Opanda ko uu ole Nyoljin King'uurok
Ma iyanet ko uu agenginaata—Kiptaiyat agenge ak Kwanda agenge, ago teerchigei kagoochinoik, ak mi kondoik si kochopchi piik alak, ma koyachigei icheek poisyet. Etunatet ko koma koek chii ne itubaruuk ko uu usoonet. Yeityo ng'atuutik che chaamgei: omwa imanda, opoisye, ak oriib kutinwekwok.
4 1Nooto anyun anee, ne aa chiito ne ki kirate eng' Kiptaiyat, asoomok: opanda ko uu ole nyoljin king'uurok, 2eng' ming'inatet tugul ak talasyet, eng' muitaet, omuiyanigei age ak age eng' chamyet, 3ochobchigei oriip agengeetap Kabuuset eng' rateetap kaalyeet. 4Poorto agenge, ak Kabuuset agenge, ko uu king'uurokyin eng' mang'unet agenge ne mi king'uurok. 5Kiptaiyat agenge, iyanet agenge, kabatisanet agenge, 6Kwanda agenge ne po tugul, ne pou tugul ak kobun tugul ak eng' tugul.
7Ago ki kigoochi echeek chii age tugul myeeindo ko uu keemetap kagoochinetap Kristo. 8Nooto anyun le, “Kingo togosta barak, koluul luulenik, ak kogoochi piik kagoochinoik.” a a v8 Weeksei Paulo Tyenwogik 68:18, tyeni ne po luulet ne boiboiyei laitoryat ne luuli. Indochi ineendet togostaetap Kristo ye kagobek ak kogong'etyin eng' meet.
9Nguno “kagotogosta”—egu nee niito, kobatee kole ki choorgei kora komosta ne rektoot, ng'wony? 10Ineendet ne ki choorgei ko ineendet age ne ki togosta barak kosiir kipsengutik tugul, si konyiitechi tuguuk tugul.
11Ak ki kogoochi che kiyooktoi, ak maotik, ak che amdoi logoiywek che myach, ak riibiik ak kaneetik, 12si kochopchi piik che tiliileen poisyetap minik, agobo teechetap poortap Kristo, 13agoi keit echeek tugul agenge eng' iyanet ak kaguiyet ne po Weeriitap Kwandanyo, koek chii ne matubaruuk, kot koit keemetap etunatetap Kristo ak nyiennyi. 14Si ma kego kigeek kora lagok che reryei, che kiwiirchi peek che mildogei ak kiibei usoonet age tugul ne po kaneetiset, eng' kaberberisyetap piik, eng' ng'aalseet ne ya ne kicheeng' kaberberisyet. 15Ago, kemwae iman eng' chamyet, keteech eng' tuguuk tugul kot keit ineendet ne metit, ko Kristo. 16Ne punu ineendet poorto komugul, ne kinamnyo koek agenge eng' makeek tugul che tonone, koeeti ko uu ye poisyei kebeberta age tugul komyee, si koteekyigei poorto ineegei eng' chamyet.
Olany Chiito ne Leel
17Nooto anyun amwae ni, ak apoorunjin eng' Kiptaiyat: ometegei kora omenye ko uu Pororyosyek, eng' tangoitatap kabwaatutikwak. 18Ki katuuit eng' kaguiyetwak, ki katabaananegei ak saboondap Kwandanyo amu ma ng'enet ne mi icheek ak ng'weenatap mugulelwekwak. 19Kingo baat naanateet komugul, ki pogaakyigei magutigap poorto, koyaei murwoonindo age tugul eng' sogornateet. 20Ago ma ko uu nooto ole king'eeti Kristo, 21ngot imaniman ki ogas agobo ineendet, ak king'eetyi eng' ineendet, ko uu ye mi iman eng' Jeso, 22si olos chiito ne po tai, ne kinamgei ak atebosyekwok che po tai, che ki kong'emak eng' maguutik che berberei, 23ak koweegunak eng' kabuusetap kabwaatutikwok, 24ak olany chiito ne leel, ne ki kitoi ko uu Kwandanyo eng' imanda ak tiliilindo che iman.
25Nooto anyun oorech lembech—imwae chii age tugul eng' okweek iman ak chiitap kokwennyi, amu kego partik, chii age ak age. 26Onereech ago omoyai tengekto; matigochi asiista korekto eng' angeeng'wong', 27ak omakogochi Setani poroindo. 28Chiito ne choorei kobakach choornateet; ago ipoisyen kimnateet eunekyik koyai ne myee, si kobiit kotinyei kiy ne keipchini ne nyalilda. 29Matimong' ng'olyoot ne ya eng' kutuuk, ago ko ne toreti alak si koeet, ne nyoljin sait, si kogoochi myeeindo che kigase. 30Omoaragenchi Kabuuset ne Tiliil ne po Kwandanyo, ne king'oochook agobo peetuutap katyaget. 31Oreegu kobun okweek tuguuk tugul che ululyot, ak nyitatet, ak angeet, ak polateet, ak ichaamatet, kobooto malik tugul. 32Oegu che karaaran age ak age, che tenden, onyochinigei kaat age ak age, ko uu ye konyochin okweek kaat Kwandanyo eng' Kristo.