ఎఫెసీయులకు 4

4 ¹కాబట్టి, ప్రభువునందు ఖైదీనైన నేను మిమ్మును బతిమాలుకొనుచున్నాను: మీరు పిలువబడిన పిలుపునకు తగినట్టుగా నడుచుకోండి, ²సంపూర్ణ వినయముతోను సాత్వికముతోను, దీర్ఘశాంతముతోను, ప్రేమతో ఒకరినొకరు సహించుకొనుచు, ³సమాధానమను బంధమునందు ఆత్మ ఐక్యతను కాపాడుటకు ఆసక్తి కలిగియుండండి. ⁴ఒకే శరీరము, ఒకే ఆత్మ; అలాగే మీ పిలుపుతో కూడివచ్చిన ఒకే నిరీక్షణకు మీరు పిలువబడితిరి. ⁵ఒకే ప్రభువు, ఒకే విశ్వాసము, ఒకే బాప్తిస్మము, ⁶అందరికి ఒకే తండ్రి, ఆయన అందరిపైన, అందరిద్వారా, అందరిలో ఉన్నవాడు.

⁷అయితే క్రీస్తు కృపావరము యొక్క కొలత చొప్పున మనలో ప్రతివారికి కృప అనుగ్రహింపబడెను. ⁸కాబట్టి ఇలా చెప్పబడియున్నది, "ఆయన ఉన్నతమునకు ఆరోహణమై, బందీలను చెరగా కొనిపోయి, మనుష్యులకు వరములను అనుగ్రహించెను." ^a a v8 పౌలు కీర్తన 68:18ను ఉదాహరించుచున్నాడు; అది జయించు రాజును కీర్తించు విజయ కీర్తన. దానిని ఆయన క్రీస్తు మరణ పునరుత్థానముల తరువాత ఆరోహణమునకు అన్వయించుచున్నాడు.

⁹ఇప్పుడు "ఆయన ఆరోహణమయ్యెను"—ఆయన భూమి అను క్రింది భాగములకు అవరోహణమయ్యెననుటే తప్ప, దానికి అర్థమేమి? ¹⁰అవరోహణమైనవాడే సమస్తమును నింపునట్లు ఆకాశములన్నిటికిని ఎంతో పైగా ఆరోహణమైనవాడు.

¹¹మరియు ఆయన కొందరిని అపొస్తలులుగాను, కొందరిని ప్రవక్తలుగాను, కొందరిని సువార్తికులుగాను, కొందరిని కాపరులుగాను, బోధకులుగాను అనుగ్రహించెను, ¹²పరిశుద్ధులను పరిచర్య పనికి సిద్ధపరచుటకును, క్రీస్తు శరీరమును కట్టుటకును ఆయన ఈలాగు అనుగ్రహించెను, ¹³మనమందరము విశ్వాసమునందును, మన తండ్రి కుమారుని జ్ఞానమునందును ఐక్యతకు చేరి, పరిపక్వమైన పురుషులమగునట్లు, క్రీస్తు పరిపూర్ణతా స్వరూపముయొక్క సంపూర్ణ కొలతకు ఎదుగునట్లు ఆయన అనుగ్రహించెను. ¹⁴కావున మనము ఇకమీదట శిశువులమై యుండము; మనుష్యుల మోసముచేతను, వంచనకు దారితీయు కుటిల యుక్తులచేతను, ప్రతి బోధనావాయువుచేతను ఎగిరిపడు కెరటములవలె ఇటు అటు కొట్టుకొనిపోము. ¹⁵అందుకు బదులుగా, ప్రేమతో సత్యమును పలుకుచు, శిరస్సైన క్రీస్తునందు అన్ని విషయములలో మనము ఎదుగుదము. ¹⁶ఆయననుండి సమస్త శరీరము, ప్రతి ఆధార కీలముచేత సంధింపబడి సంఘటితమై, ప్రతి అవయవము తగినట్టుగా పనిచేయుచుండగా ఎదుగుచు, ప్రేమతో తన్నుతానే కట్టుకొనుచున్నది.

క్రొత్త స్వభావమును ధరించుకోండి

¹⁷కావున ఇది చెప్పి ప్రభువునందు సాక్ష్యమిచ్చుచున్నాను: మీరు ఇకమీదట అన్యజనులవలె వారి ఆలోచన వ్యర్థతలో జీవింపకుడి. ¹⁸వారి బుద్ధి అంధకారమయమైయున్నది; వారిలోని అజ్ఞానమువలనను, వారి కఠినహృదయమువలనను వారు మన తండ్రి జీవమునకు దూరస్థులైయున్నారు. ¹⁹వారు సమస్త భావమును కోల్పోయి, తమను తాము శరీరకామమునకు అప్పగించుకొని, అత్యాశతో ప్రతి అపవిత్రతను చేయుచున్నారు. ²⁰అయితే మీరు క్రీస్తును నేర్చుకొనిన విధమిది కాదు, ²¹యేసునందు సత్యమున్నట్టుగా, మీరు నిజముగా ఆయననుగూర్చి విని ఆయనయందు బోధింపబడితిరేని, ²²మీ పూర్వ నడవడికకు సంబంధించి, మోసకరమైన దురాశలచేత చెడిపోవుచున్న మీ పాత స్వభావమును విడిచిపెట్టి, ²³మీ మనస్సుల ఆత్మయందు నూతనపరచబడి, ²⁴మన తండ్రిని పోలి యథార్థమైన నీతియందును, పరిశుద్ధతయందును సృజింపబడిన క్రొత్త స్వభావమును ధరించుకొనవలెను.

²⁵కావున అబద్ధమును విడిచిపెట్టి—మీలో ప్రతివాడు తన పొరుగువానితో సత్యమునే మాటలాడవలెను, ఏలయనగా మనము ఒకరికొకరము అవయవములమైయున్నాము. ²⁶కోపపడుడి గాని పాపము చేయకుడి; సూర్యుడు అస్తమించువరకు మీ కోపము నిలువనీయకుడి, ²⁷అపవాదికి అవకాశమియ్యకుడి. ²⁸దొంగిలువాడు ఇకమీదట దొంగిలింపక మానవలెను; అందుకు బదులుగా, అవసరతలో ఉన్నవానికి పంచిపెట్టుటకు తనయొద్ద ఏదైనను ఉండునట్లు, తన చేతులతో మంచి పనిచేయుచు కష్టపడవలెను. ²⁹మీ నోటనుండి ఏ చెడ్డ మాటయు రానీయకుడి; సమయోచితముగా ఇతరులను ఎదిగించునదియు, వినువారికి కృపను కలిగించునదియు మాత్రమే పలుకుడి. ³⁰విమోచన దినమునకై మిమ్మును ముద్రించిన, మన తండ్రి పరిశుద్ధాత్మను దుఃఖపరచకుడి. ³¹సమస్త ద్వేషమును, ఆగ్రహమును, కోపమును, కేకలను, దూషణను, సకల దుష్టత్వముతోకూడ మీలోనుండి తొలగించుకొనుడి. ³²ఒకరియెడల ఒకరు దయగలవారును, మృదుహృదయులును అయియుండి, మన తండ్రి క్రీస్తుద్వారా మిమ్మును క్షమించినట్టుగా, మీరును ఒకరినొకరు క్షమించుకొనుడి.