ମହା ବେଶ୍ୟା ପ୍ରକାଶିତ

ଜଣେ ସ୍ୱର୍ଗଦୂତ ଯୋହନଙ୍କୁ ବାଇଗଣି ବସ୍ତ୍ର ପିନ୍ଧିଥିବା ଜଣେ ସ୍ତ୍ରୀଲୋକକୁ ଦେଖାନ୍ତି। ସେ ଯୀଶୁଙ୍କ ସାକ୍ଷୀମାନଙ୍କ ରକ୍ତରେ ମତ୍ତ ହୋଇ ଏକ ସିନ୍ଦୂରବର୍ଣ୍ଣ ପଶୁ ଉପରେ ବସିଛି। ଯୋହନ ଆଶ୍ଚର୍ଯ୍ୟ ହୁଅନ୍ତି, ଏବଂ ଦୂତ ମସ୍ତକ ଓ ଶିଙ୍ଗଗୁଡ଼ିକର ଅର୍ଥ ବୁଝାନ୍ତି। ଶେଷରେ ପଶୁ ଓ ତାହାର ରାଜାମାନେ ତାହା ବିରୁଦ୍ଧରେ ଠିଆ ହୋଇ ତାହାକୁ ପୋଡ଼ି ପକାନ୍ତି, ଏବଂ ଏଥିରେ ଆମ ପିତାଙ୍କ ଉଦ୍ଦେଶ୍ୟ ସାଧିତ ହୁଏ।

ଅଧ୍ୟାୟ 17।

ସାତ ପାତ୍ର ଥିବା ସେହି ସାତ ଦୂତଙ୍କ ମଧ୍ୟରୁ ଜଣେ ଆସି ମୋ ସହିତ କଥାବାର୍ତ୍ତା କରି କହିଲେ, “ଆସ, ଯେଉଁ ମହା ବେଶ୍ୟା ଅନେକ ଜଳରାଶି ଉପରେ ବସିଅଛି, ତାହା ଉପରେ ଯେଉଁ ଦଣ୍ଡ, ତାହା ମୁଁ ତୁମ୍ଭକୁ ଦେଖାଇବି। ପୃଥିବୀର ରାଜାମାନେ ତାହା ସହିତ ବ୍ୟଭିଚାର କଲେ, ଆଉ ପୃଥିବୀନିବାସୀମାନେ ତାହାର ବ୍ୟଭିଚାରର ମଦ୍ୟରେ ମତ୍ତ ହେଲେ।” ଆଉ ସେ ମୋତେ ଆତ୍ମାରେ ଗୋଟିଏ ପ୍ରାନ୍ତରକୁ ବହିନେଲେ, ସେଠାରେ ମୁଁ ଈଶ୍ଵରନିନ୍ଦକ ନାମରେ ପରିପୂର୍ଣ୍ଣ, ସପ୍ତ ମସ୍ତକ ଓ ଦଶ ଶୃଙ୍ଗବିଶିଷ୍ଟ ଏକ ଲୋହିତବର୍ଣ୍ଣ ପଶୁ ଉପରେ ଜଣେ ସ୍ତ୍ରୀଲୋକକୁ ବସିଥିବା ଦେଖିଲି। ସେହି ସ୍ତ୍ରୀଲୋକ ବାଇଗଣୀ ଓ ଲୋହିତବର୍ଣ୍ଣ ବସ୍ତ୍ର ପରିଧାନ କରି ସୁନା, ବହୁମୂଲ୍ୟ ପ୍ରସ୍ତର ଓ ମୁକ୍ତାରେ ବିଭୂଷିତା ହୋଇଥିଲା, ପୁଣି ଘୃଣ୍ୟ ବସ୍ତୁ ଓ ଆପଣା ବ୍ୟଭିଚାରର ଅଶୁଚିତାରେ ପରିପୂର୍ଣ୍ଣ ଗୋଟିଏ ସୁବର୍ଣ୍ଣ ପାତ୍ର ଆପଣା ହସ୍ତରେ ଧରିଥିଲା। ତାହାର କପାଳରେ ଗୋଟିଏ ନାମ, ଗୋଟିଏ ନିଗୂଢ଼ତତ୍ତ୍ୱ ଲିଖିତ ଥିଲା, “ମହତୀ ବାବିଲ, ବେଶ୍ୟାମାନଙ୍କର ଓ ପୃଥିବୀର ଘୃଣ୍ୟ ବସ୍ତୁସମୂହର ଜନନୀ।”

