Paul ke Bisah Kori Diya Lukai Thaka Kotha

Paul kele jail te ase koi kene bujai diye: amar Pitri laga lukai thaka kotha tak ke bisah kori dise, ki Porjati khan bi eke logot uttoradhikari ase, mehman nohoi. Tai nijor ke sob pobitro manuh khan te sob pora chhuta koi. Tar pichete tai torka kora bond kori kene Pitri age te athu gari kene, janibo napara morom ke bujibo nimite shakti nimite prarthana kore.

Adhyay 3.

Etu karne moi, Paul, tumikhan Porjati khan nimite Khrista Jisu laga bondhi hoi kene, ^a tumikhan nimite moi ke diya amar Pitri laga anugrah laga jimma tu tumikhan huni loise koi kene, upor te moi olop likha nisena, prokah kora dwara lukai thaka kotha tu moi ke kineka jonai dise. Khrista laga gupto kotha te moi ki bujise, etu tumikhan porhile bujibo paribo, etu to age laga juga laga manuh khan ke janai diya nai, kintu etiya Atma pora Tar pobitro pasela khan aru bhabobadi khan ke prokah korise, eneka hoile Porjati khan susamachar dwara Khrista Jisu te eke logote uttoradhikari, eke gaw laga bhag, aru vachan te eke logote bhagi khan ase. Tar shakti kaam kora pora moi ke diya amar Pitri laga anugrah laga daan dwara, moi etu susamachar laga sewak hoise. Moi sob pobitro manuh khan majot te sob pora niche hoilebi, Porjati khan ke Khrista laga sima nathaka dhun-sompotti prachar koribole, etu anugrah moi ke dise, aru sob jinis sristi kora amar Pitri te juga juga pora lukai rakha, etu gupto kotha laga yojona sob ke dikhai dibole, eneka hoile girja dwara amar Pitri laga bisi rokom laga gyaan tu sorgo khan te thaka saahb khan aru adhikari khan ke etiya jonai dibo. Etu to amar Prabhu Khrista Jisu te Tar pura kora ananta uddeshyo hisab te ahhise, Tar te biswas kora pora, amikhan mon dangor aru bhorosa pora Tar usor te ahhibo paribo. Etu karne moi tumikhan ke binti kori ase, tumikhan nimite moi dukh kosto pua karne mon haru na koribi—etu to tumikhan laga mohima ase.

Paul pora Pitri laga Poripurnota Nimite Prarthana Kora

Etu karne moi Pitri laga age te moi laga anthu tekai ase, Tar pora sorgo aru prithibi te thaka sob poribar tu nijor nam pai, ^b Tar mohima laga dhun-sompotti pora, Tar Atma dwara tumikhan laga bhitor laga manuh te, Tai tumikhan ke shakti pora takot dibo, eneka hoile Khrista biswas dwara tumikhan laga mon khan te thakibo, aru tumikhan, morom te jor pathai kene aru mojbut hoi kene, Isor laga sob pobitro manuh khan logote, chaurai aru lamba aru ocha aru gobhir kiman ase etu bujibole takot pabo, aru gyaan pora bhi bisi dangor Khrista laga morom jani lobo, eneka hoile tumikhan amar Pitri laga sob poripurnota pora bhorta hobo.

Amikhan mangi bola ba bhabi bola sob pora bhi bisi dur tak koribo para, amikhan bhitor te kaam kora shakti hisab te, amar Pitri ke— Girja te aru Khrista Jisu te, sob juga khan te, hodai aru hodai nimite, Tar ke mohima hobi. Amen.