Ku Yi Rayuwa Kamar 'Ya'yan Haske

Ku yi koyi da Ubanmu kamar yadda yara suke kwaikwayon mahaifi, kuma bari ƙauna ta yi kama da Almasihu wanda ya ba da kansa. Bulus ya bambanta duhu da haske, maye da Ruhu, sa'an nan ya yi amfani da biyayya ga juna a cikin aure — an ce wa mazaje su ƙaunaci matansu kamar yadda Almasihu ya ƙaunaci ikkilisiya.

Babi na 5.

Saboda haka, ku zama masu koyi da Ubanmu, kamar 'ya'ya ƙaunatattu. Ku yi rayuwa cikin ƙauna, kamar yadda Almasihu ya ƙaunace mu, ya kuma miƙa kansa saboda mu, hadaya mai ƙamshi da sadaka ga Ubanmu.

Fasikanci, da kowace irin ƙazanta, ko kwaɗayi, kada ma a ambace su a cikinku, yadda ya dace da tsarkaka. Ƙazamar magana, da surutun wauta, da barkwancin batsa ba su da wuri a cikinku — a maimakon haka ku yi godiya. Ku san wannan, babu wani mai fasikanci, ko mai ƙazanta, ko mai kwaɗayi — wato mai bautar gumaka — da yake da gādo a Mulkin Almasihu da na Ubanmu.

Kada kowa yă ruɗe ku da kalmomin wofi — saboda waɗannan abubuwa ne fushin Ubanmu yake saukowa a kan masu rashin biyayya. Saboda haka kada ku zama abokan tarayya da su;

gama a dā ku duhu ne, amma yanzu ku haske ne cikin Ubangiji — ku yi rayuwa kamar 'ya'yan haske. (gama 'ya'yan haske suna bayyana cikin dukan abin da yake mai kyau da adalci da gaskiya), ku kuma yi ƙoƙari ku gane abin da yake faranta wa Ubangiji rai. Kada ku yi tarayya cikin ayyukan duhu marasa amfani, sai dai ku tona su. Gama abin kunya ne har ma a ambaci abubuwan da suke yi a ɓoye. Amma sa'ad da aka tona kowane abu ta wurin haske, sai yă bayyana a fili, gama duk abin da ya bayyana a fili haske ne. Shi ya sa aka ce, “Ka farka, kai mai barci, ka tashi daga matattu, Almasihu kuma zai haskaka a kanka.” ^a

Saboda haka ku kula sosai yadda kuke tafiyar da rayuwarku, ba kamar marasa hikima ba, sai dai kamar masu hikima, kuna amfani da lokaci yadda ya dace, domin kwanakin nan mugaye ne. Saboda haka kada ku zama wawaye, sai dai ku gane abin da nufin Ubangiji yake. Kada ku bugu da ruwan inabi — wannan rayuwa ce ta lalaci — sai dai ku cika da Ruhu Mai Tsarki. Kuna gaya wa juna zabura da waƙoƙin yabo da waƙoƙin ruhaniya, kuna rera waƙa kuna kuma kaɗe-kaɗe ga Ubangiji a cikin zuciyarku, kuna yin godiya kullum saboda kowane abu ga Ubanmu da sunan Ubangijinmu Yesu Almasihu, kuna yin biyayya ga juna saboda bangirman Almasihu.

Ku Yi Ƙauna Kamar Yadda Almasihu Ya Yi

Ku mata, ku yi biyayya ga mazanku kamar yadda kuke yi ga Ubangiji. Gama miji shi ne kan mace, kamar yadda Almasihu ma yake kan Ikkilisiya, jikinsa, shi kansa kuma shi ne Mai Cetonta. To, kamar yadda Ikkilisiya take yin biyayya ga Almasihu, haka ma ya kamata mata su yi biyayya ga mazansu cikin kome.

Ku maza, ku ƙaunaci matanku, kamar yadda Almasihu ya ƙaunaci Ikkilisiya, ya kuma ba da kansa saboda ita, domin yă tsarkake ta, yana wanke ta tsaf da ruwa ta wurin magana, domin yă miƙa wa kansa Ikkilisiya mai ɗaukaka — marar tabo, ko tsumoki, ko wani abu makamancin haka — sai dai mai tsarki marar aibi. Haka ya kamata maza su ƙaunaci matansu kamar jikunansu. Wanda ya ƙaunaci matarsa, ya ƙaunaci kansa ke nan. Babu wanda ya taɓa ƙin jikinsa — a maimakon haka yakan ciyar da shi yă kuma kula da shi, kamar yadda Almasihu yake yi wa Ikkilisiya, domin mu gaɓoɓin jikinsa ne. “Saboda haka mutum zai bar mahaifinsa da mahaifiyarsa, yă manne wa matarsa, su biyun kuma su zama jiki ɗaya.” Wannan asiri babba ne ƙwarai, ni kuwa ina cewa yana nufin Almasihu da Ikkilisiya. Amma dole kowannenku yă ƙaunaci matarsa kamar kansa, matar kuma dole tă girmama mijinta.