Mga Taga-Efeso 3

3 ¹Tungod niini ako, si Pablo, ang binilanggo ni Cristo Jesus alang kaninyo nga mga Hentil, ^a a v1 Ang tudling-pulong ni Pablo naputol dinhi ug gibalik pag-usab sa “Tungod niini” diha sa bersikulo 14. ²nga nagtuo nga nadungog na ninyo ang pagkatinugyanan sa grasya sa atong Amahan nga gihatag kanako alang kaninyo, ³kon giunsa pagpaila kanako ang misteryo pinaagi sa pinadayag, sumala sa akong daklit nga gisulat na sa itaas. ⁴Kon inyong basahon kini, inyong masabtan ang akong panabot sa misteryo ni Cristo, ⁵nga wala ipaila sa mga tawo sa nangaging mga kaliwatan, apan karon gipadayag pinaagi sa Espiritu ngadto sa iyang balaang mga apostoles ug mga propeta, ⁶nga ang mga Hentil mga kaubang manununod, mga sakop sa mao ra nga lawas, ug mga kaubang umaambit sa saad, diha kang Cristo Jesus, pinaagi sa maayong balita. ⁷Nahimo akong alagad niini nga maayong balita pinaagi sa gasa sa grasya sa atong Amahan, nga gihatag kanako pinaagi sa iyang gahom nga naglihok. ⁸Bisan tuod ako mao ang labing ubos sa tanang mga balaan, kini nga grasya gihatag kanako: sa pagwali sa dili matugkad nga mga bahandi ni Cristo ngadto sa mga Hentil, ⁹ug sa pagpakita sa tanan sa laraw sa misteryo, nga gitago sulod sa mga katuigan diha sa atong Amahan nga naglalang sa tanang mga butang, ¹⁰aron nga pinaagi sa iglesia, ang nagkadaiyang kaalam sa atong Amahan ipaila na karon ngadto sa mga punoan ug mga kagamhanan sa kalangitan. ¹¹Kini subay sa walay kataposang katuyoan nga iyang gituman diha kang Cristo Jesus nga atong Ginoo, ¹²nga pinaagi kaniya aduna kitay kaisog ug masaligong pag-adto pinaagi sa pagtuo kaniya. ¹³Busa mangamuyo ako kaninyo: ayaw kamo pagkaluya tungod sa akong mga pag-antos alang kaninyo—kini mao ang inyong himaya.

Nag-ampo si Pablo alang sa Kahupnganan sa Amahan

¹⁴Tungod niini nagaluhod ako atubangan sa Amahan, ¹⁵nga gikan kaniya ang matag banay sa langit ug sa yuta nagadawat sa ngalan niini, ^b b v15 Ang matag banay sa langit ug sa yuta nagadawat sa ngalan niini gikan sa atong Amahan — siya mao ang tuboran sa tanang pagkaamahan, ug walay pagkabanay nga naglungtad gawas kaniya. ¹⁶nga gikan sa kadagaya sa iyang himaya iyang lig-onon kamo uban sa gahom pinaagi sa iyang Espiritu, diha sa kinahiladman ninyong kaugalingon, ¹⁷aron si Cristo magpuyo sa inyong mga kasingkasing pinaagi sa pagtuo, ug kamo, nga nakagamot ug napahiluna diha sa gugma, ¹⁸makabaton, uban sa tanang balaang katawhan sa Dios, sa kusog sa pagsabot sa gilapdon ug gitas-on ug kahabogon ug kahiladman, ¹⁹ug sa pag-ila sa gugma ni Cristo, nga labaw sa kahibalo, aron kamo mapuno sa tibuok kahupnganan sa atong Amahan.

²⁰Ngadto sa atong Amahan, nga makahimo sa labaw pa kaayo sa tanan natong gipangayo o gihanduraw, pinaagi sa gahom nga naglihok dinhi kanato. ²¹Himaya kaniya diha sa iglesia ug diha kang Cristo Jesus, sa tanang mga kaliwatan, hangtod sa kahangtoran. Amen.