ପାଉଲଙ୍କ ନିକଟରେ ସମର୍ପିତ ନିଗୂଢ଼ତତ୍ତ୍ଵ

ପାଉଲ ବୁଝାନ୍ତି ସେ କାହିଁକି କାରାଗାରରେ ଅଛନ୍ତି: ଆମର ପିତାଙ୍କ ନିଗୂଢ଼ ତତ୍ତ୍ୱ ତାହାଙ୍କୁ ସମର୍ପିତ ହୋଇଥିଲା, ଯେ ଅଣଯିହୁଦୀମାନେ ଅତିଥି ନୁହଁନ୍ତି, ବରଂ ସହ-ଉତ୍ତରାଧିକାରୀ। ସେ ନିଜକୁ ସମସ୍ତ ସାଧୁଙ୍କ ମଧ୍ୟରେ କ୍ଷୁଦ୍ରତମ ବୋଲି କହନ୍ତି। ତାʼପରେ ସେ ଯୁକ୍ତି ବନ୍ଦ କରି ପିତାଙ୍କ ସମ୍ମୁଖରେ ଆଣ୍ଠୁ ପାତନ୍ତି, ଜ୍ଞାନର ଅତୀତ ପ୍ରେମକୁ ଧାରଣା କରିବା ପାଇଁ ଶକ୍ତି ମାଗି ପ୍ରାର୍ଥନା କରନ୍ତି।

ଅଧ୍ୟାୟ 3।

ଏହି କାରଣରୁ ମୁଁ ପାଉଲ, ତୁମ୍ଭେମାନେ ଅଣଯିହୂଦୀମାନଙ୍କ ନିମନ୍ତେ ଖ୍ରୀଷ୍ଟ ଯୀଶୁଙ୍କ ବନ୍ଦୀ, ^a ତୁମ୍ଭମାନଙ୍କ ନିମନ୍ତେ ମୋତେ ଦତ୍ତ ଆମ୍ଭମାନଙ୍କ ପିତାଙ୍କ ଅନୁଗ୍ରହର ସେବାଭାର ବିଷୟ ତୁମ୍ଭେମାନେ ଶୁଣିଅଛ ବୋଲି ମୁଁ ମନେ କରୁଅଛି, ଅର୍ଥାତ୍‍, ମୁଁ ଉପରେ ଯେପରି ସଂକ୍ଷେପରେ ଲେଖିଅଛି, ସେହିପରି ପ୍ରକାଶ ଦ୍ଵାରା ସେହି ନିଗୂଢ଼ତତ୍ତ୍ଵ ମୋତେ ଜ୍ଞାତ କରାଗଲା। ଏହା ପାଠ କଲେ, ଖ୍ରୀଷ୍ଟଙ୍କ ନିଗୂଢ଼ତତ୍ତ୍ଵ ବିଷୟରେ ମୋହର ଜ୍ଞାନ ତୁମ୍ଭେମାନେ ବୁଝିପାରିବ। ଏହା ଅତୀତ ପୁରୁଷପରମ୍ପରାରେ ଲୋକମାନଙ୍କ ନିକଟରେ ଜ୍ଞାତ କରାଯାଇ ନ ଥିଲା, ମାତ୍ର ଏବେ ତାହାଙ୍କ ପବିତ୍ର ପ୍ରେରିତ ଓ ଭାବବାଦୀମାନଙ୍କ ନିକଟରେ ଆତ୍ମାଙ୍କ ଦ୍ଵାରା ପ୍ରକାଶିତ ହୋଇଅଛି, ଅର୍ଥାତ୍‍, ସୁସମାଚାର ଦ୍ଵାରା ଖ୍ରୀଷ୍ଟ ଯୀଶୁଙ୍କଠାରେ ଅଣଯିହୂଦୀମାନେ ସହଅଧିକାରୀ, ଏକ ଶରୀରର ଅଙ୍ଗ ଓ ପ୍ରତିଜ୍ଞାର ସହଭାଗୀ ଅଟନ୍ତି। କାର୍ଯ୍ୟସାଧକ ତାହାଙ୍କ ଶକ୍ତି ଅନୁସାରେ ମୋତେ ଦତ୍ତ ଆମ୍ଭମାନଙ୍କ ପିତାଙ୍କ ଅନୁଗ୍ରହର ଦାନ ଦ୍ଵାରା ମୁଁ ଏହି ସୁସମାଚାରର ସେବକ ହେଲି। ମୁଁ ସମସ୍ତ ସାଧୁଙ୍କ ମଧ୍ୟରେ କ୍ଷୁଦ୍ରତମ ହେଲେ ହେଁ ମୋତେ ଏହି ଅନୁଗ୍ରହ ଦତ୍ତ ହେଲା, ଯେପରି ମୁଁ ଖ୍ରୀଷ୍ଟଙ୍କ ଅଗାଧ ଧନ ବିଷୟକ ସୁସମାଚାର ଅଣଯିହୂଦୀମାନଙ୍କ ନିକଟରେ ପ୍ରଚାର କରେ, ପୁଣି, ସମସ୍ତ ବସ୍ତୁର ସୃଷ୍ଟିକର୍ତ୍ତା ଆମ୍ଭମାନଙ୍କ ପିତାଙ୍କଠାରେ ଯୁଗ ଯୁଗ ଧରି ଗୁପ୍ତ ଥିବା ସେହି ନିଗୂଢ଼ତତ୍ତ୍ଵର ଯୋଜନା ସମସ୍ତଙ୍କ ନିକଟରେ ପ୍ରକାଶ କରେ, ଯେପରି ମଣ୍ଡଳୀ ଦ୍ଵାରା ଆମ୍ଭମାନଙ୍କ ପିତାଙ୍କ ବହୁବିଧ ଜ୍ଞାନ ଏବେ ସ୍ଵର୍ଗରେ ଥିବା ଅଧିପତି ଓ ଅଧିକାରୀମାନଙ୍କ ନିକଟରେ ଜ୍ଞାତ କରାଯାଏ। ଆମ୍ଭମାନଙ୍କ ପ୍ରଭୁ ଖ୍ରୀଷ୍ଟ ଯୀଶୁଙ୍କଠାରେ ସେ ଯେଉଁ ଅନନ୍ତକାଳୀନ ସଙ୍କଳ୍ପ ସାଧନ କଲେ, ତଦନୁସାରେ ଏହା ହେଲା, ତାହାଙ୍କଠାରେ ବିଶ୍ଵାସ ଦ୍ଵାରା ତାହାଙ୍କଠାରେ ଆମ୍ଭେମାନେ ସାହସ ଓ ଦୃଢ଼ ବିଶ୍ଵାସ ସହିତ ପ୍ରବେଶ କରିବାର ଅଧିକାର ପ୍ରାପ୍ତ ହୋଇଅଛୁ। ଅତଏବ ମୁଁ ତୁମ୍ଭମାନଙ୍କୁ ନିବେଦନ କରୁଅଛି, ତୁମ୍ଭମାନଙ୍କ ନିମନ୍ତେ ମୋହର ଯେଉଁ କ୍ଲେଶଭୋଗ, ସେଥିରେ ସାହସ ହରାଅ ନାହିଁ, କାରଣ ତାହା ତୁମ୍ଭମାନଙ୍କ ଗୌରବ।

