啟示錄 17

17 ¹拿住七個碗嘅七位天使,其中一位行過嚟同我講:「你嚟,我畀你睇吓對嗰個坐喺眾水之上嘅大淫婦嘅審判。 ²地上嘅君王同佢犯咗淫亂,住喺地上嘅人飲醉咗佢淫亂嘅酒。」 ³我喺聖靈裏面,畀佢帶到曠野去,喺嗰度我見到一個女人,坐喺一隻朱紅色嘅獸上面,呢隻獸周身都寫滿咗侮辱神嘅名,有七個頭同十隻角。 ⁴呢個女人身穿紫色同朱紅色嘅衫,用金、寶石同珍珠嚟打扮,手裏面拎住一個金杯,裏面盛滿咗可憎嘅嘢,同埋佢淫亂嘅污穢。 ⁵喺佢額頭上面寫住一個名,一個奧祕:「大巴比倫,眾淫婦同地上一切可憎之物嘅母親。」

⁶我見到呢個女人飲醉咗,係飲咗眾聖徒嘅血,同埋為耶穌作見證嘅人嘅血。我一見到佢,就大大咁驚奇。

⁷天使問我:「你做乜咁驚奇呢?我會將呢個女人,同埋馱住佢、有七個頭同十隻角嘅獸嘅奧祕話畀你知。 ⁸你所見到嘅獸,以前有,而家無,將來要從無底坑上嚟,然後行向滅亡。住喺地上嘅人,凡係名字由創世以嚟無記喺生命冊上面嘅,見到呢隻獸,都會驚奇,因為佢以前有,而家無,將來又會嚟。

⁹喺呢度就要有智慧嘅心思:嗰七個頭就係嗰個女人所坐嘅七座山,佢哋又係七位君王。 ¹⁰五位已經倒咗,一位仲喺度,另外一位重未嚟到;等佢嚟到嘅時候,佢只可以暫時留住。 ¹¹嗰隻以前有、而家無嘅獸,佢自己就係第八位,但又係屬於嗰七位之中,係要行向滅亡嘅。 ¹²你所見到嘅十隻角,就係十位君王,佢哋重未得到國度,但係要同嗰隻獸一齊,得到王權一個鐘頭。 ¹³呢啲人係同一個心思,佢哋將自己嘅能力同權柄都交畀嗰隻獸。

¹⁴佢哋會同羊羔爭戰,羊羔會勝過佢哋,因為佢係萬主之主、萬王之王,同佢喺一齊嘅,係蒙召、被揀選同忠心嘅人。」 ¹⁵天使又對我講:「你所見到嘅眾水,就係淫婦坐嗰度,係指多民、多眾、多國同多方言嘅人。 ¹⁶你所見到嘅十隻角同嗰隻獸,佢哋會憎恨嗰個淫婦,會令佢荒涼、赤身露體,會食佢嘅肉,又用火將佢燒晒。 ¹⁷ 因為我哋嘅父將心意放喺佢哋心裏面,叫佢哋成就佢嘅旨意,同心合意,將自己嘅國度交畀嗰隻獸,直到我哋嘅父嘅話都應驗為止。 ^a a v17 就算係悖逆嘅君王服侍嗰隻獸,佢哋一樣係成就緊我哋嘅父嘅旨意。佢引導歷史,朝住羊羔嘅得勝而去。 ¹⁸你所見到嘅嗰個女人,就係嗰座管轄地上眾君王嘅大城。」