Mũmaraya ũrĩa Mũnene Kũguũrĩrio
Mũraika nĩonagia Johana mũtumia wĩhumbĩte rangi wa ndathi, mũrĩu nĩ thakame ya aira a Jesũ, ahaicĩte nyamũ ndune. Johana nĩagega; mũraika nake akamũtaarĩria ũhoro wa mĩtwe na hĩa. Marigĩrĩrio-inĩ nyamũ ĩyo na athamaki ayo makamũgarũrũka na makamũcina, makĩhingia muoroto wa Ithe witũ.
17 1Ũmwe wa araika arĩa mũgwanja maarĩ na mbakũri mũgwanja agĩũka akĩnjarĩria, akĩnjĩĩra atĩrĩ, “Ũka, nĩngũkuonia ituĩro rĩa ciira rĩa mũmaraya ũrĩa mũnene ũrĩa ũikaraga igũrũ rĩa maaĩ maingĩ. 2Athamaki a thĩ nĩmatharĩirie hamwe naake, nao andũ arĩa matũũraga thĩ makĩrĩĩo nĩ ndibei ya ũtharia wake.” 3Agĩĩthaamia ndĩ thĩinĩ wa Roho, akĩndwara werũinĩ, na kũu ngĩona mũndũ-wa-nja aikarĩire nyamũ ndune ta gakarakũ, ĩiyũrĩte marĩĩtwa ma kũruma Ngai, ĩrĩ na mĩtwe mũgwanja na hĩa ikũmi. 4Mũndũ-wa-nja ũcio eehumbĩte nguo cia rangi wa ndathi na ndune, egemetie na thahabu, na tũhiga twa goro, na ruru, anyiitĩte gĩkombe kĩa thahabu guokoinĩ gwake kĩiyũrĩte maũndũ marĩ magigi na thũũ cia ũtharia wake. 5Naguo thiithiinĩ wake nĩ haandĩkĩtwo rĩĩtwa, na nĩ hitho: “Babuloni ũrĩa mũnene, nyina wa amaraya na wa maũndũ marĩ magigi ma thĩ.”
6Ngĩona mũndũ-wa-nja ũcio arĩĩtwo nĩ thakame ya andũ arĩa atheru, na thakame ya aira a Jesũ. Rĩrĩa ndaamuonire, ngĩgega mũno.
7Nake mũraika akĩnjũũria atĩrĩ, “Ũgegete nĩkĩ? Nĩngũkwĩra hitho ya mũndũ-wa-nja ũcio na ya nyamũ ĩrĩa ĩmũkuuĩte, ĩrĩa ĩrĩ na mĩtwe mũgwanja na hĩa ikũmi. 8Nyamũ ĩrĩa wonire yarĩ ho, na rĩu ndĩrĩ ho, na ĩkiriĩ kwambata yume irimainĩ rĩrĩa rĩtarĩ gĩturi, ĩthiĩ mwanangĩkoinĩ wayo. Nao arĩa matũũraga thĩ, arĩa marĩĩtwa mao mataandĩkĩtwo ibukuinĩ rĩa muoyo kuuma rĩrĩa thĩ yoombirwo, nĩmakagega makĩona nyamũ ĩyo, tondũ yarĩ ho, na rĩu ndĩrĩ ho, no nĩĩgooka.
9Haha nĩ harabatara meciiria marĩ na ũũgĩ: mĩtwe ĩyo mũgwanja nĩ irĩma mũgwanja iria mũndũ-wa-nja ũcio aikarĩire, na ningĩ nĩ athamaki mũgwanja. 10Atano nĩmagũĩte, ũmwe arĩ ho, na ũrĩa ũngĩ ndarĩ ataũka; rĩrĩa agooka, no mũhaka aikare o kahinda kanini. 11Nayo nyamũ ĩrĩa yarĩ ho na rĩu ndĩrĩ ho, nĩyo mũthamaki wa ĩnana, na no ĩrĩ ĩmwe ya acio mũgwanja, na ĩrathiĩ mwanangĩkoinĩ. 12Nacio hĩa icio ikũmi iria wonire nĩ athamaki ikũmi arĩa matarĩ maamũkĩra ũthamaki, no nĩmakaamũkĩra ũhoti ta athamaki ithaa rĩmwe hamwe na nyamũ ĩyo. 13Nao aya marĩ na meciiria o mamwe, na nĩmaneanaga hinya wao na ũhoti wao kũrĩ nyamũ ĩyo.
14Nĩmakarũa na Gatũrũme, nake Gatũrũme nĩagaatooria, tondũ nĩ we Mwathani wa aathani na Mũthamaki wa athamaki, nao arĩa marĩ hamwe nake nĩ eetĩtwo, na magathuurwo, na nĩ ehokeku.” 15Nake mũraika akĩnjĩĩra atĩrĩ, “Maaĩ marĩa wonire, harĩa mũmaraya ũcio aikarĩire, nĩ andũ, na kĩrĩndĩ, na ndũrĩrĩ, na thiomi. 16Nacio hĩa icio ikũmi iria wonire, na nyamũ ĩyo, nĩigaathũũra mũmaraya ũcio. Nĩigaatiga arĩ mũtiganĩrie na njaga, na irĩe nyama ciake, na imĩcine na mwaki. 17Amu Ithe witũ nĩekĩrĩte ngoroinĩ ciao atĩ mahingie muoroto wake, na manyiitane meciiriainĩ mamwe, na maneane ũthamaki wao kũrĩ nyamũ ĩyo, nginya ciugo cia Ithe witũ ihingio. a a v17 O na athamaki arĩa aremi arĩa matungataga nyamũ ĩyo nĩmahingagia muoroto wa Ithe witũ. Nĩwe ũtongoragia maũndũ ma thĩ nginya ũhootani wa Gatũrũme. 18Nake mũndũ-wa-nja ũrĩa wonire nĩ itũũra rĩrĩa inene rĩrĩa rĩathaga athamaki a thĩ.”