Afisawa 4 FHB Father's Heart Bible™

4 ¹Saboda haka ni, ɗan sarƙa saboda Ubangiji, ina roƙonku, ku yi tafiya da ta cancanci kiran da aka kira ku da shi, ²da dukan tawali'u da sanyin hali, da haƙuri, kuna jurewa juna cikin ƙauna, ³kuna marmarin kiyaye haɗin kai na Ruhu cikin ɗauri na salama. ⁴Jiki ɗaya ne, Ruhu kuma ɗaya, kamar yadda aka kira ku ga bege ɗaya da yake tare da kiranku. ⁵Ubangiji ɗaya, bangaskiya ɗaya, baftisma ɗaya, ⁶Uba ɗaya na kowa da kowa, wanda yake bisa kowa, da ta wurin kowa, da kuma cikin kowa.

⁷Amma kowannenmu an ba shi alheri gwargwadon ma'aunin baiwar Almasihu. ⁸Saboda haka Nassi ya ce, “Da ya hau sama, ya kwaso bayi, ya kuma ba mutane kyautai.” ^a a v8 Bulus yana ambaton Zabura 68:18, zabura ta nasara da take yabon sarki mai cin nasara. Yana danganta ta ga hawan Almasihu zuwa sama bayan mutuwarsa da tashinsa daga matattu.

⁹To, “ya hau”—mene ne wannan yake nufi, in ba cewa ya kuma sauka zuwa ƙananan sassa, wato ƙasa ba? ¹⁰Wannan da ya sauka, shi ne wanda ya hau can bisa dukan sammai, domin yă cika dukan abubuwa.

¹¹Shi ne kuma ya ba da manzanni, da annabawa, da masu bishara, da fastoci da malamai, ¹²domin su shirya tsarkaka saboda aikin hidima, domin gina jikin Almasihu, ¹³har sai dukanmu mu kai ga haɗin kai cikin bangaskiya da sanin Ɗan Ubanmu, mu zama cikakken balagagge, bisa ga cikakken ma'aunin tsayin daka da cikar Almasihu. ¹⁴Saboda haka ba za mu ƙara zama jarirai ba, waɗanda raƙuman ruwa suke ɗagawa, kowace iskar koyarwa kuma take kai-kawowa, ta wurin wayon mutane, da makircin dabaru na yaudara. ¹⁵Maimakon haka, ta wurin faɗar gaskiya cikin ƙauna, bari mu yi girma a kowace hanya zuwa gare shi wanda yake kai, wato Almasihu. ¹⁶Daga gare shi dukan jiki, haɗe kuma riƙe tare ta wurin kowace jijiya mai taimako, yana girma yayinda kowane sashe yake aiki yadda ya kamata, har jiki yă gina kansa cikin ƙauna.

Ku Yafa Sabon Hali

¹⁷Saboda haka ina faɗar wannan, ina kuma ba da shaida cikin Ubangiji, kada ku ƙara rayuwa kamar al'ummai, cikin wofin tunaninsu. ¹⁸An duhunta musu fahimta, an kuma raba su da ran Ubanmu saboda jahilcin da yake cikinsu da taurin zukatansu. ¹⁹Da suka rasa dukan ji, sai suka ba da kansu ga biyan sha'awar jiki, suna aikata kowace ƙazanta da haɗama. ²⁰Amma ba haka kuka koyi Almasihu ba, ²¹in dai kun ji labarinsa, aka kuma koyar da ku cikinsa, kamar yadda gaskiya take cikin Yesu, ²²ku tuɓe tsohon halinku, wanda yake haɗe da tsohuwar rayuwarku, wanda kuma sha'awace-sha'awa na ruɗu suka ɓata, ²³a kuma sabunta ku cikin ruhun tunaninku, ²⁴ku kuma yafa sabon hali, wanda aka halitta kamar Ubanmu cikin adalci na gaskiya da tsarki.

²⁵Saboda haka ku kawar da ƙarya—kowannenku yă faɗi gaskiya da maƙwabcinsa, gama mu gaɓoɓin juna ne. ²⁶Ku yi fushi, amma kada ku yi zunubi; kada rana tă faɗi kuna cikin fushinku, ²⁷kada kuma ku ba Iblis zarafi. ²⁸Dole ɓarawo yă daina sata; a maimako, yă yi aiki tuƙuru da hannuwansa, yana aikata abu mai kyau, domin yă sami abin da zai raba wa mabukata. ²⁹Kada wata muguwar magana tă fito daga bakinku, sai dai abin da yake taimakon waɗansu su yi girma, wanda ya dace da lokaci, domin yă ba masu ji alheri. ³⁰Kada ku ɓata wa Ruhu Mai Tsarki na Ubanmu rai, wanda ya hatimce ku saboda ranar fansa. ³¹Ku kawar da dukan ɗacin rai, da hasala, da fushi, da ihu, da ɓata suna, tare da dukan ƙeta. ³²Ku yi wa juna alheri, masu tausayin zuciya, kuna gafarta wa juna, kamar yadda Ubanmu ya gafarta muku ta wurin Almasihu.