Ephesianao 3

3 ¹Chiwui vang eina, nathum Gentilebingwui vang Khrista Jishuwui phātop kazanga Paul ina, ^a a v1 Paulwui tui hiwuili ngasāmhaoda, verse 14li "Chiwui vang eina" da chi khangatei rāphokhaira. ²ithumwui Avāwui lukhamashan, nathumwui vang ili mikahai, chiwui angarān angayei pao chi nathumna kashāhaira da phaningda, ³kathuka tui chi phongkhamiwui mangā eina ili kathada theingasakhaira, kaji ina rida sha̱lak eina kagapina. ⁴Hi nathumna pālaga, Khristawui kathuka tuili iwui ningthei chi nathumna theikhui samphangra, ⁵chi thuikahai thot-thotli mibingli matheimana, kha ara awui kathara paokazatbing kala marānbingli Manglā mangā eina phongmihaira, ⁶chithākha Gentilebing china Khrista Jishuli paokaphā mangā eina ngasokahai shimluikatbing, ngaraikachā phasā akaibing, kala tuingashitli ot sākhangarumbing ngasāra. ⁷ithumwui Avāwui lukhamashan lemmet, awui pangshap ot sāda khalei chiwui mangā eina ili mikahai, chiwui vang eina ina hi paokaphāwui rao ngasāhaowa. ⁸Varewui katharabing saikorawui lungli teomeikhamei ina sālala, lukhamashan hi ili mihaira, chiya Gentilebingli Khristawui makhavāt kashāng hāshok khavaina, ⁹kala ot saikora sākahai ithumwui Avāli thot-thotli thumhaikasā kathuka tuiwui khangarān chi mi saikorali chitheimi khavaina, ¹⁰chithākha church mangā eina, ithumwui Avāwui yur kachungkha thangkhamei chi ara kazingramli khalei khamungabing kala pangshap kasingabingli theingasakpaira. ¹¹Hi ithumwui Proho Khrista Jishuli ana sākupkhui kahai katang makhavai kharin chiwui athishurda kahaina, ¹²awuili shitkasang mangā eina ithumna kaping kala kachihānna zangkapai chi samphanga. ¹³Chieina ina nathumli kapona: nathumwui vang iwui kachotkachāng chiwui vang ning masuitālu. Chi nathumwui tekhamateina.

Paulna Avāwui Khangachā Vang Seihā Sai

¹⁴Chiwui vang eina ina Avāwui mangāli ipheikhuk khorumda, ¹⁵kazingram kala okathuili khalei shimkhur saikorana awui eina aming samphangna, ^b b v15 Kazingram kala okathuili khalei shimkhur saikorana ithumwui Avāwui eina aming samphangna—a saikora avā ngasāwui angayung china, kala awui eina tangda shimkhur ming khikhalikha maleimana. ¹⁶awui tekhamatei kashāng chiwui eina, awui Manglā mangā eina, nathumwui alao wuklungli pangshap eina nathumli pangngasakra khavai ina seihā sai. ¹⁷Chithākha shitkasang mangā eina Khrista nathumwui wuklungli okthuira khavai, kala nathum leikashili angayung sa̱khuititda kala khangatha̱ sāda, ¹⁸Varewui kathara mibing saikora eina ngasoda, aret kala asān kala kajui kala atung chi yuikhui khavai pangshap nathumna samphangra, ¹⁹kala matheikharar Khristawui leikashi chi theida, chieina nathumna ithumwui Avāwui khangachā saikora china pemtinghaora.

²⁰Ithumwui lungli ot sāda khalei pangshap eina, ithumna kapopo kala phaning kaji ot saikora chiwui eina mathāmeida sākhavai pangshap khalei ithumwui Avā chili, ²¹Churchli kala Khrista Jishuli, thot saikorali, mashimānda mashimānla ali tekhamatei ngasāranu. Amen.