ራእይ 18

18 ¹ከዚህም በኋላ ታላቅ ሥልጣንን የያዘ ሌላ መልአክ ከሰማይ ሲወርድ አየሁ፤ ምድርም በክብሩ በራች። ²በታላቅ ድምፅም ጮኾ እንዲህ አለ፤ “ታላቂቱ ባቢሎን ወደቀች፣ ወደቀች! የአጋንንት ማደሪያ፣ የርኩስ መንፈስ ሁሉ መኖሪያ፣ የርኩስ ወፍ ሁሉ መኖሪያ፣ የረከሰና የተጠላ አውሬ ሁሉ መኖሪያ ሆነች። ³አሕዛብ ሁሉ ከዝሙቷ ፍትወት ወይን ጠጥተዋልና፤ የምድር ነገሥታት ከእርሷ ጋራ ዝሙት ፈጸሙ፤ የምድርም ነጋዴዎች ከቅንጦቷ ኀይል የተነሣ ባለጠጎች ሆኑ።”

⁴ከዚያም ሌላ ድምፅ ከሰማይ ሲናገር ሰማሁ፤ “ሕዝቤ ሆይ፣ በኀጢአቷ እንዳትተባበሩ ከመቅሠፍቷም እንዳትቀበሉ ከእርሷ ውጡ፤

⁵ኀጢአቷ እስከ ሰማይ ተከምሯልና አባታችንም በደሏን አስቦአታል። ⁶እርሷ እንደ ሰጠችው መልሱላት፣ እንዳደረገችውም እጥፍ ክፈሏት፤ በቀላቀለችው ጽዋ ውስጥ እጥፍ ድርሻ ቀላቅሉላት። ⁷ራስዋን እንዳከበረችና በቅንጦት እንደኖረች መጠን፣ ያን ያህል ሥቃይና ኀዘን ስጧት፤ በልቧ እንዲህ ትላለችና፤ ‘ንግሥት ሆኜ በዙፋን ተቀምጫለሁ፤ መበለት አይደለሁም፤ ኀዘንንም ከቶ አላይም።’ ⁸ስለዚህ መቅሠፍቷ በአንዲት ቀን ይመጣባታል — ሞትና ኀዘን ራብም — በእሳትም ትቃጠላለች፤ የፈረደባት አባታችን ኀያል ነውና።”

⁹ከእርሷ ጋራ ዝሙት የፈጸሙና በቅንጦት የኖሩ የምድር ነገሥታት የመቃጠሏን ጢስ ሲያዩ ስለ እርሷ አልቅሰው ዋይ ዋይ ይላሉ። ¹⁰ሥቃይዋን ፈርተው ከሩቅ ቆመው እንዲህ ይላሉ፤ “ወዮ፣ ወዮ፣ አንቺ ታላቂቱ ከተማ፣ ባቢሎን፣ ብርቱ ከተማ! ፍርድሽ በአንዲት ሰዓት መጣ።” ¹¹ከእንግዲህ ወዲህ ሸቀጣቸውን የሚገዛ ስለሌለ የምድር ነጋዴዎች ስለ እርሷ ያለቅሳሉ ያዝናሉም። ¹²የወርቅ፣ የብር፣ የከበረ ድንጋይ፣ የዕንቍ፣ የጥሩ በፍታ፣ የሐምራዊ ጨርቅ፣ የሐር፣ የቀይ ጨርቅ ሸቀጥ፤ ሽቱ እንጨት ሁሉ፣ የዝሆን ጥርስ ዕቃ ሁሉ፣ ውድ እንጨት፣ ናስ፣ ብረት፣ የዕብነ በረድ ዕቃ። ¹³ቀረፋ፣ ቅመም፣ ሽቱ፣ ከርቤ፣ ዕጣን፣ ወይን፣ የወይራ ዘይት፣ የተፈተገ ዱቄት፣ ስንዴ፣ ከብት፣ በግ፣ ፈረስ፣ ሠረገላ፣ የሰውም አካልና ነፍስ።

¹⁴“ነፍስሽ የተመኘችው የበሰለ ፍሬ ከአንቺ ተለይቷል፤ ሀብትሽና ግርማሽ ሁሉ ጠፍቷል፣ ከቶም ዳግመኛ አይገኝም።” ¹⁵ከእርሷ ባለጠጎች የሆኑ የእነዚህ ነገሮች ነጋዴዎች ሥቃይዋን ፈርተው እያለቀሱና እያዘኑ ከሩቅ ይቆማሉ፣ ¹⁶እንዲህም እያሉ፤ “በጥሩ በፍታ፣ በሐምራዊና በቀይ ልብስ ለተጐናጸፈች፣ በወርቅ፣ በከበረ ድንጋይና በዕንቍ ለተሸለመች ለታላቂቱ ከተማ ወዮ፣ ወዮ! እንዲህ ያለው ሀብት በአንዲት ሰዓት ጠፋ።” ¹⁷የመርከብም አለቃ ሁሉ፣ በባሕር የሚሄድ ሁሉ፣ መርከበኞችም፣ ከባሕር የሚተዳደሩ ሁሉ ከሩቅ ቆሙ፣ ¹⁸የመቃጠሏንም ጢስ ባዩ ጊዜ ጮኸው እንዲህ አሉ፤ “እንደ ታላቂቱ ከተማ ያለች ከተማ የትኛዋ ናት?” ¹⁹በራሳቸውም ላይ ትቢያ ነስንሰው እያለቀሱና እያዘኑ ጮኸው እንዲህ አሉ፤ “በባሕር መርከብ ያላቸው ሁሉ ከብልጥግናዋ የተነሣ ባለጠጎች የሆኑባት ለታላቂቱ ከተማ ወዮ፣ ወዮ! በአንዲት ሰዓት ባድማ ሆነች።” ²⁰አንቺ ሰማይ፣ እናንተም ቅዱሳን፣ ሐዋርያትና ነቢያት ሆይ፣ ስለ እርሷ ደስ ይበላችሁ! አባታችን በእርሷ ላይ ፍርዳችሁን ፈጽሞላችኋልና።

²¹ብርቱ መልአክም እንደ ታላቅ የወፍጮ ድንጋይ ያለ ድንጋይ አንሥቶ ወደ ባሕር ጣለና እንዲህ አለ፤ “ታላቂቱ ከተማ ባቢሎን እንዲሁ በኀይል ትጣላለች፤ ከቶም ዳግመኛ አትገኝም። ²²የበገና ደርዳሪዎችና የሙዚቀኞች፣ የእንቢልታ ነፊዎችና የመለከት ነፊዎች ድምፅ ከእንግዲህ ወዲህ በአንቺ ውስጥ ከቶ አይሰማም። የማንኛውም ሥራ ባለሞያ ከእንግዲህ ወዲህ በአንቺ ውስጥ ከቶ አይገኝም። የወፍጮ ድምፅ ከእንግዲህ ወዲህ በአንቺ ውስጥ ከቶ አይሰማም። ²³የመብራት ብርሃን ከእንግዲህ ወዲህ በአንቺ ውስጥ ከቶ አይበራም። የሙሽራና የሙሽሪት ድምፅ ከእንግዲህ ወዲህ በአንቺ ውስጥ ከቶ አይሰማም። ነጋዴዎችሽ የምድር ታላላቆች ነበሩና፣ አሕዛብም ሁሉ በጥንቆላሽ ተታልለዋል። ²⁴በእርሷም ውስጥ የነቢያትና የቅዱሳን፣ በምድር ላይ የታረዱትም ሁሉ ደም ተገኘ።”