AMahubo 38

38 ¹Awu Baba wami, ungangikhuzi ngentukuthelo yakho, ungangijezisi ngolaka lwakho. ²Ngokuba imicibisholo yakho ingene shi kimi, nesandla sakho sehlele nzima phezu kwami. ³Akukho kuphila emzimbeni wami ngenxa yentukuthelo yakho; akukho kuphelela emathanjeni ami ngenxa yesono sami.

⁴Ngokuba izono zami zikhukhumele phezu kwekhanda lami; njengomthwalo osindayo, zisinda kakhulu kimi. ⁵Izilonda zami ziyanuka ziyavunda ngenxa yobuwula bami. ⁶Ngigobile ngathotshiswa phansi; usuku lonke ngihambahamba ngilila. ⁷Ngokuba izinhlangothi zami zivutha umlilo, akukho kuphelela enyameni yami.

⁸Ngibuthakathaka ngachotshozwa nya; ngiyabubula ngenxa yokuyaluza kwenhliziyo yami. ⁹Awu Baba oyiNkosi, konke ukulangazela kwami kuphambi kwakho, nokububula kwami akufihlakele kuwe. ¹⁰Inhliziyo yami iyagquma, amandla ami ayangiphelela; ngisho nokukhanya kwamehlo ami sekungishiyile. ¹¹Abangani bami nozakwethu bema kude nenhlupheko yami, nezihlobo zami eziseduze zima kude.

¹²Abafuna ukuphila kwami babeka imigibe yabo; abafuna ukungilimaza bakhuluma ngokubhubhisa, bazindla inkohliso usuku lonke. ¹³Kodwa mina nginjengesithulu esingezwa, njengesimungulu esingakhulumi nesingawuvuli umlomo waso. ¹⁴Senginjengomuntu ongezwayo, ongenampendulo emlonyeni wakhe. ¹⁵Kodwa ngilindele wena, Baba wami; nguwe oyakuphendula, Awu Baba wami oyiNkosi.

¹⁶Ngokuba ngathi: “Mabangaze bangiklolodela— labo abazidla ngami lapho unyawo lwami lushelela.” ¹⁷Ngokuba sengiseduze nokuwa, nobuhlungu bami buhlala buphambi kwami. ¹⁸Ngiyalivuma icala lami; ngikhathazekile ngesono sami. ¹⁹Kodwa izitha zami ziphilile zinamandla, baningi abangizonda ngeze.

²⁰Abangibuyisela okubi ngokuhle bayangisola ngokuba ngiphishekela okuhle. ²¹Ungangilahli, Baba wami; ungabi kude nami, Baba wami. ²²Sheshisa ukungisiza, Awu Baba oyiNkosi, nsindiso yami.