ನಿಮ್ಮ ಕರೆಗೆ ಯೋಗ್ಯವಾಗಿ ನಡೆಯಿರಿ

ಐಕ್ಯತೆ ಎಂದರೆ ಎಲ್ಲರೂ ಒಂದೇ ರೀತಿ ಇರುವುದಲ್ಲ — ಒಬ್ಬನೇ ಕರ್ತನು, ಒಬ್ಬನೇ ತಂದೆ, ಆದರೆ ವರಗಳು ಬೇರೆಬೇರೆ; ನಾಯಕರು ಇರುವುದು ಎಲ್ಲರ ಕೆಲಸವನ್ನು ತಾವೇ ಮಾಡಲು ಅಲ್ಲ, ಉಳಿದವರೆಲ್ಲರನ್ನು ಸಜ್ಜುಗೊಳಿಸಲು. ಬೆಳೆಯುವುದು ಎಂದರೆ ಇನ್ನು ಮುಂದೆ ಅತ್ತಿತ್ತ ಹಾರಿಹೋಗದಿರುವುದು. ಆಮೇಲೆ ತೀರಾ ಸಾಮಾನ್ಯ ಸೂಚನೆಗಳು: ಸತ್ಯವನ್ನೇ ಹೇಳು, ದುಡಿ, ನಿನ್ನ ಬಾಯನ್ನು ಕಾಯ್ದುಕೋ.

ಅಧ್ಯಾಯ 4.

ಆದ್ದರಿಂದ ಪ್ರಭುವಿನಲ್ಲಿ ಸೆರೆಯವನಾದ ನಾನು ನಿಮ್ಮನ್ನು ಬೇಡಿಕೊಳ್ಳುತ್ತೇನೆ: ನೀವು ಕರೆಯಲ್ಪಟ್ಟ ಕರೆಗೆ ಯೋಗ್ಯವಾಗಿ ನಡೆಯಿರಿ, ಸಂಪೂರ್ಣ ದೀನತೆಯಿಂದಲೂ ಸೌಮ್ಯತೆಯಿಂದಲೂ ದೀರ್ಘಶಾಂತಿಯಿಂದಲೂ ಪ್ರೀತಿಯಲ್ಲಿ ಒಬ್ಬರನ್ನೊಬ್ಬರು ಸಹಿಸಿಕೊಳ್ಳುತ್ತಾ, ಸಮಾಧಾನದ ಬಂಧದಲ್ಲಿ ಆತ್ಮನ ಐಕ್ಯತೆಯನ್ನು ಕಾಪಾಡಿಕೊಳ್ಳಲು ಆಸಕ್ತರಾಗಿರಿ. ನಿಮ್ಮ ಕರೆಯೊಂದಿಗೆ ಬರುವ ಒಂದೇ ನಿರೀಕ್ಷೆಗೆ ನೀವು ಕರೆಯಲ್ಪಟ್ಟಂತೆಯೇ, ಶರೀರ ಒಂದೇ, ಆತ್ಮ ಒಬ್ಬರೇ. ಪ್ರಭು ಒಬ್ಬರೇ, ನಂಬಿಕೆ ಒಂದೇ, ದೀಕ್ಷಾಸ್ನಾನ ಒಂದೇ, ಎಲ್ಲರ ಮೇಲೆಯೂ ಎಲ್ಲರ ಮೂಲಕವೂ ಎಲ್ಲರಲ್ಲಿಯೂ ಇರುವ ಎಲ್ಲರ ತಂದೆ ಒಬ್ಬರೇ.

