E Kpughere Nnukwu Akwụna ahụ

Otu mmụọ ozi gosiri Jọn otu nwaanyị yi uwe odo odo, onye ọbara ndị akaebe Jisọs mere ka ọ ṅụbiga mmanya ókè, ka ọ nọkwasịrị nʼelu otu anụ ọhịa na-acha uhie uhie. Ihe ahụ jụrụ Jọn anya; mmụọ ozi ahụ kọwaara ya isi na mpi ndị ahụ. Nʼikpeazụ, anụ ọhịa ahụ na ndị eze ya chigharịkwutere ya, sụọ ya ọkụ, na-emezu nzube Nna anyị.

Isi 17.

Otu nʼime ndị mmụọ ozi asaa ahụ ji efere asaa ahụ bịara gwa m okwu, sị, “Bịa, m ga-egosi gị ikpe a mara nnukwu akwụna ahụ nke nọ ọdụ nʼelu ọtụtụ mmiri. Ndị eze ụwa soro ya mee mmehie ịkwa iko, ndị bi nʼụwa aṅụbigakwala mmanya nke mmehie ya oke.” O sitere na Mmụọ buru m baa nʼọzara, ebe m hụrụ otu nwanyị ka ọ nọ ọdụ nʼelu anụ ọhịa na-acha ọbara ọbara, nke aha niile na-akparị Chineke kpuchiri ya, nke nwere isi asaa na mpi iri. Nwanyị ahụ yi uwe na-acha odo odo na nke na-acha ọbara ọbara, jiri ọlaedo, nkume dị oké ọnụ ahịa, na paalụ chọọ onwe ya mma, jidekwa nʼaka ya iko ọlaedo nke jupụtara nʼihe arụ na adịghị ọcha nke mmehie ịkwa iko ya. E dere nʼegedege ihu ya aha, bụ ihe omimi, sị, “Babilọn Ukwu ahụ, nne ndị akwụna na nne ihe arụ niile dị nʼụwa.”

Ahụrụ m ka nwanyị ahụ ṅụbigara ọbara ndị nsọ na ọbara ndị akaebe Jisọs oke. Mgbe m hụrụ ya, o juru m anya nke ukwuu.

Mmụọ ozi ahụ jụrụ m, sị, “Gịnị mere o ji juo gị anya? M ga-agwa gị ihe omimi nke nwanyị ahụ na nke anụ ọhịa ahụ na-ebu ya, nke nwere isi asaa na mpi iri. Anụ ọhịa ahụ ị hụrụ dịbu, ma ọ dịghịzi, ọ na-achọkwa ịrịgo site nʼabis ahụ wee gawa na mbibi ya. Ndị bi nʼụwa, bụ ndị a na-edeghị aha ha nʼakwụkwọ ndụ ahụ site na mgbe e tọrọ ntọala ụwa, ga-eju anya mgbe ha hụrụ anụ ọhịa ahụ—nʼihi na ọ dịbu, ma ọ dịghịzi, ọ ga-abịakwa.

Nke a chọrọ uche maara ihe: isi asaa ahụ bụ ugwu asaa nke nwanyị ahụ nọ ọdụ nʼelu ha, ha bụkwa eze asaa. Ise nʼime ha adaala, otu nọ, nke ọzọ abịabeghị; mgbe ọ bịara, ọ ga-anọ naanị obere oge. Anụ ọhịa ahụ dịbu ma ọ dịghịzi, ya onwe ya bụ nke asatọ, maọbụ otu nʼime ndị asaa ahụ, ọ na-agakwa na mbibi. Mpi iri ahụ ị hụrụ bụ eze iri, bụ ndị na-anatabeghị alaeze, ma ha ga-anata ikike dịka ndị eze ruo otu awa ha na anụ ọhịa ahụ. Ndị a nwere otu echiche, ha na-enyefekwa anụ ọhịa ahụ ike ha na ikike ha.

Ha ga-ebuso Nwa Atụrụ ahụ agha, Nwa Atụrụ ahụ ga-emerikwa ha, nʼihi na ọ bụ Onyenwe ndị nwe na Eze ndị eze, ndị ya na ha nọ bụkwa ndị a kpọrọ, ndị a họpụtara, na ndị kwesịrị ntụkwasị obi.” Mmụọ ozi ahụ gwara m, sị, “Mmiri ndị ahụ ị hụrụ, ebe akwụna ahụ nọ ọdụ, bụ ọtụtụ mmadụ, igwe mmadụ, mba dị iche iche, na asụsụ dị iche iche. Mpi iri ahụ ị hụrụ, na anụ ọhịa ahụ, ga-akpọ akwụna ahụ asị. Ha ga-ahapụ ya ka ọ tọgbọrọ nʼefu, gbakwa ọtọ, rie anụ ahụ ya, werekwa ọkụ rechapụ ya. Nʼihi na Nna anyị tinyere ya nʼobi ha ka ha mezuo nzube ya, dị nʼotu obi, nyefeekwa anụ ọhịa ahụ alaeze ha, ruo mgbe okwu Nna anyị ga-emezu. ^a Nwanyị ahụ ị hụrụ bụ nnukwu obodo ahụ nke na-achị ndị eze ụwa.”