ኤፌሶን 3

3 ¹ስለዚህ ምክንያት እኔ ጳውሎስ፣ ስለ እናንተ ስለ አሕዛብ የክርስቶስ ኢየሱስ እስረኛ የሆንሁ፣ ^a a v1 የጳውሎስ ዐረፍተ ነገር እዚህ ላይ ተቋርጦ በቍጥር 14 ላይ “ስለዚህ ምክንያት” በሚለው እንደ ገና ይቀጥላል። ²ስለ እናንተ ለእኔ የተሰጠኝን የአባታችንን ጸጋ መጋቢነት እንደ ሰማችሁ እገምታለሁ፤ ³ከላይ በአጭሩ እንደ ጻፍሁት፣ ምስጢሩ በመገለጥ እንዴት እንደ ተገለጠልኝ ነው። ⁴ይህን ስታነብቡ፣ ስለ ክርስቶስ ምስጢር ያለኝን ማስተዋል ልትረዱ ትችላላችሁ፤ ⁵ይህም ምስጢር በቀደሙት ትውልዶች ለሰዎች አልታወቀም ነበር፤ አሁን ግን ለቅዱሳን ሐዋርያቱና ነቢያቱ በመንፈስ ተገልጦአል፤ ⁶ይህም አሕዛብ በክርስቶስ ኢየሱስ በወንጌል አማካይነት አብረው ወራሾች፣ የአንድ አካል ብልቶች፣ በተስፋውም ተካፋዮች መሆናቸው ነው። ⁷በሚሠራው ኀይሉ ለእኔ በተሰጠኝ በአባታችን ጸጋ ስጦታ አማካይነት የዚህ ወንጌል አገልጋይ ሆንሁ። ⁸ከቅዱሳን ሁሉ ከሁሉ የማንስ ብሆንም፣ ይህ ጸጋ ተሰጠኝ፤ ለአሕዛብ የክርስቶስን ወሰን የሌለው ባለጠግነት እሰብክ ዘንድ፤ ⁹ሁሉን በፈጠረው በአባታችን ከዘመናት ጀምሮ ተሰውሮ የነበረውን የምስጢሩን ዕቅድ ለሁሉ አሳይ ዘንድ፤ ¹⁰ይህም በቤተ ክርስቲያን አማካይነት የአባታችን ልዩ ልዩ ጥበብ አሁን በሰማያት ላሉት ገዦችና ሥልጣናት እንዲታወቅ ነው። ¹¹ይህም በጌታችን በክርስቶስ ኢየሱስ ፈጽሞ ባደረገው በዘላለማዊው ዐላማ መሠረት ነበር፤ ¹²በእርሱም በማመን በኩል ድፍረትን በመታመንም መቅረብን አግኝተናል። ¹³ስለዚህ እለምናችኋለሁ፤ ስለ እናንተ በምቀበለው መከራ ተስፋ አትቍረጡ፤ ክብራችሁ ነውና።

ጳውሎስ ስለ አባታችን ሙላት ይጸልያል

¹⁴ስለዚህ ምክንያት በአብ ፊት እንበረከካለሁ፤ ¹⁵በሰማይና በምድር ያለ ቤተ ሰብ ሁሉ ከእርሱ ስሙን ይቀበላል፤ ^b b v15 በሰማይና በምድር ያለ ቤተ ሰብ ሁሉ ስሙን ከአባታችን ይቀበላል፤ እርሱ የአባትነት ሁሉ ምንጭ ነው፤ ከእርሱም ውጭ ምንም የቤተ ሰብ ማንነት የለም። ¹⁶ይህም ከክብሩ ባለጠግነት የተነሣ በመንፈሱ አማካይነት በውስጣዊው ሰውነታችሁ በኀይል እንዲያበረታችሁ ነው፤ ¹⁷ክርስቶስም በእምነት አማካይነት በልባችሁ ይኖር ዘንድ፤ እናንተም በፍቅር ሥር ሰድዳችሁ ተመሥርታችሁ፣ ¹⁸ከእግዚአብሔር ቅዱሳን ሁሉ ጋራ ስፋቱንና ርዝመቱን ከፍታውንና ጥልቀቱን ለማስተዋል ኀይል እንዲኖራችሁ፤ ¹⁹ከዕውቀትም በላይ የሆነውን የክርስቶስን ፍቅር ታውቁ ዘንድ፣ በአባታችንም ሙላት ሁሉ እንድትሞሉ ነው።

²⁰በእኛ ውስጥ በሚሠራው ኀይል፣ ከምንለምነውና ከምናስበው ሁሉ እጅግ አብልጦ ሊያደርግ ለሚችለው ለአባታችን፤ ²¹በቤተ ክርስቲያንና በክርስቶስ ኢየሱስ፣ በትውልድ ሁሉ፣ ከዘላለም እስከ ዘላለም ክብር ለእርሱ ይሁን። አሜን።