Aefesu 4 FHB Father's Heart Bible™

4 ¹Na tenepo Ine, ndiri nkaidi mwa Mbuya, ndisakudembeterani: fambani mwakuthema kucemerwa kudacemerwa imwe nako, ²mukupwaza konsene na kufatsa, mukupirira, mukupirirana unango na ndzace mukufuna, ³mukuwangisira kukoyza ubodzi wa Nzimu mu cimangeniro ca ntendere. ⁴Manungo mabodzi, Nzimu m'bodzi, ninga pidacemerwa imwe mu cidikhiro cibodzi cinabwera na kucemerwa kwanu. ⁵Mbuya m'bodzi, cikhulupiro cibodzi, ubatizo ubodzi, ⁶Baba m'bodzi wa onsene, ule ali padzulu pa onsene, na kupita mwa onsene, na kukhala mwa onsene.

⁷Mbwenye m'bodzi na m'bodzi wa ife apaswa kukoma ntima mwakulinganira na muyeso wa muoni wa Kirixtu. ⁸Na tenepo pisalonga kuti: “Pidakwira Iye kudzulu, akwata akapolo, mbapereka miyoni kuna anthu.” ^a a v8 Paulu asacita malongero a Nsalmo 68:18, nsalmo wa kupembera unasimba mambo wakukunda. Iye asauphatanisa na kukwira kwa Kirixtu kudzulu pakumala kwa kufa na kulamuka kwace.

⁹Cincino mafala akuti “Iye akwira”—pisabvekanji, kusiyapo kuti Iyembo atsika ku mbuto zapantsi, dziko yapantsi? ¹⁰Ule adatsika ndiye ule adakwira kutali padzulu pa maulu onsene, toera akwanise kudzaza pinthu pyonsene.

¹¹Na Iye apereka apostolo, aprofeta, amwazi mphangwa zadidi, akumbizi na apfundzisi, ¹²toera kukhunganya anthu akucena pa basa ya utumiki, toera kumanga manungo a Kirixtu, ¹³mpaka ife tonsene tifike pa ubodzi mu cikhulupiro na mu kudziwa Mwana wa Baba wathu, mbatikhala anthu akulu adakula, mpaka pa muyeso wakukwana wa ukulu na kudzala kwa Kirixtu. ¹⁴Na tenepo ife nkhabe kukhala pontho anang'ono, akugwedegweswa na makukumo, mbatikwatwa na consene cimphepo ca cipfundziso, na unyengezi wa anthu, na uphuma wakunyengeza. ¹⁵Mbwenye, mukulonga undimo mukufuna, tendeni tikule munjira zonsene mpaka kwa Iye ule ndi nsolo, Kirixtu. ¹⁶Kubulukira mwa Iye, manungo onsene asaphataniswa mbamangwa pabodzi na mitsamba yonsene inaphedza, mbakula mukuti khundu ibodzi na ibodzi isaphata basa mwadidi, toera manungo amangike okha mukufuna.

Bvalani Umunthu Upsa

¹⁷Na tenepo ndisalonga pyenepi, mbandipereka umboni mwa Mbuya: lekani kukhala pontho ninga anthu a madzinza, mu kusowa basa kwa manyerezero awo. ¹⁸Akupswipiswa mu kubvesesa kwawo, akusiyaniswa na umaso wa Baba wathu thangwi ya kusowa kudziwa kuli mwa iwo na kuwuma kwa mitima yawo. ¹⁹Mbakhonda kubva pontho manyadzo, iwo apereka ekha ku kucita pinafuna manungo awo, mbacita consene cakusakwa na umbombwe. ²⁰Mbwenye si tenepo tayu mudapfundza imwe Kirixtu, ²¹mungakhala mwandimomwene mwabva pya Iye, mbamupfundziswa mwa Iye, ninga undimo uli mwa Yezu, ²²toera kubvula umunthu wanu wakale, wakumangika na makhaliro anu akutoma, wakuonongeka na pinafuna pyakunyengeza, ²³na kukhala akupswa mu nzimu wa manyerezero anu, ²⁴na kubvala umunthu upsa, wakulengwa ninga Baba wathu mu kulungama kwandimomwene na ukucena.

²⁵Na tenepo, lekani uthambi—m'bodzi na m'bodzi wa imwe mbalonge undimo na ndzace, thangwi ndife khundu ya unango na ndzace. ²⁶Ipirwani, mbwenye lekani kudawa; lekani kusiya dzuwa kudoka mucili akuipirwa, ²⁷pontho lekani kupasa mpata kuna dyabo. ²⁸Mbava asiye kuba; mbwenye aphate basa mwamphambvu na manja ace mene mbacita pyadidi, toera akhale na cinthu cakupereka kuna anyakusauka. ²⁹Fala yakubvunda ileke kubuluka nkanwa mwanu, mbwenye basi ene yakuphedza anango kukula, yakuthema n'dzidzi, toera ipase kukoma ntima kuna ale anabva. ³⁰Lekani kutsukwalisa Nzimu Wakucena wa Baba wathu, ule adakudindani cizindikiro toera ntsiku ya ciomboli. ³¹Bulusani kwa imwe kuwawa konsene kwa ntima, ukali, kuipirwa, kukhuwa, na kusingirira, pabodzi na kuipa kwa ntima konsene. ³²Khalani akukoma ntima unango na ndzace, akubva ntsisi, mbalekererana unango na ndzace, ninga Baba wathu adakulekererani kubulukira mwa Kirixtu.