ኤፌሶን 3 FHB Father's Heart Bible™

3 ¹ስለዙይ ኣነ ጳውሎስ፥ ምእንቲ ንስኻትኩም ኣህዛብ እሱር ኢየሱስ ክርስቶስ ዝኾንኩ፥ ^a a v1 ዘረባ ጳውሎስ ኣብዙይ ተቛሪፁ፥ ኣብ ቍፅሪ 14 ብ“ስለዙይ” ዳግማይ ይቕፅል። ²ብዛዕባ እቲ ምእንታኻትኩም ዝተውሃበኒ ምምሕዳር ፀጋ ኣቦና ኸም ዝሰማዕኹም እግምት ኣለኹ፤ ³እቲ ምስጢር፥ ከምቲ ኣቐዲመ ብሓፂሩ ዝፃሕፍኩዎ፥ ብምግላፅ ከመይ ከም ዝተፈለጠኒ። ⁴እዙይ ምስ ተንብብዎ፥ ነቲ ኣብ ምስጢር ክርስቶስ ዘለኒ ምስትውዓል ክትግንዘብዎ ትኽእሉ ኢኹም። ⁵እዙይ ኣብ ዝሓለፈ ወለዶታት ንደቂ ሰብ ዘይተፈለጠ፥ ሕዚ ግና ብመንፈስ ንቅዱሳን ሃዋርያቱን ነቢያቱን ዝተገለፀ እዩ፤ ⁶ንሱ ኸዓ፥ ኣህዛብ ብወንጌል ጌሮም፥ ብኢየሱስ ክርስቶስ መዋርስቲ፥ ኣባላት ሓደ ስጋ፥ ኣብ ተስፋ ኸዓ ተማቐልቲ ኸም ዝኾኑ እዩ። ⁷በቲ ብግብሪ ሓይሉ ዝተውሃበኒ ውህብቶ ፀጋ ኣቦና፥ ኣገልጋሊ እዝ ወንጌል እዙይ ኮንኩ። ⁸ካብ ኵሎም ቅዱሳን እቲ ዝነኣስኩ እኳ እንተኾንኩ፥ ነቲ ዓቐን ዘይብሉ ሃብቲ ክርስቶስ ንኣህዛብ ክሰብኽ፥ እዝ ፀጋ እዙይ ተውሃበኒ፤ ⁹ነቲ ኣብቲ ንዅሉ ዝፈጠረ ኣቦና፥ ካብ ዘመናት ጀሚሩ ተሓቢኡ ዝነበረ መደብ ምስጢር፥ ንዅሉ ኸብርህ፥ ¹⁰እዙይ ከዓ፥ እቲ ብዙሕ ዝዓይነቱ ጥበብ ኣቦና፥ ሕዚ ብቤተ ክርስቲያን ጌሩ፥ ኣብ ሰማያት ንዘለዉ ሓለቓታትን ስልጣናትን ምእንቲ ኽፍለጥ እዩ። ¹¹እዙይ ከምቲ ብጐይታና ኢየሱስ ክርስቶስ ዝፈፀሞ ናይ ዘለኣለም መደብ እዩ፤ ¹²ብእኡ ኸዓ ብእምነትና ብእኡ ጌርና፥ ብትብዓትን ብምትእምማንን ናብኡ ንቐርብ ኢና። ¹³ስለዙይ ምእንታኻትኩም ብዝቕበሎ ዘለኹ መከራ ኸይትሽበሩ እልምነኩም ኣለኹ፤ እዙይ ክብርኹም እዩ እሞ።

ጳውሎስ ብዛዕባ ምልኣት ኣቦ ይፀሊ

¹⁴ስለዙይ ኣብ ቅድሚ ኣቦ ኣብራኸይ እምብርከኽ ኣለኹ፥ ¹⁵ኣብ ሰማይን ኣብ ምድርን ዘሎ ኵሉ ቤተሰብ፥ ስሙ ኻብኡ ዝረክብ፥ ^b b v15 ኣብ ሰማይን ኣብ ምድርን ዘሎ ኵሉ ቤተሰብ፥ ስሙ ኻብ ኣቦና ይረክብ — ንሱ ናይ ኵሉ ኣቦነት ምንጪ እዩ፥ ካብኡ ወፃኢ ድማ ዝኾነ ናይ ቤተሰብ መንነት የለን። ¹⁶ከም ብዝሒ ሃብቲ ክብሩ፥ ብመንፈሱ ጌሩ ብውሽጣዊ ሰብኹም ብሓይሊ ምእንቲ ኸፅንዓኩም፥ ¹⁷ክርስቶስ ብእምነት ኣብ ልብኹም ምእንቲ ኽነብር፥ ንስኻትኩም ድማ ኣብ ፍቕሪ ተሰሪትኩምን ተመስሪትኩምን፥ ¹⁸ምስ ኵሎም ቅዱሳን እግዚኣብሄር፥ ነቲ ስፍሓትን ንውሓትን ቁመትን ዕምቈትን ክትግንዘቡ ሓይሊ ምእንቲ ኽትረኽቡ፥ ¹⁹ነቲ ኻብ ፍልጠት ዝዓቢ ፍቕሪ ክርስቶስ ክትፈልጡ፥ በቲ ኵሉ ምልኣት ኣቦና ድማ ምእንቲ ኽትምልኡ።

²⁰ነቲ በቲ ኣባና ዝዓዪ ሓይሊ ጌሩ፥ ካብ ኵሉ እንልምኖ ወይ እንሓስቦ ኣዝዩ ንላዕሊ ኽገብር ዝኽእል ኣቦና፥ ²¹ኣብ ቤተ ክርስቲያንን ኣብ ኢየሱስ ክርስቶስን፥ ንዅሉ ወለዶታት፥ ንዘለኣለመ ኣለም ክብሪ ንእኡ ይኹን። ኣሜን።