ପୁଣି, ମୁଁ ସେହି ସ୍ତ୍ରୀଲୋକକୁ ସାଧୁମାନଙ୍କ ରକ୍ତ ଓ ଯୀଶୁଙ୍କ ସାକ୍ଷୀମାନଙ୍କ ରକ୍ତରେ ମତ୍ତ ହୋଇଥିବା ଦେଖିଲି। ତାହାକୁ ଦେଖି ମୁଁ ଅତ୍ୟନ୍ତ ଚମତ୍କୃତ ହେଲି।

ସେଥିରେ ଦୂତ ମୋତେ ପଚାରିଲେ, “ତୁମ୍ଭେ କାହିଁକି ଚମତ୍କୃତ ହେଉଅଛ? ସେହି ସ୍ତ୍ରୀଲୋକର ଓ ତାହାକୁ ବହିବା ସପ୍ତ ମସ୍ତକ ଓ ଦଶ ଶୃଙ୍ଗବିଶିଷ୍ଟ ପଶୁର ନିଗୂଢ଼ତତ୍ତ୍ୱ ମୁଁ ତୁମ୍ଭକୁ କହିବି। ଯେଉଁ ପଶୁକୁ ତୁମ୍ଭେ ଦେଖିଲ, ତାହା ଥିଲା, କିନ୍ତୁ ବର୍ତ୍ତମାନ ନାହିଁ, ଆଉ ପାତାଳରୁ ଉଠି ବିନାଶକୁ ଯିବାକୁ ଉଦ୍ୟତ। ଜଗତର ପତ୍ତନ ସମୟାବଧି ଯେଉଁମାନଙ୍କ ନାମ ଜୀବନ ପୁସ୍ତକରେ ଲିଖିତ ହୋଇ ନାହିଁ, ପୃଥିବୀନିବାସୀ ସେହି ଲୋକମାନେ ସେହି ପଶୁକୁ ଦେଖି ଚମତ୍କୃତ ହେବେ, କାରଣ ତାହା ଥିଲା, ବର୍ତ୍ତମାନ ନାହିଁ, ପୁଣି ଆସିବ।

ଏ ବିଷୟରେ ଜ୍ଞାନଯୁକ୍ତ ମନ ଆବଶ୍ୟକ: ସେହି ସପ୍ତ ମସ୍ତକ ସାତଗୋଟି ପର୍ବତ, ଯାହା ଉପରେ ସେହି ସ୍ତ୍ରୀଲୋକ ବସିଅଛି, ଆଉ ସେଗୁଡ଼ିକ ସାତ ଜଣ ରାଜା। ପାଞ୍ଚ ଜଣ ପତିତ ହୋଇଅଛନ୍ତି, ଜଣେ ଅଛନ୍ତି, ଅନ୍ୟ ଜଣେ ଏପର୍ଯ୍ୟନ୍ତ ଆସି ନାହାନ୍ତି; ଯେତେବେଳେ ସେ ଆସିବେ, ସେତେବେଳେ ତାହାଙ୍କୁ ଅଳ୍ପ ସମୟ ରହିବାକୁ ହେବ। ଆଉ ଯେଉଁ ପଶୁ ଥିଲା ଓ ବର୍ତ୍ତମାନ ନାହିଁ, ସେ ନିଜେ ଅଷ୍ଟମ, ତଥାପି ସେହି ସାତ ଜଣଙ୍କ ମଧ୍ୟରୁ ଜଣେ, ଆଉ ବିନାଶକୁ ଯାଉଅଛି। ତୁମ୍ଭେ ଯେଉଁ ଦଶ ଶୃଙ୍ଗ ଦେଖିଲ, ସେଗୁଡ଼ିକ ଦଶ ଜଣ ରାଜା, ସେମାନେ ଏପର୍ଯ୍ୟନ୍ତ ରାଜ୍ୟ ପ୍ରାପ୍ତ ହୋଇ ନାହାନ୍ତି, କିନ୍ତୁ ସେହି ପଶୁ ସହିତ ଏକ ଘଣ୍ଟା ନିମନ୍ତେ ରାଜା ପରି କ୍ଷମତା ପ୍ରାପ୍ତ ହୁଅନ୍ତି। ଏମାନେ ଏକମନା, ଆଉ ସେମାନେ ଆପଣାମାନଙ୍କ ଶକ୍ତି ଓ କ୍ଷମତା ସେହି ପଶୁକୁ ସମର୍ପଣ କରନ୍ତି।

