Eksodu 40

40 ¹Nígbà náà ni Baba wa sọ fún Mose pé:

²“Ní ọjọ́ kìíní oṣù kìíní ni kí o gbé àgọ́ náà, àgọ́ àjọ, ró. ³Gbé àpótí ẹ̀rí sínú rẹ̀, kí o sì fi aṣọ ìkélé náà bo àpótí náà. ⁴Mú tábìlì náà wá, tò àwọn ohun tí ń bẹ lórí rẹ̀, mú ọ̀pá fìtílà náà wá, kí o sì tan àwọn fìtílà rẹ̀. ⁵Gbé pẹpẹ wúrà fún tùràrí síwájú àpótí ẹ̀rí náà, kí o sì gbé aṣọ ìkélé náà sí ẹnu-ọ̀nà àgọ́ náà. ⁶Gbé pẹpẹ ẹbọ sísun síwájú ẹnu-ọ̀nà àgọ́ náà, àgọ́ àjọ, ⁷kí o sì gbé agbada náà sáàrin àgọ́ àjọ àti pẹpẹ náà, kí o sì fi omi sínú rẹ̀. ⁸Gbé àgbàlá náà ró yí i ká, kí o sì gbé aṣọ ìkélé náà kọ́ sí ẹnu-bodè àgbàlá náà.

⁹“Mú òróró ìfòróróyàn náà, kí o sì fi yàn àgọ́ náà àti ohun gbogbo tí ń bẹ nínú rẹ̀; ya á sí mímọ́ pẹ̀lú gbogbo ohun èlò rẹ̀, yóò sì jẹ́ mímọ́. ¹⁰Fi òróró yàn pẹpẹ ẹbọ sísun náà àti gbogbo ohun èlò rẹ̀; ya pẹpẹ náà sí mímọ́, pẹpẹ náà yóò sì jẹ́ mímọ́ jùlọ. ¹¹Fi òróró yàn agbada náà àti ẹsẹ̀ rẹ̀, kí o sì ya á sí mímọ́.

¹²“Nígbà náà, mú Aaroni àti àwọn ọmọ rẹ̀ wá sí ẹnu-ọ̀nà àgọ́ àjọ, kí o sì fi omi wẹ̀ wọ́n. ¹³Fi aṣọ mímọ́ wọ Aaroni lára, fi òróró yàn án kí o sì ya á sí mímọ́, kí ó lè máa ṣe iṣẹ́ àlùfáà fún mi. ¹⁴Mú àwọn ọmọ rẹ̀ wá; fi ẹ̀wù wọ̀ wọ́n. ¹⁵Fi òróró yàn wọ́n gẹ́gẹ́ bí o ti fi yàn baba wọn, kí wọ́n lè máa ṣe iṣẹ́ àlùfáà fún mi. Ìfòróróyàn wọn yóò fún wọn ní iṣẹ́ àlùfáà tí yóò dúró láé fún gbogbo ìran wọn.”

