டல வாத்தியக்காரரின் சத்தமும், இசைக்கலைஞரின் சத்தமும், நாதசுரக்காரரின் சத்தமும், எக்காளக்காரரின் சத்தமும் இனி ஒருபோதும் உன்னிடத்தில் கேட்கப்படுவதில்லை. எந்தத் தொழிலின் தொழிலாளியும் இனி ஒருபோதும் உன்னிடத்தில் காணப்படுவதில்லை. ஏந்திரத்தின் சத்தமும் இனி ஒருபோதும் உன்னிடத்தில் கேட்கப்படுவதில்லை. ²³விளக்கின் ஒளி இனி ஒருபோதும் உன்னில் பிரகாசிப்பதில்லை. மணவாளன், மணவாட்டியின் சத்தமும் இனி ஒருபோதும் உன்னிடத்தில் கேட்கப்படுவதில்லை. ஏனெனில் உன் வர்த்தகர்கள் பூமியின் பெரியோர்களாயிருந்தார்கள், உன் சூனியத்தால் எல்லா ஜாதிகளும் மோசம்போக்கப்பட்டார்கள். ²⁴தீர்க்கதரிசிகளுடையவும் பரிசுத்தவான்களுடையவும், பூமியில் கொலைசெய்யப்பட்ட அனைவருடையவும் இரத்தம் அவளிடத்தில் காணப்பட்டது.”