Kizitu kya Disumu dyama

Mukunga wa Tavidi, mu kubambuka.

Mu bela, phuta zandi zisi bola, wusiswa kwa banduku tangwa bambeni bisi sya mitambu, Tavidi wisi bakula ni phasi yandi yisi tuka mu disumu dyandi meni amana kazonzaku kwena bana bisi mumfunda. Yandi wisi dibata hanga kahuwa amana wisi hingila Tata wandi, wuna yandi hika kasi hingila mvutu kwena yandi.

Kapitulu 38.

A Tata wama, wunkayaku muna khabu zaku, amana wunsongisaku muna khabu zaku. Mukuma phunza zaku zákota ndindi mwena meni, amana koku dyaku dyabwa ngolu hana meni. Mu lutu lwama mweku kimakulu kikuma kya khabu zaku; mu mifufwa myama mweku ngemba kikuma kya disumu dyama.

Mukuma masumu mama máluta ha thandu ya mutu wama; bwosu kizitu kya ngolu, mazitu kuluta meni. Phuta zama zisi bola amana zisi vayikisa nsudi, kikuma kya buzoba bwama. Yivwembami amana yikulumuki hana tsi; kilumbu kyosu yisi zyeta mu khondu. Mukuma luketu lwama lusi lema mbawu, amana mu musuni wama mweku kimakulu.

Yilebakani amana yitolukini lawu; yisi humwakina kikuma kya mvwalangani ya mbundu yama. A Pfumu, Tata wama, nzoluka yama yosu yenina ku thwala yaku, amana kuhumwakina kwama kusi swamanaku kwena ngeyi. Mbundu yama yisi sika ngolu, ngolu zama zisi khonda meni; ata kyeni kya mesu mama kilubuki kwena meni. Banduku bama yi bakwetu bisi telama kuna kyana yi phasi yama, amana biwutu byama bina bifikini bisi telama kuna kyana.

Bana bisi sanda moya wama bisi sya mitambu myawu; bana bisi sanda mbi yama bisi zonza kuzanga amana bisi kasa mafwongu ma bukamvi kilumbu kyosu. Kaasi meni yifwanani yi kahuwa, wuna kalendi yuka, bwosu mutu wukondi zonza, wuna kazibulaku munwa wandi. Yikituki bwosu mutu wukondi yuka, wuna mu munwa wandi mweku mvutu. Kaasi kwena ngeyi, Tata wama, yisi hingila; ngeyi kúmvutula, A Pfumu, Tata wama.

Mukuma meni nzimbudi: «Babikaku kunseva ketibwe—bana bisi ditsikisila ha thandu yama tangwa kulu dyama dyasumuka.» Mukuma meni yilama mu kubwa, amana phasi yama yenina ntangu zoosu ku thwala yama. Yisi funguna ndola yama; yisi yangalakanu kikuma kya disumu dyama. Kaasi bambeni bama bena yi moya amana bena ngolu, amana balawu bana bisi ndenga konda kikuma.

Bana bisi mfuta mbi mu homa ya mamboti bisi mfunda, kikuma yisi landa mamboti. Wunyambulaku, Tata wama; wutelamaku kuna kyana yi meni, Tata wama. Hanga tswatsu mu kunsadisa, A Pfumu, Tata wama, luhulusu lwama.