Efesu 4

4 ¹Nítorí náà, èmi, ẹni tí í ṣe ẹlẹ́wọ̀n nínú Olúwa, ń bẹ̀ yín pé: ẹ rìn gẹ́gẹ́ bí ó ṣe yẹ fún ìpè tí a fi pè yín, ²pẹ̀lú gbogbo ìrẹ̀lẹ̀ àti ìwà tútù, pẹ̀lú sùúrù, tí ẹ ń faradà ara yín lẹ́nì kìíní-kejì nínú ìfẹ́, ³tí ẹ ń làkàkà láti pa ìṣọ̀kan Ẹ̀mí mọ́ nínú ìdè àlàáfíà. ⁴Ara kan, Ẹ̀mí kan, gẹ́gẹ́ bí a ti pè yín sí ìrètí kan tí ó wà pẹ̀lú ìpè yín. ⁵Olúwa kan, ìgbàgbọ́ kan, ìtẹ̀bọmi kan, ⁶Baba kan ṣoṣo ti gbogbo, ẹni tí ó borí gbogbo, tí ó sì ń ṣiṣẹ́ nípasẹ̀ gbogbo, tí ó sì ń bẹ nínú gbogbo.

⁷Ṣùgbọ́n a fún olúkúlùkù wa ní oore-ọ̀fẹ́ gẹ́gẹ́ bí ìwọ̀n ẹ̀bùn Kristi. ⁸Nítorí náà ni ó ṣe wí pé, “Nígbà tí ó gòkè lọ sí ibi gíga, ó kó ìgbèkùn ní ìgbèkùn, ó sì fi àwọn ẹ̀bùn fún àwọn ènìyàn.” ^a a v8 Paulu ń fa ọ̀rọ̀ yọ nínú Sáàmù 68:18, orin ì́ṣẹ́gun tí ń ṣe ayẹ̀yẹ ọba kan tí ń ṣẹ́gun. Ó fi í wé ìgòkè Kristi lọ sí ọ̀run lẹ́yìn ikú àti àjíǹde rẹ̀.

⁹Nísinsin yìí “ó gòkè lọ”—kí ni èyí túmọ̀ sí, bí kò ṣe pé ó tún sọ̀kalẹ̀ lọ sí àwọn apá ìsàlẹ̀, ilẹ̀ ayé? ¹⁰Ẹni tí ó sọ̀kalẹ̀ náà ni ẹni kan náà tí ó gòkè lọ ga ju gbogbo ọ̀run lọ, kí ó lè kún ohun gbogbo.

¹¹Ó sì fi àwọn aposteli, àwọn wòlíì, àwọn ajíhìnrere, àwọn olùṣọ́-àgùntàn àti àwọn olùkọ́ fúnni, ¹²láti pèsè àwọn ènìyàn mímọ́ sílẹ̀ fún iṣẹ́ ìránṣẹ́, fún gbígbé ara Kristi ró, ¹³títí àwa gbogbo yóò fi dé ìṣọ̀kan nínú ìgbàgbọ́ àti ìmọ̀ Ọmọ Baba wa, tí a ó fi di àgbàlagbà tí ó pé, dé ẹ̀kúnrẹ́rẹ́ ìwọ̀n gíga àti ẹ̀kúnrẹ́rẹ́ Kristi. ¹⁴Nítorí náà àwa kì í ṣe ọmọ ọwọ́ mọ́, tí ìgbì omi ń gbá kiri, tí gbogbo ẹ̀fúùfù ẹ̀kọ́ ń gbé kiri, nípasẹ̀ ẹ̀tàn ènìyàn, nípasẹ̀ àrékérekè ọgbọ́n búburú láti tannijẹ. ¹⁵Kàkà bẹ́ẹ̀, bí a ti ń sọ òtítọ́ nínú ìfẹ́, ẹ jẹ́ kí a dàgbà ní ọ̀nà gbogbo sínú rẹ̀, ẹni tí í ṣe orí, Kristi. ¹⁶Láti ọ̀dọ̀ ẹni tí gbogbo ara, tí a kó papọ̀ tí a sì so papọ̀ nípasẹ̀ gbogbo iṣan tí ń ṣe àtìlẹ́yìn, ń dàgbà bí ẹyà kọ̀ọ̀kan ti ń ṣiṣẹ́ dáradára, tó bẹ́ẹ̀ tí ara fi ń gbé ara rẹ̀ ró nínú ìfẹ́.

