Nani Kounu le Baze Tanga Sero
Khatcha ongnu ga bacham ongnu ga make—Pukraangba khatcha khatle Pa khatcha, atiyeda leithwan bing ga tei tei nge, khatle kaliannu rwan ga mi bing lang chwan to lang makka, mi brumza ding khopsa thou lang amme. Lian thounu ga thiraangna baotalu lan laye diga ta nge. Habei ga chwan titcha bing om chongtan: batak takka rinro, chwan toro, nabao ngaakro.
4 1Atibriakpina Pukraangba khou qwan ongnu ei eina, nani khou hwei nge, nanina kounu ga baze tanga serizo, 2bangiamtanu brumza khatle sung bazaangnu taga, khaang theinu taga, kriangnu bi khat na khat ting khaang thang kaleyo, 3dai bazaangnu bang karungnu bi Katha om khatchanu ga khaang lang rakanga zong ngo. 4Pum khatcha, Katha khatcha, nani kounu kaan bi bakhamnu khatcha khou nani kou thang ongnu danga gaye. 5Pukraangba khatcha, balumsanu khatcha, baptisma khatcha gaye, 6mi brumza om Pa khatcha, Maan balang bing chung bi, balang bing paan bina khatle balang bing bi ongnuwe.
7Atiyeda Christa om leithwan chaang ga danga, ani lak pi pakhat khat ting phaangkriang pi thang rwe. 8Atibriakpina atiga rin thang nge, “Maan tambaan riak la ka damluga, qwan ongnu nun ding qwan toga, mi nun ding leithwan bing pi thang rwe.” a a v8 Paul na kataatnu krwang khou karonu kathatnu Psalm 68:18 ga rin ngailuga kabia nge. Maanna haba ga Christa om thinu khatle ringthounu bakhamnu kaan bi Bating riak la ka damnu khou thang nge.
9Atun “Maan ka dam rwe” diga rinnu heiya, Maanna talei ram kabangiamnu riak khou le kanu lat ngaaknu za makka, pa-aam katei dan dingbo? 10Maanna balang bing ding sip thang lang, kanu latnu Maan ga tambaan brumza chung bi gehu la ka damnu Maan le khatcha gaye.
11Khatle Maanna chonglang rwan, Rikrwang chong rin swaknu rwan, sacham kasamnu rwan, kalum balu rwan khatle bachu thangnu rwan ding pi thang rwe, 12bathiangnu nun ding chwanlaang om chwan lang kutthiam thang lang, Christa om pum ding bacha thou lang, 13ani brumza balumsanu bi khatle ani Pa om Sa Kapaisa ding theinu bi khatchanu khou, patso zung ongnu mipu lang, Christa om pum lwan khatle sipsanu chaang tang bi ani brumza loi lune. 14Atiga ani naosen rwan dan am latla, tui kabaapnuna kabaapluga, bachu thangnu thiraang brumzana, mi om minamnuna, bathem swaknu rou sianuna ani ding pi chaat dam latla rwe. 15Atiyeda kriangnu bi bazenu ga kabialuga, balang bing bi balu ongnu Christa khou ani sing thou baloizo. 16Bakhouna pum brumza, kapaangnu ru sarin brumzana bariak cha chaga bang karung thangluga, naat pakhat khatna baze tanga chwan to kaan bi sing thou nge, atiga pum gana kriangnu bi baraantoza bacha thounuwe.
Mi Kathan ga Sin Basoiyo
17Atibriakpina ei heiya ringa, Pukraangba khou le theihung nge, nani Gentile rwan danga bani thinu bathaang maaknu bi ser latla ngo. 18Bani bakaba theinu zing drwe, bani sung bi amnu thei maknu khatle bani sung natnu paanna ani Pa om ringnu bina pak tam ongnuwe. 19Banina sung maangnu brumza maan satluga, pum om bathainu ding thingnu bi baraantoza pi thangluga, ra-aamga tanaatnu brumza ding chwan toga ong nge. 20Atiyeda nanina Christa ding chuinu lampui ga hadanga make, 21Nanina Bating lang bi batakka hungluga, Jisu khou bazenu amnu danga Bakhou chuinu ga lousu rwe dabe, 22nani om kamanu lamchat le bangluga minamnu bathainuna braannu nani om mi kamanu ga sat satro, 23khatle nani sung thinu om katha bi pi kathan thang damnu, 24khatle bazenu ririak senu khatle bathiangnu bi ani Pa danga dam thang damnu mi kathan ga sin basoiyo.
25Atibriakpina chong karwaknu ga bathan satluga, nani pakhat khatna bain inkom le bazenu ga kabiawo, balangbe ani khat na khat om naat nunne. 26Balung pwan ngo atiyeda noh to mako; nani balung pwannu chung bi kanu sut swaknu ding mako, 27khatle Diabol ding badou chanu khatchale pi thang mako. 28Barusanu mi gana barusanu ga lan latro; atiyeda baraan kut na kasanu ga chwan hakta toluga, lungsianu nun khou pi lwak lang pot khat am lang nge. 29Nani mun bina chong ru kabianu khatchale lat mako, atiyeda badou le bachamga mi nun ding bacha thounu chong za lat ngo, atiga chong ngainu nun khou phaangkriang pi thang lang nge. 30Ran swak thangnu ni lang nani ding mohor tam thangnu ani Pa om Katha Bathiangnu ding sung riangre to mako. 31Kakhaanu brumza, sung sounu, balung pwannu, kou hweinu khatle rin basiatnu ga, kasianu brumza le diga bathan satro. 32Khat na khat ting sung sanu ga ong ngo, kriang theinu sung taga, Christa paan bina ani Pa na nani ding kok thangnu danga, nani le khat le khat kok thang kaleyo.