ራእይ 17

17 ¹ሰባቱን ጽዋዎች ከያዙት ከሰባቱ መላእክት አንዱ መጥቶ እንዲህ ብሎ ተናገረኝ፤ “ና፣ በብዙ ውሃዎች ላይ በተቀመጠችው በታላቂቱ ጋለሞታ ላይ የሚመጣውን ፍርድ አሳይሃለሁ። ²የምድር ነገሥታት ከእርሷ ጋር ዝሙት ፈጸሙ፤ የምድርም ነዋሪዎች በኀጢአቷ ወይን ሰከሩ።” ³በመንፈስም ወደ ምድረ በዳ ወሰደኝ፤ በዚያም እግዚአብሔርን በሚሰድቡ ስሞች በተሞላ፣ ሰባት ራሶችና ዐሥር ቀንዶች ባሉት በቀይ አውሬ ላይ የተቀመጠች ሴት አየሁ። ⁴ሴቲቱም ሐምራዊና ቀይ ልብስ ለብሳ፣ በወርቅ፣ በከበሩ ድንጋዮችና በዕንቍዎች ተሽቆጥቍጣ፣ አስጸያፊ ነገሮችና የዝሙቷ ርኩሰት የሞላበትን የወርቅ ጽዋ በእጇ ይዛ ነበር። ⁵በግንባሯም ላይ ምስጢር የሆነ ስም፦ “ታላቂቱ ባቢሎን፣ የጋለሞቶችና የምድር አስጸያፊ ነገሮች እናት” ተብሎ ተጽፎ ነበር።

⁶ሴቲቱም በቅዱሳን ደም፣ በኢየሱስ ምስክሮች ደም ሰክራ አየኋት። ባየኋትም ጊዜ እጅግ ተደነቅሁ።

⁷መልአኩም፣ “ለምን ትደነቃለህ? የሴቲቱን፣ እንዲሁም የተሸከማትን፣ ሰባት ራሶችና ዐሥር ቀንዶች ያሉትን የአውሬውን ምስጢር እነግርሃለሁ። ⁸ያየኸው አውሬ ነበረ፤ አሁን ግን የለም፤ ከጥልቁም ሊወጣ ተዘጋጅቶ ወደ ጥፋቱ ይሄዳል። ስማቸው ዓለም ከተፈጠረበት ጊዜ ጀምሮ በሕይወት መጽሐፍ ያልተጻፈ፣ በምድር የሚኖሩ ሰዎች አውሬውን ባዩ ጊዜ ይደነቃሉ፤ ነበረ፣ የለም፣ ዳሩ ግን ይመጣልና።

⁹ይህ ጥበብ ያለው አእምሮ ይሻል፤ ሰባቱ ራሶች ሴቲቱ የተቀመጠችባቸው ሰባት ተራሮች ናቸው፤ ሰባት ነገሥታትም ናቸው። ¹⁰አምስቱ ወድቀዋል፤ አንዱ አለ፤ ሌላውም ገና አልመጣም፤ በመጣም ጊዜ ጥቂት ጊዜ ሊቈይ ይገባዋል። ¹¹የነበረውና የሌለው አውሬ ራሱ ስምንተኛው ነው፤ ከሰባቱም አንዱ ሆኖ ወደ ጥፋት ይሄዳል። ¹²ያየሃቸው ዐሥሩ ቀንዶች ገና መንግሥት ያልተቀበሉ ዐሥር ነገሥታት ናቸው፤ ነገር ግን ከአውሬው ጋር ለአንድ ሰዓት እንደ ነገሥታት ሥልጣን ይቀበላሉ። ¹³እነዚህ አንድ ሐሳብ አላቸው፤ ኃይላቸውንና ሥልጣናቸውንም ለአውሬው አሳልፈው ይሰጣሉ።

¹⁴በጉን ይዋጋሉ፤ በጉም ድል ያደርጋቸዋል፤ እርሱ የጌቶች ጌታ የነገሥታትም ንጉሥ ነውና፤ ከእርሱ ጋር ያሉትም የተጠሩ፣ የተመረጡና የታመኑ ናቸው።” ¹⁵መልአኩም እንዲህ አለኝ፤ “ጋለሞታዪቱ የተቀመጠችባቸው ያየሃቸው ውሃዎች ሕዝቦች፣ ብዙ ሰዎች፣ አሕዛብና ቋንቋዎች ናቸው። ¹⁶ያየሃቸው ዐሥሩ ቀንዶችና አውሬው ጋለሞታዪቱን ይጠላሉ፤ ባድማና ዕራቍቷን ያደርጓታል፤ ሥጋዋንም ይበላሉ፤ በእሳትም ያቃጥሏታል። ¹⁷አባታችን ፈቃዱን እንዲፈጽሙ፣ በአንድ ሐሳብ እንዲተባበሩ፣ የአባታችንም ቃላት እስኪፈጸሙ ድረስ መንግሥታቸውን ለአውሬው አሳልፈው እንዲሰጡ በልባቸው ውስጥ አኑሮታልና። ^a a v17 አውሬውን የሚያገለግሉ ዐመፀኛ ነገሥታት እንኳ የአባታችንን ፈቃድ ይፈጽማሉ። እርሱም ታሪክን ወደ በጉ ድል ይመራል። ¹⁸ያየሃት ሴት በምድር ነገሥታት ላይ የምትነግሠው ታላቂቱ ከተማ ናት።”