Dangor Beschya ke Dikhai Diya
Ekjon sorgodoot John ke bengoni kapra pindhi thaka ekjon mahila dekhai dise, tai Jisu laga gawah khan laga khun khai kene matal hoi ase, aru ekta lal jontu laga upor te uthi ase. John asurit hoi jaise; sorgodoot pora mur aru seng khan laga motlob koi dise. Hekh te jontu aru tai laga raja khan mahila laga biruddh te ulti kene tai ke jolai dise, aru eneka amar Pitri laga uddesh pura kori dise.
17 1Sat-ta bati loi thaka sat-jon sorgodoth khan laga majot pora ekjon ahhi kene moi logot te koise, “Ahhibi, bisi pani uporte boha dangor beschya uporte aha bisar tu moi tumi ke dikhabo. 2Prithibi laga raja khan tai logot te bebichar kaam korise, aru prithibi te thaka manuh khan tar paap laga draksharos pora matal hoise.” 3Tai pora moi ke Atma te ekta jongol phale loijaise, aru ta te Isor ke ninda kora nam khan pora bhorta thaka ekta ronga janwar uporte boha ekjon maiki ke moi dikhise; hei janwar laga sat-ta matha aru dos-ta seng thakise. 4Hei maiki tu begoni aru ronga kapra pindhise, suna, daam thaka pathor aru moti khan pora saja korise, aru tar hath te ghin thaka jinis khan aru tar bebichar laga letera pora bhorta thaka suna laga kup ekta dhori thakise. 5Tar kopal te ekta nam, ekta lukai thaka kotha, likha thakise, “Dangor Babylon, beschya khan laga aru prithibi laga ghin jinis khan laga ma.”
6Hei maiki tu pobitro manuh khan laga khoon, Jisu laga sakhi khan laga khoon pora matal thaka moi dikhise. Tai ke dikhi kene, moi bisi asurit hoise.
7Sorgodoth pora hudise, “Tumi kele asurit ase? Hei maiki laga aru tai ke loi thaka janwar laga, sat-ta matha aru dos-ta seng thaka hei janwar laga, lukai thaka kotha tu moi tumi ke kobo. 8Tumi dikha janwar tu age te thakise, kintu etiya nai, aru tai niche laga gohin jagah pora ulabo aru tai laga nosto hua phale jabo. Prithibi bona homoi pora jibon laga kitab te kun laga nam likha nai, prithibi te thaka hei manuh khan janwar tu dikhi kene asurit hobo—kilemane tai age te thakise, etiya nai, aru ahhibo.
9Eitu nimite gyaan thaka mon lage: hei sat-ta matha tu maiki boha sat-ta pahar ase, aru eitu khan sat-jon raja bhi ase. 10Pasjon giri jaise, ekjon ase, aru dusra tu etiya tak aha nai; jitia tai ahhibo, tai olop homoi nimite he thakibo lage. 11Aru age te thaka kintu etiya nathaka janwar tu nijor athjon ase, hoilebi hei sat-jon laga majot pora ekjon ase, aru nosto hua phale jai ase. 12Tumi dikha dos-ta seng tu dosjon raja ase, kun etiya tak rajyo pa-a nai, kintu janwar logot te ek ghanta nimite raja hoi kene adhikar pabo. 13Eitu khan ekta mon ase, aru tarkhan laga takot aru adhikar janwar ke di dibo.
14Tarkhan Mer-pura logot te lorai koribo, aru Mer-pura pora tarkhan ke harai dibo, kilemane Tai prabhu khan laga Prabhu aru raja khan laga Raja ase, aru Tar logot te thaka khan mata, basi luwa aru biswasi khan ase.” 15Sorgodoth pora moi ke koise, “Tumi dikha pani, jun jagah te beschya tu boi ase, eitu manuh khan, dangor bhir, desh khan aru bhasa khan ase. 16Tumi dikha dos-ta seng aru janwar tu beschya ke ghin koribo. Tarkhan pora tai ke ujar aru nangta chari dibo, tar gau-mangso khabo, aru tai ke jui pora julai dibo. 17Kilemane amar Pitri pora Tar itcha ke purah koribole, ekta mon te eki hobole, aru tarkhan laga rajyo janwar ke di dibole, tarkhan laga mon te eitu rakhi dise, jitia tak amar Pitri laga kotha khan purah nohobo. a a v17 Janwar laga sewa kora bidrohi raja khan bhi amar Pitri laga itcha ke purah kori ase. Tai pora itihas ke Mer-pura laga jit phale cholai ase. 18Aru tumi dikha hei maiki tu prithibi laga raja khan uporte raj kora dangor sheher tu ase.”