ಆದರೆ ಕ್ರಿಸ್ತನ ವರದ ಅಳತೆಗೆ ಅನುಸಾರವಾಗಿ ನಮ್ಮಲ್ಲಿ ಪ್ರತಿಯೊಬ್ಬರಿಗೂ ಕೃಪೆಯು ಕೊಡಲ್ಪಟ್ಟಿತು. ಆದ್ದರಿಂದ, “ಉನ್ನತಕ್ಕೆ ಏರಿ, ಅವರು ಸೆರೆಯವರನ್ನು ಸೆರೆಹಿಡಿದು ಜನರಿಗೆ ವರಗಳನ್ನು ಕೊಟ್ಟರು,” ಎಂದು ಹೇಳಿದೆ. ^a

ಈಗ “ಅವರು ಏರಿದರು” ಎಂಬುದು—ಅವರು ಕೆಳಗಿನ ಭಾಗಗಳಿಗೆ, ಅಂದರೆ ಭೂಮಿಗೆ, ಇಳಿದರು ಎಂಬುದಲ್ಲದೆ ಬೇರೇನು ಅರ್ಥ? ಸಮಸ್ತವನ್ನೂ ತುಂಬಿಸುವಂತೆ, ಇಳಿದವರೇ ಎಲ್ಲಾ ಆಕಾಶಗಳಿಗಿಂತಲೂ ಬಹು ಉನ್ನತಕ್ಕೆ ಏರಿದವರು ಸಹ ಆಗಿದ್ದಾರೆ.

ಮತ್ತು ಅವರು ಅಪೊಸ್ತಲರನ್ನೂ ಪ್ರವಾದಿಗಳನ್ನೂ ಸುವಾರ್ತಿಕರನ್ನೂ ಸಭಾಪಾಲಕರನ್ನೂ ಬೋಧಕರನ್ನೂ ಕೊಟ್ಟರು, ಪರಿಶುದ್ಧರನ್ನು ಸೇವೆಯ ಕಾರ್ಯಕ್ಕಾಗಿ ಸನ್ನದ್ಧಗೊಳಿಸಲು, ಕ್ರಿಸ್ತನ ಶರೀರವನ್ನು ಕಟ್ಟಲು, ನಾವೆಲ್ಲರೂ ನಂಬಿಕೆಯಲ್ಲಿಯೂ ನಮ್ಮ ತಂದೆಯ ಪುತ್ರನ ಜ್ಞಾನದಲ್ಲಿಯೂ ಐಕ್ಯತೆಯನ್ನು ಹೊಂದಿ, ಪ್ರೌಢ ವ್ಯಕ್ತಿಯಾಗಿ, ಕ್ರಿಸ್ತನ ಪ್ರಮಾಣದ ಮತ್ತು ಪೂರ್ಣತೆಯ ಸಂಪೂರ್ಣ ಅಳತೆಗೆ ತಲುಪುವ ತನಕ. ಹೀಗೆ ನಾವು ಇನ್ನು ಮೇಲೆ ಕೂಸುಗಳಾಗಿರದೆ, ಅಲೆಗಳಿಂದ ಅತ್ತಿತ್ತ ನೂಕಲ್ಪಟ್ಟು, ಪ್ರತಿಯೊಂದು ಬೋಧನೆಯ ಗಾಳಿಯಿಂದಲೂ, ಮನುಷ್ಯರ ಮೋಸದಿಂದಲೂ, ವಂಚಿಸಲು ಹೂಡುವ ಕುತಂತ್ರದಿಂದಲೂ ಒಯ್ಯಲ್ಪಡುವವರಾಗಿರುವುದಿಲ್ಲ. ಬದಲಾಗಿ, ಪ್ರೀತಿಯಲ್ಲಿ ಸತ್ಯವನ್ನು ಮಾತನಾಡುತ್ತಾ, ತಲೆಯಾಗಿರುವ ಕ್ರಿಸ್ತನಲ್ಲಿ ಎಲ್ಲಾ ವಿಧದಲ್ಲಿಯೂ ನಾವು ಬೆಳೆಯೋಣ. ಅವರಿಂದಲೇ ಇಡೀ ಶರೀರವು, ಆಧಾರ ಕೊಡುವ ಪ್ರತಿಯೊಂದು ಕೀಲಿನಿಂದ ಜೋಡಿಸಲ್ಪಟ್ಟು ಒಟ್ಟಾಗಿ ಹಿಡಿದಿಟ್ಟಿರುವಾಗ, ಪ್ರತಿಯೊಂದು ಭಾಗವೂ ಸರಿಯಾಗಿ ಕೆಲಸಮಾಡುತ್ತಿದ್ದಂತೆ ಬೆಳೆಯುತ್ತದೆ; ಹೀಗೆ ಶರೀರವು ಪ್ರೀತಿಯಲ್ಲಿ ತನ್ನನ್ನು ತಾನೇ ಕಟ್ಟಿಕೊಳ್ಳುತ್ತದೆ.

