An Bayyana Babbar Karuwa
Wani mala'ika ya nuna wa Yohanna wata mace sanye da shunayya, wadda ta bugu da jinin shaidun Yesu, tana hawan wata jar dabba. Yohanna ya yi mamaki; mala'ikan ya bayyana kawunan da ƙahonin. A ƙarshe dabbar da sarakunanta suka juya mata suka ƙone ta, suna cika nufin Ubanmu.
17 1Sai ɗaya daga cikin mala'iku bakwai masu kwanonin nan bakwai ya zo ya yi magana da ni, ya ce, “Zo, zan nuna maka hukuncin da za a yi wa babbar karuwar da take zaune a kan ruwaye masu yawa. 2Sarakunan duniya sun yi lalata da ita, mutanen duniya kuma sun bugu da ruwan inabin lalatarta.” 3Sai ya ɗauke ni cikin Ruhu zuwa cikin jeji, a can kuwa na ga wata mace zaune a kan wata jar dabba wadda aka rufe da sunaye masu zagin Allah, mai kawuna bakwai da ƙahoni goma. 4Macen tana saye da tufafi masu launin shunayya da jaja, an yi mata ado da zinariya, da duwatsu masu daraja, da lu'ulu'u, tana kuma riƙe a hannunta da kokon zinariya cike da abubuwa masu banƙyama da ƙazantar lalatarta. 5A goshinta kuma an rubuta wani suna, asiri, “Babila Mai Girma, uwar karuwai da kuma abubuwa masu banƙyama na duniya.”
6Na ga macen ta bugu da jinin tsarkaka, da jinin shaidun Yesu. Da na gan ta, sai na yi mamaki ƙwarai.
7Sai mala'ikan ya ce, “Don me kake mamaki? Zan gaya maka asirin macen, da na dabbar da take ɗauke da ita, wadda take da kawuna bakwai da ƙahoni goma. 8Dabbar da ka gani ta taɓa kasancewa, amma yanzu ba ta nan, tana kuma gab da fitowa daga rami marar iyaka ta tafi ga hallakarta. Mazaunan duniya waɗanda ba a rubuta sunayensu a littafin rai ba tun kafuwar duniya za su yi mamaki sa'ad da suka ga dabbar, domin ta taɓa kasancewa, yanzu ba ta nan, amma za ta sāke zuwa.
9Wannan yana bukatar hankali mai hikima: kawunan nan bakwai duwatsu bakwai ne waɗanda macen take zaune a kansu, su kuma sarakuna bakwai ne. 10Biyar sun fāɗi, ɗaya yana nan, ɗayan kuma bai riga ya zo ba; sa'ad da ya zo, dole ya zauna na ɗan lokaci kaɗan. 11Dabbar da ta taɓa kasancewa, amma yanzu ba ta nan, ita kanta ita ce ta takwas, duk da haka tana cikin bakwan nan, tana kuma tafiya ga hallaka. 12Ƙahonin nan goma da ka gani sarakuna goma ne waɗanda ba su riga sun sami mulki ba, amma za su sami iko kamar sarakuna na sa'a ɗaya tare da dabbar. 13Waɗannan suna da nufi ɗaya, za su kuma miƙa wa dabbar ikonsu da sarautarsu.
14Za su yaƙi Ɗan Ragon, Ɗan Ragon kuma zai ci su da yaƙi, domin shi ne Ubangijin iyayengiji da Sarkin sarakuna, waɗanda kuma suke tare da shi kirayayyu ne, zaɓaɓɓu ne, amintattu ne.” 15Sai mala'ikan ya ce mini, “Ruwayen da ka gani, inda karuwar take zaune, mutane ne, da taron jama'a, da al'ummai, da harsuna. 16Ƙahonin nan goma da ka gani, da kuma dabbar, za su ƙi karuwar. Za su bar ta kango tsirara, su ci namanta, su kuma ƙone ta ƙurmus da wuta. 17Gama Ubanmu ya sa a zukatansu su cika nufinsa, su haɗa kai da nufi ɗaya, su kuma ba da mulkinsu ga dabbar, sai an cika maganar Ubanmu. a a v17 Ko sarakuna 'yan tawaye da suke bauta wa dabbar suna cika nufin Ubanmu. Yana jagorantar tarihi zuwa ga nasarar Ɗan Ragon. 18Macen da ka gani ita ce babban birnin nan da yake mulki a kan sarakunan duniya.”