Boueibü Ngühkhüm
Po shaangbounyeta pendou phoan, saüenkuan hoba aeibou kishang to phokei, Aron si haoeibü shou shuong deiei sakko neisimei yukkukei. Kheijinei mangei lemshang neichem thükenkei, hoba seneibü Boueibü soneikangbü kho khünan teikei, khoei Mosa koukhün to leijung alousonen. Ho ka chenei, mangeikei haoen aila meimeilaje jananlabü.
40 1Kheijinei seneibü Bouei Mosa to laukei,
2“Shaangbou lit shaangbounyeta nyi lemshang neichem, kamshang neichem kho yeiashi. 3Khünei ngühkhüm busen phoshi, hoba ngühkhüm busen kho thangbü neiei yuklepashi. 4Khümsok khüto leian loushi, hoba khoeibü peisilei küpjembo phoshi, hoba wanthung denshang khüto leian loushi, hoba khoeibü wanthung shuong küman phoshi. 5Honei kümbü jen juokbü lemshang kho ngühkhüm busen thedanga phoshi, hoba lemshang neichem koukhüna thangjin phoshi. 6Juokbü lembü lemshang kho lemshang neichem kamshang neichem koukhün thedanga phoshi, 7hoba phauyaang kho kamshang neichem si lemshang kanglanga phoshi, hoba khünei dei jinkushi. 8Khongmang kho kaijembo yeiashi, hoba khongmang koukhüna thangbü antian phoshi.
9“Naangkulabü onang sungjung louan lemshang neichem hoba khünei kibü pendou la naangkushi; kho hoba khoeibü peisilei pendou saüenkushi, hoba kho saopobü kilabü. 10Juokbü lembü lemshang hoba khoeibü thungsiphau pendou la naangkushi; lemshang kho saüenkushi, hoba lemshang kho aeibou saopobü kilabü. 11Phauyaang hoba kho denshang la naangkushi, hoba kho saüenkushi.
12Hobaje nyi Aron hoba hao shousi shuong kamshang neichem koukhün khüto leijung louan haoen la mang yutiashi. 13Aron la saopobü neisimei yukkushi, hoba ungshedboueibü kümsileiei ngo khangenla shanga hao la naangkuko saüenan phokushi. 14Haoeibü shousi shuong leijung louashi; haoen to mangyuk yukkuashi. 15Haoeibü bou la naangkubü tegü haoen la naangkushi, müilingbü kümsileiei ngo khangenla shanga. Haoeneibü naangkubü haoen la meten meten ponpen shanga ungshed kümsilei kulabü.”
16Bouei hao la sakkubü tegü pendou Mosaei kümbei. 17Nyibou po shaangbou lit shaangbounyeta lemshang neichem yeikei. 18Hobaje Mosaei lemshang neichem yeikei; haoei kho hanleplabü shuong phokei, hoba kho wa shuong jinkei, hoba kho angkhüm shuong jinkei, hoba kho thaonyu shuong lotian phokei. 19Kheijinei haoei neichem kho lemshang neichem thüka imkei, hoba kho thüka kho yuklepbü phokei, seneibü Bouei Mosa la sakkubü tegü kikei. 20Hobaje haoei ngühkhüm kho sungan busen maang to jinkei, hoba busen thüka kaang jinkei, hoba onou setshang kho busen thüka phokei. 21Hoba haoei busen kho lemshang neichem to jungan lotkei, hoba thangtetbü nei sungbakei, hoba ngühkhüm busen kho küpletkei, seneibü Bouei Mosa la sakkubü tegü kikei. 22Hobaje haoei khümsok kho kamshang neichema, lemshang neichem yungkük aenei, thangtetbü nei thükaenei phokei, 23hoba kho thüka wentek kho seneibü Bou thedanga thenkei thenko phokei, seneibü Bouei Mosa la sakkubü tegü kikei. 24Hoba haoei wanthung denshang kho kamshang neichema, khümsok thedanga, lemshang neichem chaang aenei phokei, 25hoba seneibü Bou thedanga wanthung shuong phokei, seneibü Bouei Mosa la sakkubü tegü kikei. 26Hobaje haoei honeibü lemshang kho kamshang neichema, thangtetbü nei thedanga phokei, 27hoba kho thüka ponlemhibü jen juokkei, seneibü Bouei Mosa la sakkubü tegü kikei. 28Kheijinei haoei lemshang neichem koukhüna thangbü jinkei. 29Hobaje haoei juokbü lembü lemshang kho lemshang neichem kamshang neichem koukhüna phokei, hoba kho thüka juokbü lembü hoba shausiyung lembü kukei, seneibü Bouei Mosa la sakkubü tegü kikei. 30Hoba haoei phauyaang kho Kamshang Neichem hoba lemshang kangla to phokei, hoba sakla shanga thüka dei jinkei, 31hoba khoei Mosa, Aron hoba haoeibü shousi shuongei haoeneibü you si ik makkei. 32Ladang haoen kamshang neichem to atlaje, ayingsi lemshang nyangko loulaje, haoen makkei, seneibü Bouei Mosa la sakkubü tegü kikei. 33Hobaje haoei lemshang neichem hoba lemshang kaijembo khongmaang yeikei, hoba khongmaang koukhüna thangbü jinkei. Kho tegü Mosaei kümsilei kho wankei.
Haoeibü soneikangbüei lemshang neichem shenda
34Kheijinei sangmeiei kamshang neichem khuilepbei, hoba seneibü Bou soneikangbüei lemshang neichem kho shenkei. 35Mosaei kamshang neichem to atla aku, aishanga sangmei kho thüka shatkei, hoba seneibü Bou soneikangbüei lemshang neichem shenkei. 36Ladang ong sangmei kho lemshang neichem thüka tonenlaje, Israel shousi shuongei lulueibü wakoua kaoen che ka che to meimeijung haukei; 37lausikei sangmei kho atonenlaje, kho tonenlabü chalou sühko haoen meimeijung ohau. 38Aishanga chaloua seneibü Bou sangmeiei lemshang neichem khuilepbei, hoba nangnakje kho thüka wan kikei, hoba haoeneibü wakou pendoua Israel chung pendou thedanga hapbü kikei.
