ኤፌሶን 4

4 ¹እንግዲህ በጌታ እስረኛ የሆንሁ እኔ እለምናችኋለሁ፤ በተጠራችሁበት ጥሪ እንደሚገባ ኑሩ፤ ²በፍጹም ትሕትናና ገርነት፣ በትዕግሥት፣ በፍቅር እርስ በርሳችሁ እየተቻቻላችሁ፤ ³በሰላም ማሰሪያ የመንፈስን አንድነት ለመጠበቅ ትጉ። ⁴አንድ አካል፣ አንድ መንፈስ፤ በጥሪያችሁም ወደ አንድ ተስፋ እንደ ተጠራችሁ ሁሉ። ⁵አንድ ጌታ፣ አንድ እምነት፣ አንድ ጥምቀት፤ ⁶ከሁሉ በላይ የሆነ፣ በሁሉ የሚሠራ፣ በሁሉም የሚኖር የሁሉ አባት አንድ ነው።

⁷ነገር ግን እንደ ክርስቶስ ስጦታ መጠን ለእያንዳንዳችን ጸጋ ተሰጠን። ⁸ስለዚህ እንዲህ ይላል፤ “ወደ ላይ በወጣ ጊዜ ምርኮን ማረከ፤ ለሰዎችም ስጦታ ሰጠ።” ^a a v8 ጳውሎስ ድል አድራጊውን ንጉሥ የሚያከብረውን የድል መዝሙር፣ መዝሙር 68፥18 እየጠቀሰ ነው። ይህንም ክርስቶስ ከሞቱና ከትንሣኤው በኋላ ወደ ሰማይ ማረጉ ላይ ይተገብረዋል።

⁹አሁንም “ወጣ” ማለት ወደ ታችኛው ክፍል ማለትም ወደ ምድር ደግሞ ወረደ ማለት ካልሆነ በቀር ምን ማለት ነው? ¹⁰የወረደው እርሱ ራሱ ሁሉን ነገር እንዲሞላ ከሰማያት ሁሉ እጅግ ከፍ ብሎ የወጣው ነው።

¹¹እርሱም ሐዋርያትን፣ ነቢያትን፣ ወንጌላውያንን፣ እረኞችንና አስተማሪዎችን ሰጠ፤ ¹²ይኸውም ቅዱሳንን ለአገልግሎት ሥራ ለማዘጋጀት፣ የክርስቶስን አካል ለማነጽ ነው፤ ¹³እኛ ሁላችን በእምነትና የአባታችንን ልጅ በማወቅ ወደ አንድነት እስክንደርስ፣ ፍጹም ሰው እስክንሆን፣ ወደ ሙሉ የክርስቶስ ቁመና ልክና ሙላት እስክንደርስ ድረስ ነው። ¹⁴ስለዚህ ከእንግዲህ በማዕበል የሚላጋ፣ በትምህርትም ነፋስ ሁሉ የሚነዳ፣ በሰዎች ተንኰልና ለማሳት በተሞላ ተንኰለኛ ዘዴ የሚወሰድ ሕፃናት አይደለንም። ¹⁵ነገር ግን በፍቅር እውነትን እየተናገርን በነገር ሁሉ ራስ ወደ ሆነው ወደ ክርስቶስ እናድግ። ¹⁶ከእርሱም የተነሣ አካል ሁሉ በሚያግዝ ጅማት ሁሉ ተገጥሞና ተያይዞ፣ እያንዳንዱ ክፍል በአግባቡ ሲሠራ ያድጋል፤ እንዲህም አካሉ ራሱን በፍቅር ያንጻል።

አዲሱን ሰው ልበሱ

¹⁷እንግዲህ ይህን እላለሁ፤ በጌታም እመሰክራለሁ፤ ከእንግዲህ እንደ አሕዛብ በከንቱ አሳባቸው አትኑሩ። ¹⁸በአእምሮአቸው ጨልመዋል፤ በውስጣቸው ባለው ድንቁርናና በልባቸው ድንዳኔ ከአባታችን ሕይወት ተለይተዋል። ¹⁹ስሜታቸውን ሁሉ አጥተው የሥጋን ምኞት ለመፈጸም ራሳቸውን አሳልፈው ሰጡ፤ በስስትም ርኩሰትን ሁሉ ያደርጋሉ። ²⁰እናንተ ግን ክርስቶስን እንዲህ አልተማራችሁም፤ ²¹በእውነት ስለ እርሱ ሰምታችሁ በእርሱም ተምራችሁ እንደ ሆነ፣ እውነት በኢየሱስ እንዳለ፤ ²²ከቀድሞ አኗኗራችሁ ጋር የተያያዘውን፣ በአታላይ ምኞትም የተበላሸውን አሮጌውን ሰው አውልቁ፤ ²³በአእምሮአችሁም መንፈስ ታደሱ፤ ²⁴በእውነተኛ ጽድቅና ቅድስናም እንደ አባታችን የተፈጠረውን አዲሱን ሰው ልበሱ።

²⁵ስለዚህ ውሸትን አስወግዱ፤ እያንዳንዳችሁ ከባልንጀራችሁ ጋር እውነትን ተነጋገሩ፤ እርስ በርሳችን የአንድ አካል ብልቶች ነንና። ²⁶ተቆጡ፤ ነገር ግን ኀጢአት አትሥሩ፤ በቁጣችሁ ላይ ፀሓይ አይግባ፤ ²⁷ለዲያብሎስም ፈንታ አትስጡ። ²⁸ሌባው ከእንግዲህ አይስረቅ፤ ነገር ግን ለችግረኛው የሚያካፍለው እንዲኖረው መልካም እየሠራ በገዛ እጆቹ ልፋት ይሥራ። ²⁹ለሰሚዎች ጸጋን ይሰጥ ዘንድ፣ እንደ ጊዜው ሁኔታ ሌሎችን ለማነጽ የሚጠቅመውን እንጂ ምንም የበሰበሰ ቃል ከአፋችሁ አይውጣ። ³⁰ለቤዛነት ቀን ያተማችሁን የአባታችንን መንፈስ ቅዱስ አታሳዝኑ። ³¹መራርነትን ሁሉ፣ ቍጣን፣ ንዴትን፣ ጩኸትንና ስድብን ከክፋት ሁሉ ጋር ከእናንተ አስወግዱ። ³²እርስ በርሳችሁ ቸሮችና ርኅሩኆች ሁኑ፤ አባታችን በክርስቶስ ይቅር እንዳላችሁ፣ እናንተም እርስ በርሳችሁ ይቅር ተባባሉ።