Sorgodoot laga Ghohna
Babylon girise koi kene ghosona hoise, aru ekta awaj pora amar Pitri laga manuh khan ke tai laga bemari khan ahhi bo agete tai pora ulai ahibi koi mate. Raja, bepari aru jahaj chola manuh khan dur pora sai kene dukh kore — tai karone nohoi, kintu tarkhan laga harai jaa bepar karone. Gana-bajana, chaki laga puhor aru biya laga awaj khan ta te hodai nimite khotom hoi jaise.
18 1Eitu laga pichete moi sorgo pora nami aha dusra ekjon sorgodoot ke dikhise, jun logot te dangor adhikar thakise; prithibi tu tar laga mohima pora ujala hoi jaise. 2Tar pora jor pora hala kori koise, “Girise, girise—dangor Babylon! Tai bhoot khan laga ghor hoi jaise, sob letera atma laga thaka jaga, sob letera chiriya laga thaka jaga, sob letera aru ghin kora janwar laga thaka jaga hoi jaise. 3Kilemane sob desh khan tai laga bebichar laga itcha laga draksha-ros khaise; prithibi laga raja khan tai logot te bebichar korise, aru prithibi laga byapari khan tai laga bisi sukh-bhog laga shakti pora dhoni hoise.”
4Tetiya moi sorgo pora dusra ekta awaj hunise, “Moi laga manuh khan, tai bhitor pora ulai ahhibi, titia tumikhan tai laga paap khan te bhag nalobo aru tai laga mara khan nalobo;
5kilemane tai laga paap khan sorgo tak uncha hoi kene joma hoise, aru amar Pitri pora tai laga golti khan monte rakhise. 6Tai nije jineka dise, tineka tai ke wapas dibi, aru tai ki korise eitu nimite tai ke dugun wapas dibi; tai kun kup te milai se, eitu te tai nimite dugun bhag milai dibi. 7Tai nije ke mohima korise aru sukh-bhog te thakise, tineka hi tai ke dukh aru sok laga eke paimana dibi; kilemane tai nije laga mon te koi ase, ‘Moi rani nisina singhason te bohi ase; Moi bidhowa nohoi, aru Moi kitia bhi sok nadikhibo.’ 8Eitu karne tai laga mara khan ek dinte hi ahhibo—mrityu aru sok aru akal—aru tai ke jui pora jolai dibo; kilemane tai ke bisar kora amar Pitri bisi shaktishali ase.”
9Prithibi laga raja khan kun tai logot te bebichar korise aru tai logot te sukh-bhog bhag korise, taikhan tai laga juli thaka laga dhuwa dikhi kene tai nimite kandibo aru hala koribo. 10Tai laga dukh ke bhoi kori kene, dur te khara hoi kene taikhan koi ase, “Hai, hai, dangor sheher, Babylon, shaktishali sheher! Ek ghanta te hi tumar bisar ahhi jaise.” 11Prithibi laga byapari khan tai nimite kandi ase aru dukh kori ase, kilemane kun bhi taikhan laga saman ar nakine. 12Suna, chandi, dami pathor, moti, mihin kapor, begoni rong, resham, lal rong laga saman; sob sugandh thaka kath, hathi-daat laga sob saman, dami kath, pitol, loha, marble pathor. 13Dalchini, masala, dhup, gandharos, loban, draksha-ros, joliton tel, bhal atta, gehu, goru, mer, ghora, gari, aru manuh laga gau-mangso aru atma khan.
14“Tumar atma itcha kora paki juwa phol tumar pora harai jaise; tumar sob dhun aru shobha harai jaise, aru kitia bhi aru nadikhibo.” 15Eitu khan jinis laga byapari khan kun tai pora dhoni hoise, taikhan tai laga dukh ke bhoi kori kene, kandi kene aru dukh kori kene, dur te khara hobo, 16aru hala kori koise, “Sok, sok dangor sheher uporte, kun mihin kapor, begoni rong, aru lal rong pindhi thakise, aru suna, dami pathor, aru moti pora sundor hoi thakise! Ek ghanta te hi eneka dhun khotom hoi jaise.” 17Aru sob jahaj laga captain, samundar te safar kora sob manuh, nabik khan, aru samundar pora jibika kamai kora sob manuh dur te khara hoise, 18aru tai laga juli thaka laga dhuwa dikhi kene hala kori koise, “Dangor sheher nisina kuntu sheher kitia thakise?” 19Taikhan nijor matha te dhuli hali se aru hala kori kene, kandi kene aru dukh kori kene koise, “Hai, hai dangor sheher nimite, jun jaga te samundar te jahaj thaka sob manuh tai laga dhun pora dhoni hoise! Ek ghanta te hi tai khotom hoi jaise.” 20Tai uporte khushi koribi, sorgo, aru tumikhan pobitro manuh khan aru prerit khan aru bhabobadi khan! Kilemane amar Pitri pora tai birodh te tumikhan laga mukadma laga bisar korise.
21Ekjon shaktishali sorgodoot pora dangor chakki pathor nisina ekta pathor samundar te phelai se aru koise, “Eneka kori kene dangor sheher Babylon ke jor pora phelai dibo, aru kitia bhi aru nadikhibo. 22Been bajai thaka aru gana kora khan laga awaj, bashi bajai thaka aru bigul bajai thaka khan laga awaj, tumar bhitor te kitia bhi aru nahunibo. Kuno kaam laga kaarigar tumar bhitor te kitia bhi aru nadikhibo. Chakki laga awaj tumar bhitor te kitia bhi aru nahunibo. 23Saaki laga puhor tumar bhitor te kitia bhi aru najilibo. Dulha aru dulhin laga awaj tumar bhitor te kitia bhi aru nahunibo. Kilemane tumar byapari khan prithibi laga dangor manuh khan thakise, aru sob desh khan tumar jadu-tona pora thogai khaise. 24Tai bhitor te bhabobadi khan aru pobitro manuh khan laga khoon, aru prithibi te morai diya sob manuh laga khoon pai se.”