Efesu 4 FHB Father's Heart Bible™

4 ¹Buna meni, mutu wa boloku mwena Pfumu, yiluheki kikesa: dyatilenu bwa bufwani yi lutedulu luna bálutela benu, ²mu kudikulumuna kwosu yi lembami, mu sipha dya mbundu, lwaditambwasaka benu yi benu mu lungongu, ³lwasandaka mu kusimbidila kikhunda kya Kitembu mu zita dya ngemba. ⁴Lutu lumosi, Kitembu kimosi, bwosu lwáteduka mu kivuvu kimosi kina kyisa yi lutedulu lwenu. ⁵Pfumu wumosi, lukwikilu lumosi, mbotika yimosi, ⁶Tata wumosi wa boosu, wuna wenina hana thandu ya boosu, mu boosu yi mwena boosu.

⁷Kaasi kwena kosu mutu wa betu, báhana khenda bwosu bwenina kitesu kya kabu dya Kidisitu. ⁸Yihana ni, Masonuku masi zonza: «Bwosu kátombuka kuna zilu, wákwata bakwa boloku, wáhana makabu kwena batu.» ^a a v8 Pholu wubati tanga Nkunga 68:18, nkunga wa ndungunu wuna wisi sakumuna kyamvu wa ndungunu. Yandi wubati sadila mambu mana mu kutombuka kwa Kidisitu kunima dya lufwa lwandi yi lufutumuku lwandi.

⁹Buthwena «wátombuka»—biki disongidila, yuka ni ka wákulunga phi kuna bitini bya ha tsi? ¹⁰Wuna wákulunga, yandi kwandi wuna wátombuka kuna thandu ya mazilu moosu, hanga kabasisa bima byosu.

¹¹Amana wáhana bathumwa, bambikudi, basamuni ba Musamu wa Bukheti, badisa yi balongi, ¹²hanga kayidika bakwikidi ba Nzambi kikuma kya kisalu, kikuma kya kutunga lutu lwa Kidisitu, ¹³yi kuna twalunga boosu mu kikhunda mu lukwikilu yi mu nzayilu ya Mwana wa Tata wetu, mu kukituka mbuta walunga, yi kuna kitesu kyálunga kya malutu yi kuvula kwa Kidisitu. ¹⁴Buna tukalaku kedi bana bakhunda, bana bisi hungudima kwena makaka, amana kosu pfunzi ya dilongi yisi banata, mu mayedi mambi ma batu, mu nduka za mbi za kuhuna. ¹⁵Kaasi, mu kuzonza kyedika mu lungongu, tukodenu mu mambu moosu mwena yandi wuna wenina mutwa, Kidisitu. ¹⁶Tuka kwena yandi, lutu lwosu, luna lusi dikwatila ha kimosi muna misuni myosu, lwisi kola bwosu kosu kitini kisi sala bwa bufwani, hanga lutu luditunga lwa lwama mu lungongu.

Vwatenu Mutu wa Pha

¹⁷Buna, yiluzimbwadini mambu mama, amana yibati tila kimbangi mwena Pfumu: lukalaku kedi hanga baphani, mu mambu ma phamba ma thinu za bawu. ¹⁸Thini za bawu zenina mu phipha, bana badikatula yi luzingu lwa Tata wetu, mukuma kya kukonda mazaya kuna kwenina mwena bawu yi mbundu za bawu zazitama. ¹⁹Bana bakonda kuyuka mu mbundu za bawu, bawu bádihana mu kusephidisa tsambu za lutu, mu lukusu, bisi sala mambu ma mvindu moosu. ²⁰Kaasi, ka bwabuna ku lwálonguka Kidisitu, ²¹Yuka ni bwa kyedika lwáyuka misamu myandi amana bálulonga mwena yandi, bwosu kyedika kyenina mwena Yesu, ²²ndangu lulosa mutu wenu wa khulu, wuna wenina mu kikalulu kyenu kya khulu amana wusumukini mu tsambu za luvunu, ²³amana ndangu lwakituka ba pha mu kitembu kya thini zenu, ²⁴amana ndangu luvwata mutu wa pha, wuna wáhangama bwosu Tata wetu, mu masonga ma kyedika yi mu kutoma.

²⁵Buna, losenu luvunu—kosu mutu wa benu kazonza kyedika yi mukwandi, mukuma betu thwenina bitini bya mukwetu yi bakwetu. ²⁶Fungenu khabu kaasi lusalaku masumu; ntangu yibwaku bwosu lwenina kedi mu khabu zenu, ²⁷amana luhanaku phila kwena kiphidi-mutu. ²⁸Mwifi kayambula kuyiba; kaasi, kasala kisalu kya ngolu mu moku mandi meni mu kusala mboti, hanga kakala yi kima kya kukabisa kwena mutu wa mupfunu. ²⁹Ndinga ya bola yitukaku mu munwa wenu, kaka mana masi tunga bakwenu, mana mafwani yi tangwa, hanga mahana khenda kwena babana bisi yuka. ³⁰Lukwadisaku Kitembu Kyatoma kya Tata wetu, wuna wálunamika kidimbu kikuma kya kilumbu kya luhulusu. ³¹Losenu khadi yosu, bumbisi, khabu, kuboka, yi ngusi, hakimosi yi khu yosu. ³²Kalenu batu ba buweti benu yi benu, batu ba mbundu ya kyadi, lwadiyambwasakana benu yi benu, bwosu buna Tata wetu káluyambula mu Kidisitu.