ብቕዓት ፀውዓኹም ተመላለሱ

ሓድነት ማዕረ ምዃን ኣይኮነን፦ ሓደ ጐይታን ሓደ ኣቦን ኣሎ፥ ውህበታት ግና ይፈላለ፥ መራሕቲ ድማ ኣብ ክንዲ ባዕልቶም ስራሕ ዝሰርሑ ንዅሉ ምእንቲ ኽዳልዉ ኣለዉ። ምዕባይ ማለት ድሕሪ ደጊም ብማዕበል ዘይምንቅጥቃጥ እዩ። ሽዑ ኣዚዮም ልሙዳት ትእዛዛት፦ ሓቂ ተዛረብ፥ ስራሕ፥ ንኣፍካ ሓሉ።

ምዕራፍ 4።

እምበኣር ኣነ፥ እቲ ብጐይታ እሱር፥ በቲ እተፀዋዕኩምሉ ፀውዓ ብቕዓት ዘለዎ ኽትመላለሱ እምዕደኩም ኣለኹ፥ ብዅሉ ትሕትናን ለውሃትን፥ ብትዕግስትን፥ ብፍቕሪ ንሓድሕድኩም እናተፃወርኩም፥ ነቲ ሓድነት መንፈስ ብማእሰር ሰላም ንምሕላው ጽዓሩ። ሓደ ስጋ ኣሎ፥ ሓደ መንፈስ ድማ ኣሎ፤ ከምኡውን ናብቲ ብፀውዓኹም ዝመፅእ ሓደ ተስፋ ተፀዊዕኩም ኢኹም። ሓደ ጐይታ፥ ሓደ እምነት፥ ሓደ ጥምቀት፥ ሓደ ኣቦ ዅሉ ድማ ኣሎ፤ ንሱ ኣብ ልዕሊ ዅሉ፥ ብዅሉን ኣብ ኵሉን ዘሎ እዩ።

ንነፍሲ ወከፍና ግና፥ ከም መጠን ውህበት ክርስቶስ፥ ፀጋ ተውሃበ። ስለዙይ ከምዙይ ይብል፦ “ናብ ላዕሊ ደይቡ፥ ንምሩኻት ማረኾም፥ ንሰብ ድማ ውህበታት ሃቦም።” ^a

ሕዚ፥ እዝ “ደየበ” ዝብል፥ ናብ ታሕተዎት ክፍሊ ምድሪ ድማ ከም ዝወረደ እንተ ዘይኮይኑ፥ እንታይ ማለት እዩ? እቲ ዝወረደ፥ ንሱ እቲ ንዅሉ ምእንቲ ኽመልእ፥ ኣብ ልዕሊ ዅሎም ሰማያት ናብ ላዕሊ ዝደየበ እዩ።

ንሱ ድማ ነቶም ሃዋርያት፥ ነቶም ነብያት፥ ነቶም ወንጌላውያን፥ ነቶም ጓሶትን መምህራንን ሃበ፥ ንቕዱሳን ንስራሕ ኣገልግሎት ንምድላው፥ ስጋ ክርስቶስ ድማ ንምህናፅ፥ ኵላትና ኣብ ሓድነት እምነትን ኣብ ፍልጠት ወዲ ኣቦናን፥ ናብ ፍፁም ሰብ፥ ናብ ምሉእ መጠን ቑመትን ምልኣትን ክርስቶስ ክሳዕ እንበፅሕ እዩ። ስለዙይ ድሕሪ ደጊም ሕፃናት ኣይኮናን፤ ብማዕበል እናተነቓነቕና፥ ብተንኰል ሰብን ንምትላል ብዝሕሰብ ጕርሕን ዝመፅእ ዅሉ ንፋስ ትምህርቲ እናተፀዓድናን ኣይኮናን። ደኣ እምበር፥ ብፍቕሪ ሓቂ እናተዛረብና፥ ኣብ ኵሉ ነገር ናብቲ ርእሲ ዝኾነ ክርስቶስ ንዕበ። ካብኡ እቲ ብምሉኡ ስጋ፥ በቲ ዝድግፍ ኵሉ መላግቦ ተጋጢሙን ተኣሳሲሩን፥ ነፍሲ ወከፍ ኣካል ከም ግቡእ እናሰርሐ፥ ነቲ ስጋ ባዕሉ ብፍቕሪ ንምህናፅ ይዓቢ።