ಹೊಸ ಸ್ವಭಾವವನ್ನು ಧರಿಸಿಕೊಳ್ಳಿ

ಆದ್ದರಿಂದ ನಾನು ಇದನ್ನು ಹೇಳುತ್ತೇನೆ, ಪ್ರಭುವಿನಲ್ಲಿ ಸಾಕ್ಷಿ ಹೇಳುತ್ತೇನೆ: ಅನ್ಯಜನರಂತೆ, ಅವರ ಆಲೋಚನೆಯ ವ್ಯರ್ಥತೆಯಲ್ಲಿ ಇನ್ನು ಮೇಲೆ ಜೀವಿಸಬೇಡಿ. ಅವರ ಬುದ್ಧಿಯಲ್ಲಿ ಕತ್ತಲೆ ಕವಿದವರಾಗಿ, ಅವರಲ್ಲಿರುವ ಅಜ್ಞಾನದಿಂದಲೂ ಅವರ ಕಠಿಣ ಹೃದಯಗಳಿಂದಲೂ ನಮ್ಮ ತಂದೆಯ ಜೀವದಿಂದ ದೂರವಾದವರಾಗಿದ್ದಾರೆ. ಎಲ್ಲಾ ಭಾವನೆಯನ್ನು ಕಳೆದುಕೊಂಡವರಾಗಿ, ಅವರು ಶಾರೀರಿಕ ಆಶೆಯನ್ನು ತೃಪ್ತಿಪಡಿಸಿಕೊಳ್ಳಲು ತಮ್ಮನ್ನು ಒಪ್ಪಿಸಿಕೊಟ್ಟು, ದುರಾಶೆಯಿಂದ ಪ್ರತಿಯೊಂದು ಅಶುದ್ಧತೆಯನ್ನೂ ಆಚರಿಸುತ್ತಾರೆ. ಆದರೆ ನೀವು ಕ್ರಿಸ್ತನನ್ನು ಕಲಿತದ್ದು ಈ ರೀತಿಯಾಗಿ ಅಲ್ಲ. ಯೇಸುವಿನಲ್ಲಿ ಸತ್ಯ ಇರುವಂತೆ, ನೀವು ನಿಜವಾಗಿಯೂ ಅವರ ವಿಷಯವನ್ನು ಕೇಳಿ, ಅವರಲ್ಲಿ ಬೋಧಿಸಲ್ಪಟ್ಟಿದ್ದೀರಾದರೆ, ನಿಮ್ಮ ಹಿಂದಿನ ಜೀವನಕ್ರಮಕ್ಕೆ ಸಂಬಂಧಿಸಿದ ಮತ್ತು ಮೋಸಕರ ಆಶೆಗಳಿಂದ ಕೆಟ್ಟುಹೋದ ನಿಮ್ಮ ಹಳೆಯ ಸ್ವಭಾವವನ್ನು ತೆಗೆದುಹಾಕಿ, ನಿಮ್ಮ ಮನಸ್ಸಿನ ಆತ್ಮದಲ್ಲಿ ನೂತನರಾಗಿರಿ, ಸತ್ಯವಾದ ನ್ಯಾಯನೀತಿಯಲ್ಲಿಯೂ ಪರಿಶುದ್ಧತೆಯಲ್ಲಿಯೂ ನಮ್ಮ ತಂದೆಯಂತೆ ಸೃಷ್ಟಿಸಲ್ಪಟ್ಟ ಹೊಸ ಸ್ವಭಾವವನ್ನು ಧರಿಸಿಕೊಳ್ಳಿ.

