Ephesianao 4

4 ¹Chiwui vang eina Proholi phātop zangkasā ina nathumli kapona: nathumli hokakhui kaho chiwui khangaruma mirin ringlu, ²khangahui saikora kala malungkhanim eina, ja̱khami eina, leikashi eina akha eina akhali phungruma, ³chingri kahaiwui kateokhamāngli Manglāwui khokkha chi maina khavai sangaida. ⁴Nathumwui kahowui eina rā kachihān akha chili nathumli hokakhui kahai athishurda, phasā akhamānga, Manglā akhamānga. ⁵Proho akha, shitkasang akha, ra̱hik akha, ⁶saikorawuitungli, saikorawui hupta kala saikora saikorali khalei, saikora khalattawui Avā akhamānga.

⁷Kha ithum kachiva̱li Khristawui lemmetwui ngarakkhami athishurda lukhamashan mihai. ⁸Chiwui vang eina hānga, "Kajuili kāda, ana narkahaibingli tukthuida, mibingli lemmet mi." ^a a v8 Paulna Psalm 68:18 chi hāngkhui, hi rai yuikapangkhame awunga masot mikapemi laa akhana. Ana hili Khristawui kathi kala ringlui khangasakwui thili awui kazingram kāhaiwui pongli sāmi.

⁹Ara "ana kā" da kahāng hi khiwui kakhalatkhala? Ana ngalei, azingshongwui apamli katāhai kahai chi maningla khangatei maleimana. ¹⁰Katā kahai a china, ot saikorali pem ngasak khavai, kazingram saikorawuitungli lāngda kāhai a chi khamina.

¹¹Kala ana paokazatbing, marānbing, paokaphā hākashokbing, kala misayonkabing eina ojābing mi; ¹²katharabingli otram khangatha̱wui otsakwui vang shaksā khavai, Khristawui phasā reisang khavai, ¹³ithum saikorana shitkasang kala ithumwui Avāwui Naomayarawui theikakhui alungli khokkha samphangda, khararnao matuiakha sāda, Khristawui phasā kala khangachāwui ngarakkhami peichaohaida samphangranglakha eina tangda. ¹⁴Chiwui vang eina ithum, tara̱ khangaphaona chotchānghaida, miwui mareimarā eina kala mangui ngasak khavai phākakhaning khangarān eina tamkachithei masi kachiva̱na phanung-phanvāda khalei angangnao maningluimana. ¹⁵Chi mahutli, leikashi lungli khamashung tui khamatuida, apong saikorali akho khalei Khrista ali machukta rarphalungra. ¹⁶Awui eina phasā khavāt chi, ngachonmi khara̱ kachiva̱ eina ngarumsangda pānkhui, akai kachiva̱na khangaruma otsak sāda rar ngasaka, chithākha phasā chi leikashi lungli khalatta reisangkhui ngasaka.

Khalatta Kadhar Chi Phorsanglu

¹⁷Chiwui vang eina ina hi hāngda, Proholi shākhi mi: nathum Gentilebing thada athumwui ningphaninwui makānkhanāli ara eina maokthuialu. ¹⁸Athumwui theishingkakhui tangmangra, athum alungli matheithangkhameiwui vang kala athumwui wuklung mararwui vang, ithumwui Avāwui kharingwui eina midhar thāngasakhaowa. ¹⁹Khamayon saikora horhaida, athum khalatta phasāwui ningkachāng ungshung khavai mihaoda, mikhanam eina makathar katonga sāzata. ²⁰Kha nathumna Khrista tamkhui chi chithā maningmana, ²¹nathumna awui pongli shāda kala ali tamkhuihaiakha, Jishuli khamashung khalei athishurda, ²²kachama mirin ningkachāngli khalaphaida kala kachipat ningkachāng eina makhavai nathumwui kachama miyur chi raihaida, ²³kala nathumwui ningwui manglāli dharngasakchingda, ²⁴kala khamashung khangarong kala katharwui alungli ithumwui Avā thada sākhui kasā miyur chi sanglu.

²⁵Chieina kakapik horhaolu. Nathum kachiva̱na akhawui khongnainaoli khamashung tui matuiranu, kaja ithum akha eina akhawui phasākaisera. ²⁶Malungvātlala morei masaalu; nathumwui malungvāt peida ngashun matungngasakalu, ²⁷kala chipeeli atam kachā mamialu. ²⁸Khale china malee horhairanu; chiwui mahutli akhalattawui pāng eina kaphā ot panglāk eina sāranu, chithākha khavātabingli sakrum khavai khikha leiphalungra. ²⁹Nathumwui khamor eina shaikahai tui khipālikha mathuiranu, kha kateili khar khavai ngachona, atamli khangaruma tui maningla, chithākha khanganābingli lukhamashan mira. ³⁰Nathumli ngatangkhamiwui zimikshowui vang mahor namkahai, ithumwui Avāwui Manglā Kathara chi machot ngasakalu. ³¹Kakhāmāng saikora, malungkhavāt, khamathang, kavao, kala mashāt tui chi, makaphā ningphanin saikora eina ngasoda horhaiphalungra. ³²Akha eina akha kaphā leishi ngarokta, lumashanthei ngarokta, Khristawui mangā eina ithumwui Avāna nathumli pheokhami athishurda, akha eina akha pheomi ngaroklu.