Kutyhilwa Ihenyukazi Elikhulu

Isithunywa sibonisa uYohane umfazi ovethe ingubo emfusa, enxile ligazi lamangqina kaYesu, ekhwele irhamncwa elibomvu. UYohane uyamangaliswa; isithunywa sicacisa iintloko neempondo. Ekugqibeleni irhamncwa nookumkani balo baphethukela kuye, bamtshise, besenza injongo kaBawo wethu.

Isahluko 17.

Sesinye sezithunywa ezisixhenxe ezaziphethe izitya ezisixhenxe seza sathetha nam, sathi: “Yiza, ndikubonise umgwebo welo henyukazi likhulu lihleli phezu kwamanzi amaninzi. Ookumkani bomhlaba benza isono sokurheletya nalo, baza abemi bomhlaba banxila yiwayini yesono salo.” Sandithwala ngoMoya sandisa entlango, apho ndabona khona umfazi ehleli phezu kwerhamncwa elibomvu, elizele ngamagama anyelisa uThixo, elineentloko ezisixhenxe neempondo ezilishumi. Lo mfazi wayambethe ingubo emfusa nebomvu, ehonjiswe ngegolide, namatye anqabileyo, neeperile, ephethe esandleni sakhe indebe yegolide ezele zizinto ezililisikizi nobunqambi besono sakhe sokurheletya. Ebusweni bakhe kwakubhalwe igama eliyimfihlakalo, elithi: “IBhabhilon enkulu, unina wamahenyukazi nowezinto ezililisikizi zomhlaba.”

Ndambona lo mfazi enxile ligazi labangcwele, igazi lamangqina kaYesu. Ndathi ndakumbona, ndamangaliswa kakhulu kunene.

Isithunywa sandibuza, sathi: “Umangaliselani na? Ndiya kukuxelela imfihlakalo yomfazi nerhamncwa elimthweleyo, elineentloko ezisixhenxe neempondo ezilishumi. Irhamncwa olibonileyo belikhona, kodwa alisekho, kananjalo selizakuphuma enzonzobileni, liye entshabalalweni yalo. Baya kumangaliswa abo bemi emhlabeni, abamagama abo angabhalwanga encwadini yobomi kwasekusekweni kwehlabathi, bakulibona irhamncwa belikhona, kodwa lingasekho, noko liya kubuya libekho.

Oku kufuna ingqondo esisilumko: iintloko ezisixhenxe ziintaba ezisixhenxe ahleli phezu kwazo lo mfazi, kananjalo zingookumkani abasixhenxe. Abahlanu bawile, omnye ukhona, omnye akakafiki; wothi xa afikayo, amelwe kukuhlala umzuzwana nje. Irhamncwa ebelikhona, lingasekho, nalo ngokwalo lingowesibhozo, kodwa ngomnye kwabasixhenxe, liya entshabalalweni. Iimpondo ezilishumi obuzibonile zingookumkani abalishumi abangekabufumani ubukumkani, kodwa bamkela igunya njengookumkani ilixa libe linye kunye nerhamncwa. Bona bangqineleneyo ngengqondo enye, baza banikela amandla abo negunya labo kwirhamncwa.

Baya kulwa neMvana, ize iMvana ibeyise, ngokuba iyiNkosi yeenkosi noKumkani wookumkani, kananjalo abo banayo babiziwe banyulwa banyaniseka.” Isithunywa sathi kum: “Amanzi owabonileyo, apho ihleli khona ihenyukazi, zizizwe, nezihlwele, neentlanga, neelwimi. Iimpondo ezilishumi obuzibonile, nerhamncwa, baya kulithiya ihenyukazi. Baya kulishiya lisenkangala lize, badle inyama yalo, balitshise ngomlilo. Kuba uBawo wethu ukufake ezintliziyweni zabo ukuba benze ingqibo yakhe, bangqinelane ngengqondo enye, banikele ubukumkani babo kwirhamncwa, ade azaliseke amazwi kaBawo wethu. ^a Umfazi omboneyo ngumzi omkhulu olawula ookumkani bomhlaba.”