¹⁶Mose sì ṣe ohun gbogbo gẹ́gẹ́ bí Baba wa ti pàṣẹ fún un. ¹⁷Ní oṣù kìíní ọdún kejì, ní ọjọ́ kìíní oṣù náà, ni a gbé àgọ́ náà ró. ¹⁸Mose gbé àgọ́ náà ró: ó gbé àwọn ihò ìtẹ̀bọ̀ rẹ̀ kalẹ̀, ó gbé àwọn pákó rẹ̀ ró, ó fi àwọn ọ̀pá rẹ̀ sí i, ó sì gbé àwọn òpó rẹ̀ ró. ¹⁹Ó na aṣọ-àgọ́ náà bo àgọ́ náà, ó sì fi ìbòrí rẹ̀ bò ó lórí, gẹ́gẹ́ bí Baba wa ti pàṣẹ fún Mose. ²⁰Ó mú ẹ̀rí náà, ó fi í sínú àpótí náà, ó fi àwọn ọ̀pá sí àpótí náà, ó sì gbé ìtẹ́ àánú lé orí àpótí náà. ²¹Ó mú àpótí náà wá sínú àgọ́ náà, ó so aṣọ ìkélé ìdáǹdè náà kọ́, ó sì fi bo àpótí ẹ̀rí náà, gẹ́gẹ́ bí Baba wa ti pàṣẹ fún Mose. ²²Ó gbé tábìlì náà sínú àgọ́ àjọ, ní ìhà àríwá àgọ́ náà, ní òde aṣọ ìkélé náà, ²³ó sì tò àkàrà náà sí orí rẹ̀ níwájú Baba wa, gẹ́gẹ́ bí Baba wa ti pàṣẹ fún Mose. ²⁴Ó gbé ọ̀pá fìtílà náà sínú àgọ́ àjọ, ní òdìkejì tábìlì náà, ní ìhà gúúsù àgọ́ náà, ²⁵ó sì tan àwọn fìtílà náà níwájú Baba wa, gẹ́gẹ́ bí Baba wa ti pàṣẹ fún Mose. ²⁶Ó gbé pẹpẹ wúrà náà sínú àgọ́ àjọ níwájú aṣọ ìkélé náà, ²⁷ó sì sun tùràrí olóòórùn dídùn sí orí rẹ̀, gẹ́gẹ́ bí Baba wa ti pàṣẹ fún Mose. ²⁸Nígbà náà ni ó gbé aṣọ ìkélé náà kọ́ sí ẹnu-ọ̀nà àgọ́ náà. ²⁹Ó gbé pẹpẹ ẹbọ sísun sí ẹnu-ọ̀nà àgọ́ náà, àgọ́ àjọ, ó sì rú ẹbọ sísun àti ẹbọ ọkà sí orí rẹ̀, gẹ́gẹ́ bí Baba wa ti pàṣẹ fún Mose. ³⁰Ó gbé agbada náà sáàrin àgọ́ àjọ àti pẹpẹ náà, ó sì fi omi sínú rẹ̀ fún ìwẹ̀, ³¹Mose, Aaroni, àti àwọn ọmọ rẹ̀ sì fi wẹ ọwọ́ àti ẹsẹ̀ wọn. ³²Nígbàkigbà tí wọ́n bá wọ àgọ́ àjọ tàbí tí wọ́n bá súnmọ́ pẹpẹ náà, wọ́n a wẹ̀, gẹ́gẹ́ bí Baba wa ti pàṣẹ fún Mose. ³³Ó gbé àgbàlá náà ró yí àgọ́ náà àti pẹpẹ náà ká, ó sì gbé aṣọ ìkélé náà kọ́ sí ẹnu-bodè àgbàlá náà. Báyìí ni Mose parí iṣẹ́ náà.

Ògo Rẹ̀ Kún Àgọ́ Náà

³⁴Nígbà náà ni àwọsánmà bo àgọ́ àjọ, ògo Baba wa sì kún inú àgọ́ náà. ³⁵Mose kò sì lè wọ àgọ́ àjọ, nítorí àwọsánmà náà bà lé e lórí, ògo Baba wa sì kún inú àgọ́ náà. ³⁶Nígbàkigbà tí àwọsánmà náà bá gòkè kúrò lórí àgọ́ náà, àwọn ọmọ Israẹli a gbéra láti máa tẹ̀síwájú nínú gbogbo àwọn ìdúró ìrìnàjò wọn; ³⁷ṣùgbọ́n bí àwọsánmà náà kò bá gòkè, wọn kì í gbéra títí di ọjọ́ tí ó bá gòkè. ³⁸Nítorí àwọsánmà Baba wa bo àgọ́ náà ní ọ̀sán, iná sì wà nínú rẹ̀ ní òru, ní ojú gbogbo ilé Israẹli ní gbogbo ìrìnàjò wọn.