ସେମାନେ ମେଷଶାବକଙ୍କ ସହିତ ଯୁଦ୍ଧ କରିବେ, ଆଉ ମେଷଶାବକ ସେମାନଙ୍କୁ ପରାସ୍ତ କରିବେ, କାରଣ ସେ ପ୍ରଭୁମାନଙ୍କ ପ୍ରଭୁ ଓ ରାଜାମାନଙ୍କ ରାଜା, ଆଉ ତାହାଙ୍କ ସଙ୍ଗୀମାନେ ଆହୂତ, ମନୋନୀତ ଓ ବିଶ୍ଵସ୍ତ।” ପୁଣି, ଦୂତ ମୋତେ କହିଲେ, “ଯେଉଁ ଜଳରାଶି ତୁମ୍ଭେ ଦେଖିଲ, ଯେଉଁଠାରେ ସେହି ବେଶ୍ୟା ବସିଅଛି, ସେଗୁଡ଼ିକ ଗୋଷ୍ଠୀ, ଜନସମୂହ, ଜାତି ଓ ଭାଷା। ଆଉ ତୁମ୍ଭେ ଯେଉଁ ଦଶ ଶୃଙ୍ଗ ଦେଖିଲ, ସେଗୁଡ଼ିକ ଓ ସେହି ପଶୁ ସେହି ବେଶ୍ୟାକୁ ଘୃଣା କରିବେ। ସେମାନେ ତାହାକୁ ନିର୍ଜନ ଓ ଉଲଙ୍ଗ କରିବେ, ତାହାର ମାଂସ ଭୋଜନ କରିବେ, ଆଉ ତାହାକୁ ଅଗ୍ନିରେ ଦଗ୍ଧ କରିବେ। କାରଣ ଆମ୍ଭମାନଙ୍କ ପିତା ଆପଣା ସଂକଳ୍ପ ସାଧନ କରିବା, ଏକମନା ହେବା ଓ ଆପଣାମାନଙ୍କ ରାଜ୍ୟ ସେହି ପଶୁକୁ ସମର୍ପଣ କରିବା ନିମନ୍ତେ ସେମାନଙ୍କ ହୃଦୟରେ ପ୍ରବୃତ୍ତି ଦେଲେ, ଯେପର୍ଯ୍ୟନ୍ତ ଆମ୍ଭମାନଙ୍କ ପିତାଙ୍କ ବାକ୍ୟ ସଫଳ ନ ହୁଏ। ^a ଆଉ ତୁମ୍ଭେ ଯେଉଁ ସ୍ତ୍ରୀଲୋକକୁ ଦେଖିଲ, ସେ ପୃଥିବୀର ରାଜାମାନଙ୍କ ଉପରେ ରାଜତ୍ୱ କରୁଥିବା ସେହି ମହାନଗରୀ।”