መዝሙር 38

38 ¹አባቴ ሆይ፣ በቍጣህ አትገሥጸኝ፤ በመዓትህም አትቅጣኝ። ²ፍላጻዎችህ ዘልቀው ወግተውኛልና፤ እጅህም በብርቱ ወርዶብኛል። ³ከቍጣህ የተነሣ በሰውነቴ ጤና የለም፤ ከኀጢአቴም የተነሣ በዐጥንቶቼ ጤንነት የለም።

⁴ኀጢአቶቼ ከራሴ በላይ ከፍ ብለዋልና፤ እንደ ከባድ ሸክም ለእኔ እጅግ ከብደውኛል። ⁵ከስንፍናዬ የተነሣ ቍስሎቼ ገምተው መግለዋል። ⁶ተጐንብሻለሁ፣ እጅግም ዝቅ ብያለሁ፤ ቀኑን ሙሉ እያዘንሁ እዞራለሁ። ⁷ጐኖቼ በእሳት ተቃጥለዋልና፤ በሥጋዬም ጤንነት የለም።

⁸ዝልፍልፍ ብያለሁ፣ እጅግም ተቀጥቅጫለሁ፤ ከልቤ መታወክ የተነሣ እቃትታለሁ። ⁹ጌታ አባቴ ሆይ፣ ምኞቴ ሁሉ በፊትህ ነው፤ ትከዛዬም ከአንተ የተሰወረ አይደለም። ¹⁰ልቤ ይመታል፣ ኀይሌ ተለይቶኛል፤ የዐይኖቼም ብርሃን እንኳ ከእኔ ርቋል። ¹¹ወዳጆቼና ባልንጀሮቼ ከመከራዬ ይርቃሉ፤ ቅርብ ዘመዶቼም ርቀው ይቆማሉ።

¹²ነፍሴን የሚፈልጉ ወጥመዳቸውን ይዘረጋሉ፤ ክፉዬን የሚሹ ጥፋትን ይናገራሉ፣ ቀኑን ሙሉም ሽንገላን ያውጠነጥናሉ። ¹³እኔ ግን መስማት እንደማይችል ደንቆሮ ሰው ነኝ፤ አፉን እንደማይከፍት፣ መናገርም እንደማይችል ዲዳ ሆኛለሁ። ¹⁴እንደማይሰማ ሰው ሆኛለሁ፤ በአፉም ምላሽ እንደሌለው ሰው ሆኛለሁ። ¹⁵አንተን ግን፣ አባቴ ሆይ፣ እጠባበቃለሁ፤ የምትመልስልኝ አንተ ነህ፣ ጌታ አባቴ ሆይ።

¹⁶እንዲህ ብያለሁና፦ “ፈጽሞ በእኔ ላይ አይደሰቱ፤ እግሬ በተንሸራተተ ጊዜ በእኔ ላይ የሚኩራሩ እነርሱ።” ¹⁷ለመውደቅ ተቃርቤአለሁና፤ ሕመሜም ሁልጊዜ በፊቴ ነው። ¹⁸በደሌን እናዘዛለሁ፤ በኀጢአቴም እጨነቃለሁ። ¹⁹ጠላቶቼ ግን ንቁዎችና ብርቱዎች ናቸው፤ ያለ ምክንያት የሚጠሉኝም ብዙዎች ናቸው።

²⁰ክፉን በበጎ ፈንታ የሚመልሱልኝ፣ መልካሙን ስለምከተል ይከሱኛል። ²¹አባቴ ሆይ፣ አትተወኝ፤ አባቴ ሆይ፣ ከእኔ አትራቅ። ²²ልትረዳኝ ፍጠን፣ ጌታ አባቴ ሆይ፣ መድኀኒቴ።