Thethenu Nadeo Mengo süpü
Tüyochoyimi thünomi mere tsü whüpü, Jisu zhopo koba za mezü tapü, khonu merezü zü kiri tao John ce mesesü. John malhü thita; tüyochoyio upi thüna mu püka keri mese süta. Thülakedilü khonuo mu pü kedeko püce retu de khalü pü süva, ha Po medo thi süsü.
17 1Tüyochoyimi thünako, he thünako küta dolü mipü ace vori die poti, “Vorite, jü kekro yo sitsüo thethenu nadeo sheco kethi tipü I no meka sütomo. 2Cejü kedekoe pü züde mhaküsü thita, mu cejü thümako pü mha kerezhü hezo mezü tata.” 3Pü Rüpü dalü a khipü cejü kümora lü vota; süsalü I thünomi thi, khonu mere, Jihova zho shu theza zho kebe yo sitsüo ngo, khonu hio upi thüna mu püka keri ba. 4Thünomi hio merezü tsü mu mere tsü whü, suna, ketsü uma kerü mu pearls de pü zütati be; pü talü suna khu, ngokemetsü thino mu pü mha kerezhü thece di de kebe pü vüta. 5Pü tükhralü theza thopü ta, ketekhri hihi: “Babylon Nadeo, thethenuko mu cejü ngokemetsü thenyüko nezü zo.”
6I thünomi hio kemesami za mu Jisu zhopo koba za mezü tapü ngo. Pü peyite lize, I malhü thiri ta.
7Tüyochoyimi poti, “Dipüla no malhü thiri? Thünomi mu pü khipü züpü khonu, upi thüna mu püka keri küta, hio ketekhri I noce mese sütomo. 8No ngopü khonu hio tsüdo ba, tsühi bamo, mu thülakedi celü pari toho, side pü thülaco lü votato. Cejü meju celü kerhü lesida lü za thopü kemepü, cejülü kebami thümako, khonu hio—tsüdo ba, tsühi bamo, mu votopü—peyi lize malhü thita to.
9Hio mha kethsü lüdo dokhriyo: upi thüna hi thünomi sitsüo cejütu thüna zo, mu uko kedeko thüna zo. 10Pengu retu tava, thi hisa ba, kekremi tsühi voriho; pü vori lize pü dopü la ba dokhriyo. 11Tsüdo ba mu tsühi bamo khonu hio, pütho zho tütha küti zo, süri thünako dolü mipüzo, mu thülaco lü votopüzo. 12No ngopü püka keri hi, tsühi küde ngoyi kemo kedeko keri zo, süri khonu zü ketsü thi hora la kedeko bi keku ngoyi to. 13Uko hiko mha thiyo bazo, mu uko pu meshi mu keku khonu ce tsü to.
14Uko tekonuo zü theri thi to, mu tekonuo uko meni vato, kekrelamori Pu Niepoko pi Niepoo mu kedeko pi kedeo zo, mu Pu züde kebako cü keyipü, kedapü, mu jüthozo.” 15Tüyochoyimi ace poti, “No ngopü jüko, thethenu sitsüo lhü hio, thümako, makro, shuyeko, mu ujü kekre ketsüko zo. 16No ngopü püka keri mu khonu hio, thethenu mütsu to. Uko pü kümüthu mu müthu de pe va to, pü uphosü co to, mu pü me de tiyi to. 17Kekrelamori ha Poe, Pü müdo thi, mha thiyo unitsü, mu uko küde khonu ce tsü die, uko lüdolü thita, ha Po jüko thazü ngo kümüde. a a v17 Khonu ce kezalepü kedeko sheri ha Po müdo thiyozo. Pue mi kethi metü tekonuo meni kevelü khipüto. 18No ngopü thünomi hio, cejü kedeko yo kethipü nade kedeo zo.”
