I-Eksodusi 40

40 ¹UBaba wethu wakhuluma kuMose, wathi:

²"Misa itabernakele, itende lokuhlangana, ngosuku lokuqala lwenyanga yokuqala. ³Beka kulo umphongolo wobufakazi, uwusithe umphongolo ngesihenqo. ⁴Ngenisa itafula, uhlele okuphezu kwalo, ungenise uthi lwesibani, ukhanyise izibani zalo. ⁵Beka i-altare legolide lempepho phambi komphongolo wobufakazi, ubeke isihenqo somnyango wetabernakele. ⁶Beka i-altare lomnikelo wokushiswa phambi komnyango wetabernakele, itende lokuhlangana, ⁷ubeke umcengezi phakathi kwetende lokuhlangana ne-altare, uthele amanzi kuwo. ⁸Misa igceke nxazonke, ulengise isihenqo esangweni legceke.

⁹"Thatha amafutha okugcoba, ugcobe itabernakele nakho konke okukulo; ulingcwelise kanye nempahla yalo yonke, liyakuba ngcwele. ¹⁰Gcoba i-altare lomnikelo wokushiswa nezitsha zalo zonke; ungcwelise i-altare, i-altare liyakuba ngcwelengcwele. ¹¹Gcoba umcengezi nesisekelo sawo, uwungcwelise.

¹²"Ulethe u-Aroni namadodana akhe emnyango wetende lokuhlangana, ubageze ngamanzi. ¹³Gqokisa u-Aroni izingubo ezingcwele, umgcobe umngcwelise, ukuze angenzele umsebenzi wobupristi. ¹⁴Ulethe amadodana akhe, uwagqokise izambatho. ¹⁵Ubagcobe njengoba ugcobe uyise, ukuze bangenzele umsebenzi wobupristi. Ukugcotshwa kwabo kubanika ubupristi obumi njalo kuzo zonke izizukulwane."

¹⁶UMose wenza konke njengokuba uBaba wethu emyalile. ¹⁷Ngenyanga yokuqala yonyaka wesibili, ngosuku lokuqala lwenyanga, itabernakele lamiswa. ¹⁸UMose wamisa itabernakele: wabeka izisekelo zalo, wamisa amapulangwe alo, wafaka imishuqulu yalo, wamisa izinsika zalo. ¹⁹Weneka itende phezu kwetabernakele, wabeka isembozo salo phezu kwalo, njengokuba uBaba wethu emyalile uMose. ²⁰Wathatha ubufakazi, wabufaka emphongolweni, wafaka imizaca emphongolweni, wabeka isihlalo somusa phezu komphongolo. ²¹Wangenisa umphongolo etabernakele, walengisa isihenqo sokusitha, wawusitha umphongolo wobufakazi, njengokuba uBaba wethu emyalile uMose. ²²Wabeka itafula etendeni lokuhlangana, ngasenyakatho yetabernakele, ngaphandle kwesihenqo, ²³wahlela isinkwa phezu kwalo phambi kukaBaba wethu, njengokuba uBaba wethu emyalile uMose. ²⁴Wabeka uthi lwesibani etendeni lokuhlangana, malungana netafula, ngaseningizimu yetabernakele, ²⁵wamisa izibani phambi kukaBaba wethu, njengokuba uBaba wethu emyalile uMose. ²⁶Wabeka i-altare legolide etendeni lokuhlangana phambi kwesihenqo, ²⁷washisa impepho enuka kamnandi phezu kwalo, njengokuba uBaba wethu emyalile uMose. ²⁸Walengisa isihenqo somnyango wetabernakele. ²⁹Wabeka i-altare lomnikelo wokushiswa ngasemnyango wetabernakele, itende lokuhlangana, wanikela phezu kwalo umnikelo wokushiswa nomnikelo wempuphu, njengokuba uBaba wethu emyalile uMose. ³⁰Wabeka umcengezi phakathi kwetende lokuhlangana ne-altare, wathela amanzi kuwo okokugeza, ³¹ngawo uMose, no-Aroni, namadodana akhe bageza izandla zabo nezinyawo zabo. ³²Njalo lapho bengena etendeni lokuhlangana noma besondela e-altare, babegeza, njengokuba uBaba wethu emyalile uMose. ³³Wamisa igceke nxazonke zetabernakele ne-altare, walengisa isihenqo esangweni legceke. Kanjalo uMose wawuqeda umsebenzi.

Inkazimulo Yakhe Igcwalisa Itabernakele

³⁴Ifu lasibekela itende lokuhlangana, inkazimulo kaBaba wethu yagcwalisa itabernakele. ³⁵UMose wayengenakungena etendeni lokuhlangana, ngokuba ifu lalihlezi phezu kwalo, inkazimulo kaBaba wethu yagcwalisa itabernakele. ³⁶Njalo lapho ifu lisuka phezu kwetabernakele, abantwana bakwa-Israyeli babesuka kuzo zonke izinkambo zabo; ³⁷kepha uma ifu lingasuki, babengasuki kuze kufike usuku lokusuka kwalo. ³⁸Ngokuba ifu likaBaba wethu lalisibekela itabernakele emini, kukhona umlilo kulo ebusuku, kubonakala kuyo yonke indlu ka-Israyeli ezinkambweni zabo zonke.