Ẹ Gbé Ẹni Tuntun Náà Wọ̀

¹⁷Nítorí náà mo wí èyí, mo sì jẹ́rìí nínú Olúwa pé: ẹ má ṣe gbé ayé mọ́ bí àwọn Kèfèrí, nínú asán èrò wọn. ¹⁸Òye wọn ṣókùnkùn, wọ́n ya kúrò nínú ìyè Baba wa nítorí àìmọ̀kan tí ń bẹ nínú wọn àti líle ọkàn wọn. ¹⁹Nígbà tí wọ́n ti pàdánù gbogbo ìmọ̀lára, wọ́n fi ara wọn fún ṣíṣe ìfẹ́kúfẹ̀ẹ́ ara, wọ́n ń fi ìwọra ṣe gbogbo ìwà àìmọ́. ²⁰Ṣùgbọ́n kì í ṣe bẹ́ẹ̀ ni ẹ ṣe kọ́ Kristi, ²¹bí ó bá jẹ́ pé nítòótọ́ ẹ gbọ́ nípa rẹ̀, tí a sì kọ́ yín nínú rẹ̀, gẹ́gẹ́ bí òtítọ́ ti wà nínú Jesu, ²²láti bọ́ ẹni àtijọ́ yín sílẹ̀, tí ó so mọ́ ọ̀nà ìgbésí ayé yín àtẹ̀yìnwá, tí àwọn ìfẹ́kúfẹ̀ẹ́ ẹ̀tàn sì ti bà jẹ́, ²³àti láti di títúnṣe nínú ẹ̀mí èrò inú yín, ²⁴àti láti gbé ẹni tuntun náà wọ̀, tí a dá gẹ́gẹ́ bí Baba wa nínú òdodo tòótọ́ àti ìwà mímọ́.

²⁵Nítorí náà ẹ gbé irọ́ pípa kúrò—kí olúkúlùkù yín sọ òtítọ́ fún aládùúgbò rẹ̀, nítorí ẹ̀yà ara ara wa ni àwa jẹ́. ²⁶Ẹ bínú, ẹ má sì ṣẹ̀; ẹ má ṣe jẹ́ kí oòrùn wọ̀ lórí ìbínú yín, ²⁷ẹ má sì ṣe fi ààyè fún èṣù. ²⁸Kí olè dẹ́kun jíjalè; kàkà bẹ́ẹ̀, kí ó máa fi ọwọ́ ara rẹ̀ ṣiṣẹ́ kára láti ṣe rere, kí ó lè ní nǹkan láti pín fún aláìní. ²⁹Ẹ má ṣe jẹ́ kí ọ̀rọ̀ ìbàjẹ́ kankan jáde ní ẹnu yín, bí kò ṣe èyí tí ó ń ran àwọn ẹlòmíràn lọ́wọ́ láti dàgbà, tí ó yẹ fún àsìkò náà, kí ó lè fún àwọn olùgbọ́ ní oore-ọ̀fẹ́. ³⁰Ẹ má ṣe bá Ẹ̀mí Mímọ́ Baba wa nínú jẹ́, ẹni tí ó fi èdìdì dì yín dè fún ọjọ́ ìràpadà. ³¹Ẹ mú gbogbo ìkorò, ìbínú gbígbóná, ìrunú, igbe ariwo, àti ọ̀rọ̀ ẹ̀gàn kúrò lọ́dọ̀ yín, pẹ̀lú gbogbo ọkàn búburú. ³²Ẹ máa ṣoore sí ara yín, kí ẹ ní ọkàn tútù, tí ẹ ń dárí ji ara yín, gẹ́gẹ́ bí Baba wa ti dárí jì yín nípasẹ̀ Kristi.