Khayorva̱ Kachiva̱ Phongmihai
Kazingrao akhana Johnli phi hungping kaphonga sha̱nao akha theingasaka; ana Jishuwui shākhibingwui ashee eina ngaihaida, sāyur kahunga akhawuitungli tongda lei. John ngacheeda khangai; kazingraona akui kala angajiwui aphaning chi phongmi. Maphakta sāyur kala awui awungabing china ali ngathorda mei eina rui, ithumwui Avāwui ningkachāng chi sāpama.
17 1Koklui shini kavai kazingrao shiniwui eina akhana ili rāhānga, "Rālu, tara̱ kachungkhatungli pama khareia khayorva̱ chili bichar sākahai chi ina nali chitheimira. 2Okathuiwui awungabingna awuili khangaso sai, kala okathuiwui mibing awui moreiwui zam eina maripa." 3Manglā eina ili lamhāngli khuivāhaowa, apam chili hungshi kahai sāyur akuitungli pama sha̱nao akha ina theiya. Sāyur chi Vareli kachipat aming eina pemtinghaida, kui shini kala angaji tharā kai. 4Sha̱nao china hungrisi kala hungshi kahai kachon ngavai, sinā, aman kasaka ngalung, kala pearl eina phorkasang, awui pāngli ningkakachai ot kala awui khangasowui makhao eina pemtinghai sinā tengkot akha singa. 5Awui khaveili aming akha, khangathuma akha kapisanghai: "Khareia Babylon, khayorva̱bing kala okathuiwui ningkakachai otbingwui ava̱."
6Katharabingwui ashee kala Jishuwui shākhibingwui ashee eina mariphaia sha̱nao chi ina theiya. Ali theilaga, ina tarākha matakhakhaowa.
7Kazingrao china ili hānga, "Khisāda na matakhakhaokhala? Sha̱nao chiwui kala ali phungkasa, kui shini kala angaji tharā kakā sāyur chiwui khangathuma chi ina nali hāngmira. 8Nana kathei sāyur chi leisai, kha ara maleimana, kala makatang leizingkhurwui eina shoklaga kashimānli vāra. Okathui masāranglakhawui eina kharingwui lairikli aming makapisanghai, okathuili kharingabing china sāyur chi theida matakhakhaora — kaja chi leisai, ara maleimana, kala rāra.
9Hi thangkhamei ning kaphaninga: kui shini chi sha̱nao china pama kaphung shinina, kala athumla awunga shinina. 10Phangā pitāhaira, akha ara lei, kala khangatei chi marārangsai; ana rā tharan, kasha̱khawui vang pamphalungra. 11Leisai kha ara maleimana sāyur chi khalatta kachishata akhana, chithālala shiniwui eina akhana, kala kashimānli vāra. 12Nana kathei angaji tharā chi wungram masamphangranga kaji awunga tharāna; kha sāyur chi ngasoda okthot akhawui vang awunga thāda pangshap samphangra. 13Athum ning akhana, kala athumwui pangshap kala sāshap chi sāyur chili sangra.
14Athumna Yaonao chili ngararra, kala Yaonao china athumli yuira, kaja a prohobingwui Proho kala awungabingwui Awunga china, kala a ngasoda leiping chi hokakhui, kapang kahai, kala chisin kahaibingna." 15Kazingrao china ili hānga, "Khayorva̱ china kapama nana kathei tara̱ chi mibing, yarui, miyur, kala tuiyurbingna. 16Nana kathei angaji tharā chi kala sāyur chi, khayorva̱ chili yangkharingra. Athumna ali ngachakyāng kala asāmsai eina horhaora, awui asā shaira, kala ali mei eina riktāra. 17Kaja ithumwui Avāwui tui chi ungshung khavai eina tangda, awui kaphaning chi sākhavai, ning akha eina khokkha sāda athumwui wungram chi sāyur chili sangkhavai, ithumwui Avāna athumwui wuklungli sāngasaka. a a v17 Sāyur chili ot kasā mamayā awungabing eina tangdala ithumwui Avāwui kaphaning chi sāsera. Ana atam saikora Yaonaona mayuiwui shongfali thānzata. 18Sha̱nao nana kathei chi okathuiwui awungabingwuitungli khamunga khareia keinung china."