ಆದ್ದರಿಂದ ಸುಳ್ಳನ್ನು ತೆಗೆದುಹಾಕಿ—ನಿಮ್ಮಲ್ಲಿ ಪ್ರತಿಯೊಬ್ಬನೂ ತನ್ನ ನೆರೆಯವನ ಸಂಗಡ ಸತ್ಯವನ್ನು ಮಾತನಾಡಲಿ, ಏಕೆಂದರೆ ನಾವು ಒಬ್ಬರಿಗೊಬ್ಬರು ಅಂಗಗಳಾಗಿದ್ದೇವೆ. ಕೋಪಗೊಳ್ಳಿ, ಆದರೆ ಪಾಪಮಾಡಬೇಡಿ; ನಿಮ್ಮ ಕೋಪದ ಮೇಲೆ ಸೂರ್ಯನು ಮುಳುಗದಿರಲಿ, ಸೈತಾನನಿಗೆ ಅವಕಾಶವನ್ನು ಕೊಡಬೇಡಿ. ಕಳ್ಳನು ಕದಿಯುವುದನ್ನು ಬಿಡಬೇಕು; ಬದಲಾಗಿ, ಕೊರತೆಯಲ್ಲಿರುವವರೊಂದಿಗೆ ಹಂಚಿಕೊಳ್ಳಲು ಏನಾದರೂ ಇರುವಂತೆ, ತನ್ನ ಸ್ವಂತ ಕೈಗಳಿಂದ ಒಳ್ಳೆಯದನ್ನು ಮಾಡುತ್ತಾ ಕಷ್ಟಪಟ್ಟು ದುಡಿಯಲಿ. ಯಾವ ಕೆಟ್ಟ ಮಾತೂ ನಿಮ್ಮ ಬಾಯಿಂದ ಹೊರಡದಿರಲಿ, ಕೇಳುವವರಿಗೆ ಕೃಪೆಯನ್ನು ಉಂಟುಮಾಡುವಂತೆ, ಸಂದರ್ಭಕ್ಕೆ ತಕ್ಕದಾಗಿ, ಬೇರೆಯವರು ಬೆಳೆಯಲು ಸಹಾಯಕವಾದದ್ದೇ ಹೊರಡಲಿ. ವಿಮೋಚನೆಯ ದಿನಕ್ಕಾಗಿ ನಿಮ್ಮನ್ನು ಮುದ್ರಿಸಿದ ನಮ್ಮ ತಂದೆಯ ಪವಿತ್ರಾತ್ಮನನ್ನು ದುಃಖಪಡಿಸಬೇಡಿ. ಎಲ್ಲಾ ಕಹಿಯನ್ನೂ ರೋಷವನ್ನೂ ಕೋಪವನ್ನೂ ಕೂಗಾಟವನ್ನೂ ದೂಷಣೆಯನ್ನೂ ಎಲ್ಲಾ ದ್ವೇಷದೊಂದಿಗೆ ನಿಮ್ಮಿಂದ ತೆಗೆದುಹಾಕಿ. ನಮ್ಮ ತಂದೆ ಕ್ರಿಸ್ತನ ಮೂಲಕ ನಿಮ್ಮನ್ನು ಕ್ಷಮಿಸಿದಂತೆಯೇ, ಒಬ್ಬರಿಗೊಬ್ಬರು ದಯೆಯುಳ್ಳವರಾಗಿ, ಕೋಮಲ ಹೃದಯವುಳ್ಳವರಾಗಿ, ಒಬ್ಬರನ್ನೊಬ್ಬರು ಕ್ಷಮಿಸಿರಿ.