ପାଉଲ ପିତାଙ୍କ ପୂର୍ଣ୍ଣତା ନିମନ୍ତେ ପ୍ରାର୍ଥନା କରନ୍ତି

ଏହି କାରଣରୁ ମୁଁ ପିତାଙ୍କ ସମ୍ମୁଖରେ ଆଣ୍ଠୁପାତୁଅଛି, ତାହାଙ୍କଠାରୁ ସ୍ଵର୍ଗ ଓ ପୃଥିବୀସ୍ଥ ପ୍ରତ୍ୟେକ ପରିବାର ଆପଣା ନାମ ପ୍ରାପ୍ତ ହୁଏ, ^b ଯେପରି ସେ ଆପଣା ମହିମାର ଧନାନୁସାରେ ଆପଣା ଆତ୍ମାଙ୍କ ଦ୍ଵାରା ତୁମ୍ଭମାନଙ୍କ ଅନ୍ତରସ୍ଥ ପୁରୁଷରେ ଶକ୍ତିରେ ତୁମ୍ଭମାନଙ୍କୁ ବଳବାନ କରନ୍ତି, ଯେପରି ବିଶ୍ଵାସ ଦ୍ଵାରା ଖ୍ରୀଷ୍ଟ ତୁମ୍ଭମାନଙ୍କ ହୃଦୟରେ ବାସ କରନ୍ତି, ପୁଣି ତୁମ୍ଭେମାନେ ପ୍ରେମରେ ବଦ୍ଧମୂଳ ଓ ଦୃଢ଼ଭିତ୍ତିକ ହୋଇ, ସମସ୍ତ ସାଧୁଙ୍କ ସହିତ ତାହାର ପ୍ରସ୍ଥ, ଦୀର୍ଘତା, ଉଚ୍ଚତା ଓ ଗଭୀରତା ଅନୁଭବ କରିବାକୁ ଶକ୍ତିମାନ ହୁଅ, ପୁଣି ଜ୍ଞାନାତୀତ ଖ୍ରୀଷ୍ଟଙ୍କ ପ୍ରେମ ଜାଣି ଆମ୍ଭମାନଙ୍କ ପିତାଙ୍କ ସମସ୍ତ ପୂର୍ଣ୍ଣତାରେ ପରିପୂର୍ଣ୍ଣ ହୁଅ।

ଆମ୍ଭମାନଙ୍କ ମଧ୍ୟରେ କାର୍ଯ୍ୟସାଧକ ଶକ୍ତି ଅନୁସାରେ ଆମ୍ଭେମାନେ ଯାହା କିଛି ମାଗୁ କି ଭାବୁ, ତାହା ଅପେକ୍ଷା ଅତ୍ୟଧିକ ପ୍ରଚୁର ରୂପେ କରିବାକୁ ସମର୍ଥ ଆମ୍ଭମାନଙ୍କ ପିତାଙ୍କ ମହିମା ହେଉ। ମଣ୍ଡଳୀରେ ଓ ଖ୍ରୀଷ୍ଟ ଯୀଶୁଙ୍କଠାରେ ପୁରୁଷାନୁକ୍ରମେ ଯୁଗେ ଯୁଗେ ଅନନ୍ତକାଳ ପର୍ଯ୍ୟନ୍ତ ତାହାଙ୍କ ମହିମା ହେଉ। ଆମେନ୍‍।