ነቲ ሓድሽ ሰብ ልበሱ

ስለዙይ እዙይ እብል ኣለኹ፥ ብጐይታ ድማ እምስክር ኣለኹ፦ ድሕሪ ደጊም ከምቶም ኣህዛብ፥ ብኸንቱ ሓሳቦም ኣይትንበሩ። ብምስትውዓሎም ፀልሚቶም፥ በቲ ኣብኣቶም ዘሎ ድንቁርናን ብትሪ ልቦምን፥ ካብ ህይወት ኣቦና ተፈልዮም ኣለዉ። ኵሉ ስምዒት ስኢኖም፥ ብስስዐ ኵሉ ዓይነት ርኽሰት ንምፍፃም፥ ንፍትወት ስጋ ባዕልቶም ኣሕሊፎም ሃቡ። ንስኻትኩም ግና ንክርስቶስ ከምዙይ ኢልኩም ኣይተማሃርኩምዎን፥ ብዛዕባኡ ሰሚዕኹም እንተ ኔርኩም፥ ከምቲ ሓቂ ኣብ ኢየሱስ ዘሎ ድማ ብእኡ ተማሂርኩም እንተ ኔርኩም፥ ነቲ ምስ ናይ ቀደም ኣነባብራኹም ዝተኣሳሰረ፥ ብምትላል ትምኒት ዝበላሸወ ኣረጊት ሰብኩም ከተውፅእዎ፥ ብመንፈስ ኣእምሮኹም ድማ ክትሕደሱ፥ ነቲ ብሓቀኛ ፅድቅን ቅድስናን ከም ኣቦና ዝተፈጥረ ሓድሽ ሰብ ድማ ክትለብሱ።

ስለዙይ ሓሰት ኣርሕቑ፤ ነፍሲ ወከፍኩም ምስ ብፃዩ ሓቂ ይዛረብ፤ ኣካላት ንሓድሕድና ኢና እሞ። ተቘጥዑ፥ ሓጢኣት ግና ኣይትግበሩ፤ ፀሓይ ኣብ ልዕሊ ቍጥዓኹም ኣይትዕረብ፤ ንድያብሎስ ድማ ዕድል ኣይትሃብዎ። እቲ ሰራቒ ድሕሪ ደጊም ኣይስረቕ፤ ደኣ እምበር፥ ነቲ ፅጉም ዝህቦ ምእንቲ ኽህልዎ፥ ብገዛእ ኣእዳዉ ሰናይ ነገር እናገበረ ይፅዓር። ንሰማዕቲ ፀጋ ምእንቲ ኽህብ፥ ከም ኣድላይነቱ ንምህናፅ ዝጠቅም እምበር፥ ዝኾነ ክፉእ ቃል ካብ ኣፍኩም ኣይውፃእ። ነቲ ንመዓልቲ ቤዛ ዝሓተመኩም መንፈስ ቅዱስ ኣቦና ኣይተሕዝኑ። ኵሉ መሪርነትን ነድርን ቍጥዓን ጫውጫውታን ፅርፈትን፥ ምስ ኵሉ እከይ ካባኻትኩም ይርሓቕ። ከምቲ ኣቦና ብክርስቶስ ይቕረ ዝበለኩም፥ ንሓድሕድኩም ለዋሃትን ርህሩሃትን ኩኑ፥ ንሓድሕድኩም ድማ ይቕረ ተበሃሃሉ።