詩篇 38

38 ¹我嘅父啊，求你唔好喺你嘅怒氣中責備我， 亦都唔好喺你嘅烈怒中管教我。 ²因為你嘅箭深深咁射入我身，你嘅手重重咁壓落我身上。 ³因為你嘅怒氣， 我嘅身體冇一處健全；因為我嘅罪， 我嘅骨 頭冇一處安穩。

⁴因為我嘅罪孽高過我個頭；好似沉重嘅擔子咁，重到我承受唔起。 ⁵我嘅傷口發臭潰爛， 都係因為我嘅愚昧。 ⁶我彎腰屈背，垂低咗頭； 成日都喺度哀傷咁行嚟行去。 ⁷因為我嘅腰好似火燒咁，我嘅肌肉冇一處安穩。

⁸我麻木咗，完全被壓碎； 我因為內心嘅煩亂而呻吟。 ⁹至高嘅父啊，我一切嘅渴望都喺 你面前，我嘅嘆息瞞唔過你。 ¹⁰我個心撲撲跳，我嘅力氣都 冇晒；連我眼中嘅光都離開咗我。 ¹¹我嘅朋友同伴因為我嘅災禍而疏遠我， 我至親嘅人都遠遠咁企開。

¹²想害我性命嘅人設下網羅； 想加害我嘅人講盡毀滅嘅說話，成日謀算詭計。 ¹³但係我好似一個聾咗嘅人聽唔到， 好似一個啞咗嘅人唔開口。 ¹⁴我變成好似一個聽唔到嘅人， 口中冇任何回答。 ¹⁵但係，我嘅父啊，我等候你；我至高嘅父啊，就係你必應允我。

¹⁶因為我講：「唔好等佢哋向我 幸災樂禍——就係嗰啲喺我失腳嗰陣向我誇口嘅人。」 ¹⁷因為我快要跌倒， 我嘅痛苦時常喺我面前。 ¹⁸我承認我嘅罪孽； 我為自己嘅罪而憂愁。 ¹⁹但係我嘅仇敵生猛強壯，無緣無故恨我嘅人好多。

²⁰嗰啲以惡報善嘅人， 因為我追求良善而控告我。 ²¹我嘅父啊，求你唔好離棄我；我嘅父啊，求你唔好遠離我。 ²²求你快啲嚟幫助 我，我至高嘅父啊，你係我嘅拯救。