Culayska Dembigayga

Sabuur Daa'uud, si loo xusuusto.

Isagoo jirran, nabarradiisu barar leh, saaxiibbadiisna ka tageen halka col-yaduna shirqoolayaan, Daa'uud xaaladiisa wuxuu ku xidhaa dembigiisa, isagoo aan dib ugu hadlin eedeeyayaashiisa. Wuxuu aamusan yahay sida nin dhego la'aan, wuxuuna sugayaa Aabbihiis, kan keliya ee uu filayo inuu jawaabo.

Cutubka 38.

Aabbow, ha i canaanan cadhadaada, hana i edbin xanaaqaaga. Waayo, fallaadhahaagu qoto dheer bay igu dhex galeen, gacantaaduna si xun bay igu soo dhacday. Jidhkayga caafimaad kuma jiro cadhadaada aawadeed; lafahayga fayo-qab kuma jiro dembigayga aawadiis.

Waayo, dembiyadaydu madaxayga way ka sarreeyeen; sida rar cuslaa ayay aad iigu culusyihiin. Nabaradaydu way qudhmuuneen oo way malaxeen doqonnimadayda aawadeed. Waan foororsanahay oo aad baan u hoos dhacay; maalinta oo dhan baan baroor ku socdaa. Waayo, miskahaygu olol baa ku jira, jidhkayguna fayo-qab kuma jiro.

Waan tabar daranahay oo aad baan u burburay; qalbigayga rafaadkiisa aawadiis baan u taahaa. Aabbe Sayidow, hammigayga oo dhan hortaada ayuu yaal, taahiddaydana kuuma qarsoona. Qalbigaygu wuu garaacaa, xooggaygii baa i dayacay; xataa iftiinkii indhahayga ayaa iga tagay. Saaxiibbadayda iyo asxaabtaydu dhibaatadayda way ka fogaadaan, qaraabadayda ugu dhowuna meel fog bay istaagaan.

Kuwa naftayda doondoonaya dabinno bay dhigaan; kuwa waxyeelladayda doonaya halligaad bay ka hadlaan, maalinta oo dhanna khiyaano bay hindisaan. Laakiin anigu waxaan u eg yahay nin dhego la' oo aan maqlayn, sida nin aan hadli karin oo afkiisa aan furi doonin. Waxaan noqday sidii nin aan maqlayn, oo afkiisa jawaab kuma jirto. Laakiin Aabbow, adigaan sugayaa; adigaa jawaabi doona, Aabbe Sayidow.

Waayo, waxaan idhi: “Yaanay weligood igu farxin—kuwa iga faanaa markii cagtaydu simbiriirixato.” Waayo, waan dhowaaday inaan dhaco, xanuunkaygana had iyo jeer hortayda ayuu yaal. Waxaan qirayaa eedkayga; dembigayga aawadiis ayaan ka werwersanahay. Laakiin cadaawayaashaydu waa nool yihiin oo xoog badan, kuwa sabab la'aan i necebna way badan yihiin.

Kuwa wanaagga xumaan iigu abaal-gudaa way i eedeeyaan, waayo, wanaagga baan raacaa. Ha i dayn, Aabbow; meel fog iga ha istaagin, Aabbow. Dhaqso u kaalay inaad i caawiso, Aabbe Sayidow, badbaadadayda.