Waefeso 4

4 ¹Basi mimi, mfungwa katika Bwana, nawasihi: enendeni kwa kustahili wito ambao mliitwa nao, ²kwa unyenyekevu wote na upole, kwa uvumilivu, mkichukuliana katika upendo, ³mkijitahidi kuulinda umoja wa Roho katika kifungo cha amani. ⁴Mwili mmoja, na Roho mmoja, kama vile mlivyoitwa katika tumaini moja lililo la wito wenu. ⁵Bwana mmoja, imani moja, ubatizo mmoja, ⁶Baba mmoja wa wote, aliye juu ya wote na katika wote na ndani ya wote.

⁷Lakini kila mmoja wetu alipewa neema kwa kadiri ya kipimo cha kipawa cha Kristo. ⁸Kwa hiyo yasema, "Alipopaa juu, aliteka mateka, akawapa watu vipawa." ^a a v8 Paulo ananukuu Zaburi 68:18, zaburi ya ushindi inayomsherehekea mfalme mshindi. Anaitumia kwa kupaa kwa Kristo baada ya kifo chake na ufufuo wake.

⁹Basi neno hili "alipaa"—lina maana gani, isipokuwa ya kwamba yeye pia alishuka mpaka pande za chini, yaani nchi? ¹⁰Yeye aliyeshuka ndiye yeye yule aliyepaa juu sana kupita mbingu zote, ili apate kuvijaza vitu vyote.

¹¹Naye aliwatoa mitume, na manabii, na wainjilisti, na wachungaji na waalimu, ¹²kwa kusudi la kuwakamilisha watakatifu kwa kazi ya huduma, kwa kuujenga mwili wa Kristo, ¹³hata sote tutakapoufikia umoja wa imani na kumjua Mwana wa Baba yetu, kufikia utu uliokomaa, kwa kadiri ya kimo cha utimilifu wa Kristo. ¹⁴Ili tusiwe tena watoto wachanga, tukitupwa huku na huku na mawimbi na kuchukuliwa na kila upepo wa mafundisho, kwa hila za watu, kwa ujanja wa kupanga njama za kudanganya. ¹⁵Bali, tukiinena kweli katika upendo, na tukue kwa njia zote katika yeye aliye kichwa, yaani Kristo. ¹⁶Ambaye kutoka kwake mwili wote, ukiungamanishwa na kushikamanishwa pamoja kwa kila kiungo kisaidiacho, hukua kadiri kila kiungo kifanyapo kazi yake ipasavyo, hivyo mwili hujijenga wenyewe katika upendo.

Jivikeni Utu Mpya

¹⁷Basi nasema hili, tena nashuhudia katika Bwana: msiishi tena kama Mataifa waishivyo, katika ubatili wa fikira zao. ¹⁸Wakiwa wametiwa giza katika akili zao, wamefarikishwa na uzima wa Baba yetu kwa sababu ya ujinga uliomo ndani yao na ugumu wa mioyo yao. ¹⁹Wakiisha kupoteza hisia zote, walijitia katika kufuata tamaa za mwili, wakizitenda kila aina ya uchafu kwa pupa. ²⁰Bali ninyi hamkujifunza Kristo hivyo, ²¹ikiwa kweli mlisikia habari zake na kufundishwa katika yeye, kama kweli ilivyo katika Yesu, ²²kwamba mvue utu wenu wa kale, ulioshikamana na mwenendo wenu wa zamani, unaoharibiwa kwa tamaa danganyifu, ²³na kufanywa upya katika roho ya nia zenu, ²⁴na kujivika utu mpya, ulioumbwa kwa mfano wa Baba yetu katika haki ya kweli na utakatifu.

²⁵Kwa hiyo wekeni mbali uongo—kila mmoja wenu na aseme kweli na jirani yake, kwa maana tu viungo, kila mmoja kiungo cha mwenzake. ²⁶Mkikasirika, msitende dhambi; jua lisichwe mkiwa bado mmeghadhibika, ²⁷wala msimpe Ibilisi nafasi. ²⁸Mwibaji asiibe tena; bali afanye juhudi kwa mikono yake mwenyewe akitenda mema, apate kuwa na kitu cha kumgawia mhitaji. ²⁹Neno lo lote lililooza lisitoke kinywani mwenu, bali lile lifaalo kuwakuza wengine, kama linavyohitajiwa wakati huo, ili liwape neema wasikiao. ³⁰Wala msimhuzunishe Roho Mtakatifu wa Baba yetu, ambaye kwa yeye mlitiwa muhuri hata siku ya ukombozi. ³¹Uchungu wote na ghadhabu na hasira na makelele na matukano yaondoke kwenu, pamoja na kila namna ya nia mbaya. ³²Iweni wafadhili ninyi kwa ninyi, wenye huruma, mkasameheane, kama vile Baba yetu alivyowasamehe ninyi katika Kristo.