Mga Efeso 4

4 ¹Kaya't ako, bilanggo sa Panginoon, ay nakikiusap sa inyo: mamuhay kayo nang karapat-dapat sa pagkakatawag na iginawad sa inyo, ²nang may buong pagpapakumbaba at kaamuan, nang may pagtitiyaga, na nagpapaubaya sa isa't isa sa pag-ibig, ³na masigasig na ingatan ang pagkakaisa ng Espiritu sa pamamagitan ng buklod ng kapayapaan. ⁴Isang katawan, isang Espiritu, gaya rin ng pagkakatawag sa inyo tungo sa isang pag-asa na kaakibat ng inyong pagkakatawag. ⁵Isang Panginoon, isang pananampalataya, isang bautismo, ⁶isang Ama ng lahat, na siyang nasa lahat at sumasalahat at nasa loob ng lahat.

⁷Ngunit sa bawat isa sa atin ay ipinagkaloob ang biyaya ayon sa sukat ng kaloob ni Cristo. ⁸Kaya't sinasabi nito, “Sa pag-akyat niya sa kaitaasan, binihag niya ang mga bihag at nagbigay siya ng mga kaloob sa mga tao.” ^a a v8 Sinisipi ni Pablo ang Awit 68:18, isang awit ng tagumpay na nagpupuri sa isang haring mananakop. Iniuugnay niya ito sa pag-akyat ni Cristo matapos ang kanyang kamatayan at muling pagkabuhay.

⁹Ngayon, ang “umakyat siya”—ano ang ibig sabihin nito, kundi na siya rin ay bumaba sa mga kailaliman, ang lupa? ¹⁰Ang bumaba ay siya ring umakyat nang higit na mataas kaysa sa lahat ng kalangitan, upang mapuspos niya ang lahat ng bagay.

¹¹At ibinigay niya ang mga apostol, ang mga propeta, ang mga ebanghelista, ang mga pastol at mga guro, ¹²upang ihanda ang mga banal para sa gawain ng ministeryo, para sa ikatitibay ng katawan ni Cristo, ¹³hanggang sa mkamit nating lahat ang pagkakaisa sa pananampalataya at pagkakilala sa Anak ng ating Ama, tungo sa isang ganap na tao, sa buong sukat ng tayog at kapuspusan ni Cristo. ¹⁴Kaya't hindi na tayo mga sanggol, na inuuga ng mga alon at tinatangay ng bawat hangin ng aral, ng pandaraya ng tao, ng tusong pakana upang manlinlang. ¹⁵Sa halip, sa pagsasalita ng katotohanan sa pag-ibig, lumago nawa tayo sa lahat ng paraan tungo sa kanya na siyang ulo, si Cristo. ¹⁶Mula sa kanya, ang buong katawan, na pinagbuklod at pinagsama-sama ng bawat kasukasuan na tumatangkilik dito, ay lumalago habang gumagana nang wasto ang bawat bahagi, upang itong katawan ay magpatibay sa sarili sa pag-ibig.

Isuot ang Bagong Pagkatao

¹⁷Kaya't sinasabi ko ito, at nagpapatotoo sa Panginoon: huwag na kayong mamuhay tulad ng mga Hentil, sa kawalang-saysay ng kanilang pag-iisip. ¹⁸Nagdilim ang kanilang pang-unawa, nahiwalay sa buhay ng ating Ama dahil sa kamangmangang nasa kanila at sa katigasan ng kanilang mga puso. ¹⁹Palibhasa'y nawalan na ng anumang pakiramdam, ibinigay nila ang kanilang sarili sa pagpapasasa sa mga pita ng laman, na sakim na ginagawa ang bawat karumihan. ²⁰Ngunit hindi ganyan ang inyong natutuhan kay Cristo, ²¹kung tunay ngang narinig ninyo ang tungkol sa kanya at tinuruan sa kanya, tulad ng katotohanang nasa kay Jesus, ²²na hubarin ang inyong dating pagkatao, na nakatali sa inyong dating pamumuhay at nasira ng mapanlinlang na mga pita, ²³at mabago sa espiritu ng inyong mga isipan, ²⁴at isuot ang bagong pagkatao, na nilikhang katulad ng ating Ama sa tunay na katuwiran at kabanalan.

²⁵Kaya't iwaksi ang pagsisinungaling—bawat isa sa inyo ay magsalita ng katotohanan sa kanyang kapwa, sapagkat tayo'y mga bahagi ng isa't isa. ²⁶Magalit kayo ngunit huwag magkasala; huwag hayaang lumubog ang araw na kayo'y galit pa, ²⁷at huwag bigyan ng pagkakataon ang diyablo. ²⁸Ang magnanakaw ay dapat nang tumigil sa pagnanakaw; sa halip, magpagal siya nang husto sa pamamagitan ng sariling mga kamay sa paggawa ng mabuti, upang may maibahagi siya sa nangangailangan. ²⁹Huwag hayaang may bulok na salita na lumabas sa inyong bibig, kundi ang tumutulong lamang sa iba upang lumago, na angkop sa pagkakataon, upang magbigay ito ng biyaya sa mga nakikinig. ³⁰Huwag ninyong pighatiin ang Espiritu Santo ng ating Ama, na nagtatak sa inyo para sa araw ng katubusan. ³¹Alisin ninyo ang lahat ng pait, poot, galit, sigawan, at paninirang-puri, kasama ang lahat ng masamang hangarin. ³²Maging mabait kayo sa isa't isa, may pusong mahabagin, na nagpapatawad sa isa't isa, gaya ng pagpapatawad sa inyo ng ating Ama sa pamamagitan ni Cristo.