Nauyin Zunubina

Zabura ta Dawuda, don tunawa.

Yana ciwo, raunukansa suna ruɓewa, abokansa sun yashe shi alhali maƙiya suna ƙulla makirci, Dawuda ya danganta yanayinsa ga zunubinsa, ba kuwa zai mayar wa masu zarginsa magana ba. Ya yi shiru kamar kurma, yana jiran Ubansa, shi kaɗai wanda yake sa ran zai amsa.

Babi na 38.

Ya Ubana, kada ka tsawata mini cikin fushinka, kada kuma ka hore ni cikin hasalarka. Gama kibiyoyinka sun kafa mini da zurfi, hannunka kuma ya auka mini da ƙarfi. Babu lafiya a jikina saboda fushinka; babu ƙarfi a ƙasusuwana saboda zunubina.

Gama zunubaina sun hau bisa kaina; kamar kaya mai nauyi, sun yi mini nauyi fiye da ƙarfina. Miyakuna suna wari suna ruɓa saboda wautata. Na tanƙware na kuma sunkuya ƙasa; dukan yini ina zagawa cikin makoki. Gama gefunana suna ƙuna, babu kuma lafiya a naman jikina.

Na shanye na kuma ragargaje ƙwarai; ina nishi saboda tashin hankalin zuciyata. Ya Uba Mai Iko Duka, dukan marmarina yana a gabanka, nishina kuma ba ya ɓoye a gare ka. Zuciyata tana bugawa da ƙarfi, ƙarfina ya rabu da ni; har ma hasken idanuna ya tafi daga gare ni. Abokaina da masu tarayya da ni suna nisanta daga wahalata, danginana na kurkusa kuma sun tsaya da nisa.

Waɗanda suke neman raina sun kafa tarkonsu; waɗanda suke neman cutata suna maganar hallaka suna kuma ƙulla makirci dukan yini. Amma ni kamar kurma ne wanda ba ya ji, kamar wanda ba ya iya magana, wanda kuma ba zai buɗe bakinsa ba. Na zama kamar mutumin da ba ya ji, wanda ba shi da amsa a bakinsa. Amma gare ka, Ya Ubana, nake jira; kai ne za ka amsa, Ya Ubana Mai Iko Duka.

Gama na ce, “Kada su taɓa yin farin ciki a kaina— waɗanda suke taƙama a kaina sa'ad da ƙafata ta yi santsi.” Gama ina gab da fāɗuwa, zafina kuma kullum yana a gabana. Ina furta laifina; zunubina yana damuna. Amma maƙiyana suna da kuzari da ƙarfi, masu ƙina ba dalili kuma suna da yawa.

Waɗanda suke sāka mini mugunta a madadin alheri suna zargina domin ina bin abin da yake nagari. Kada ka yashe ni, Ya Ubana; kada ka yi nisa da ni, Ya Ubana. Ka yi hanzari ka taimake ni, Ya Uba Mai Iko Duka, cetona.