Me basika na mukanda
Dibuku

Mambu ya Kinsweki Yina Ba Pesaka Polo

Polo ke tendula samu na yinki yandi kele na boloko: ba pesaka yandi mansweki ya Tata ya beto, ti bayina kele ve ba-Zwife kele bantu ya kuzwa kimvwama kintwadi, banzenza ve. Yandi ke bokila yandi mosi muntu ya fyoti mpenza na kati ya bantu nyonso ya longo. Na manima, yandi ke bika kuswana mpe ke fukama na ntwala ya Tata, na kusamba ngolo samu na kubakula luzolo yina me luta mayela.

Kapu 3.

Samu na dyambu yayi, munu Polo, muntu ya boloko ya Yesu-Klisto samu na beno yina kele ve ba-Zwife, a a v1 Mpova ya Polo ke suka awa mpe yandi ke banda yawu dyaka na «Samu na dyambu yayi» na ndambu 14. mu banza ti beno me kuwa mutindu ya kutwadisa kisalu ya bumbote ya Tata ya beto, yina ba pesaka munu samu na beno, mutindu mansweki monikinaka munu na nzila ya kumonikina, mutindu mu me sonika yawu na mwa bangogo na zulu. Ntangu beno ke tanga yawu, beno lenda bakula mayela ya munu na mambu ya mansweki ya Klisto, yina bantu ya bambutukulu ya ntama zabaka ve, kasi ntangu yayi Mpeve me monikina yawu na bantumwa ya longo mpe bambikudi ya yandi, ti bayina kele ve ba-Zwife kele mpe bantu ya kuzwa kimvwama kintwadi, bitini ya nzutu mosi, mpe bakintwadi na nsilulu, na Yesu-Klisto, na nzila ya Nsangu ya Mbote. Mu kumaka kisadi ya Nsangu ya Mbote yayi na nzila ya dikabu ya bumbote ya Tata ya beto, yina ba pesaka munu na ngolo ya yandi yina ke salaka. Ata mu me lutila buntwenya na kati ya bantu nyonso ya longo, ba pesaka munu bumbote yayi: samu na kuzabisa bimvwama ya Klisto yina kele na nsuka ve na bayina kele ve ba-Zwife, mpe kulakisa bantu nyonso lukanu ya mansweki, yina vwandaka ya kubumbama katuka ntama na kati ya Tata ya beto yina yidikaka bima nyonso, samu ti na nzila ya dibuundu, ntangu yayi ba monikina ndwenga ya mitindu mingi ya Tata ya beto na bamfumu mpe bayina kele na lulendo na mazulu. Yawu vwandaka mutindu lukanu ya seko yina yandi lungisaka na Yesu-Klisto, Mfumu ya beto, yina na yandi beto kele na kikesa mpe na kivuvu nyonso ya kukuma pene-pene na Nzambi na nzila ya kiminu na yandi. Na yina, mu ke lomba beno: beno lemba ntima ve samu na bampasi ya munu samu na beno, yawu kele nkembo ya beno.

Polo Ke Sambidila Bunene ya Tata

Samu na dyambu yayi, mu ke fukama na makoto na ntwala ya Tata, yina na yandi konso dikanda na zulu mpe na ntoto ke bakaka nkumbu ya yawu, b b v15 Konso dikanda na zulu mpe na ntoto ke bakaka nkumbu ya yawu na Tata ya beto — yandi kele nto ya butata nyonso, mpe kikalulu ya dikanda ata mosi kele ve na kukonda yandi. samu ti na bimvwama ya nkembo ya yandi, yandi kindisa beno na ngolo na nzila ya Mpeve ya yandi, na kati-kati ya moyo ya beno, samu ti Klisto zinga na bantima ya beno na nzila ya kiminu, mpe beno, yina me simba misisa mpe ba me tunga beno na luzolo, beno vwanda na ngolo, kintwadi na bantu nyonso ya longo ya Nzambi, ya kubakula bunene mpe yinda mpe mutela mpe mudindu, mpe kuzaba luzolo ya Klisto, yina me luta luzabu nyonso, samu ti beno fuluka na bunene nyonso ya Tata ya beto.

Na Tata ya beto, yina lenda kusala mambu ya kulutila nyonso yina beto ke lomba to ke yindula, na nzila ya ngolo yina ke salaka na kati ya beto. Nkembo kuvwanda na yandi na kati ya dibuundu mpe na Yesu-Klisto, na bambutukulu nyonso, na bamvula na bamvula ya seko. Ameni.