Ọpụpụ 40 FHB Father's Heart Bible™

40 ¹Mgbe ahụ, Nna anyị gwara Mosis okwu, sị:

²“Guzobe ụlọ nzute, bụ ụlọ ikwu nzute, nʼụbọchị mbụ nke ọnwa mbụ. ³Dọnye igbe ọgbụgba ndụ ahụ nʼime ya, jiri ákwà mgbochi ahụ kpuchie igbe ahụ. ⁴Bubata tebụl ahụ, dozie ihe ndị e dokwasịrị nʼelu ya, bubatakwa ihe ịdọkwasị oriọna ahụ, mụnyekwa oriọna ya niile. ⁵Dọba ebe ịchụ àjà ọlaedo nke ihe na-esi ísì ụtọ nʼihu igbe ọgbụgba ndụ ahụ, kwụbakwa ákwà mkpuchi nʼọnụ ụzọ mbata nke ụlọ nzute. ⁶Dọba ebe ịchụ àjà nsure ọkụ nʼihu ọnụ ụzọ mbata nke ụlọ nzute, bụ ụlọ ikwu nzute, ⁷dọbakwa efere ukwu ịsa ahụ nʼetiti ụlọ ikwu nzute na ebe ịchụ àjà ahụ, tinyekwa mmiri nʼime ya. ⁸Guzobe ogige ahụ gburugburu, kokwasịkwa ákwà mkpuchi nʼọnụ ụzọ ámá ogige ahụ.

⁹“Were mmanụ otite ahụ tee ụlọ nzute na ihe niile dị nʼime ya; doo ya nsọ, ya na ngwongwo ya niile, ọ ga-abụkwa ihe dị nsọ. ¹⁰Tee ebe ịchụ àjà nsure ọkụ na ngwá ya niile mmanụ; doo ebe ịchụ àjà ahụ nsọ, ebe ịchụ àjà ahụ ga-abụ ihe kachasị nsọ. ¹¹Tee efere ukwu ịsa ahụ na ihe ndọkwasị ya mmanụ, doo ya nsọ.

¹²“Mgbe ahụ, kpọta Erọn na ụmụ ya ndị ikom nʼọnụ ụzọ mbata nke ụlọ ikwu nzute, jiri mmiri saa ha. ¹³Yikwasị Erọn uwe nsọ, tee ya mmanụ, doo ya nsọ, ka o jeere m ozi dịka onye nchụàjà. ¹⁴Kpọta ụmụ ya ndị ikom, yikwasị ha uwe ogologo. ¹⁵Tee ha mmanụ dịka i si tee nna ha mmanụ, ka ha jeere m ozi dịka ndị nchụàjà. Ọtite ha ga-enye ha ọrụ nchụàjà nke na-adịgide ruo ọgbọ niile.”

¹⁶Mosis mere ihe niile dịka Nna anyị nyere ya nʼiwu. ¹⁷Nʼọnwa mbụ nke afọ nke abụọ, nʼụbọchị mbụ nke ọnwa ahụ, e guzobere ụlọ nzute ahụ. ¹⁸Mosis guzobere ụlọ nzute ahụ: ọ dọnyere ụkwụ ya niile, kwụba mbadamba osisi ya niile, tinye mkpọrọ osisi ya niile, guzobe ogidi ya niile. ¹⁹Ọ gbasara ụlọ ikwu ahụ nʼelu ụlọ nzute ahụ, tụkwasị ihe mkpuchi ya nʼelu ya, dịka Nna anyị nyere Mosis nʼiwu. ²⁰O weere ihe àmà ahụ tinye ya nʼime igbe ahụ, dọnye mkpara ndị ahụ nʼigbe ahụ, dọkwasị oche ebere ahụ nʼelu igbe ahụ. ²¹O bubatara igbe ahụ nʼime ụlọ nzute ahụ, kokwasị ákwà mgbochi nke na-eme nkpuchi, were ya kpuchie igbe ọgbụgba ndụ ahụ, dịka Nna anyị nyere Mosis nʼiwu. ²²O doziri tebụl ahụ nʼime ụlọ ikwu nzute, nʼakụkụ ugwu nke ụlọ nzute ahụ, nʼèzí ákwà mgbochi ahụ, ²³hazie achịcha nʼelu ya nʼihu Nna anyị, dịka Nna anyị nyere Mosis nʼiwu. ²⁴O dobere ihe ịdọkwasị oriọna ahụ nʼime ụlọ ikwu nzute, nʼụzọ chere tebụl ahụ ihu, nʼakụkụ ndịda nke ụlọ nzute ahụ, ²⁵mụnye oriọna ndị ahụ nʼihu Nna anyị, dịka Nna anyị nyere Mosis nʼiwu. ²⁶O dobere ebe ịchụ àjà ọlaedo ahụ nʼime ụlọ ikwu nzute, nʼihu ákwà mgbochi ahụ, ²⁷surekwaa ihe na-esi ísì ụtọ nʼelu ya, dịka Nna anyị nyere Mosis nʼiwu. ²⁸Mgbe ahụ, o kwụbara ákwà mkpuchi nʼọnụ ụzọ mbata nke ụlọ nzute ahụ. ²⁹O dobere ebe ịchụ àjà nsure ọkụ nʼọnụ ụzọ mbata nke ụlọ nzute ahụ, bụ ụlọ ikwu nzute, chụọ nʼelu ya àjà nsure ọkụ na àjà mkpụrụ ọka, dịka Nna anyị nyere Mosis nʼiwu. ³⁰O dobere efere ukwu ịsa ahụ nʼetiti ụlọ ikwu nzute na ebe ịchụ àjà ahụ, tinye mmiri nʼime ya maka ịsa ahụ, ³¹Mosis na Erọn na ụmụ ya ndị ikom jiri ya saa aka ha na ụkwụ ha. ³²Mgbe ọbụla ha banyere nʼụlọ ikwu nzute maọbụ bịaruo ebe ịchụ àjà ahụ nso, ha na-asa onwe ha, dịka Nna anyị nyere Mosis nʼiwu. ³³O guzobere ogige ahụ gburugburu ụlọ nzute ahụ na ebe ịchụ àjà ahụ, kwụba ákwà mkpuchi nʼọnụ ụzọ ámá ogige ahụ. Otu a ka Mosis si rụchaa ọrụ ahụ.

Ebube Ya Jupụtara nʼỤlọ Nzute

³⁴Mgbe ahụ, igwe ojii kpuchiri ụlọ ikwu nzute ahụ, ebube Nna anyị jupụtakwara nʼụlọ nzute ahụ. ³⁵Mosis enweghị ike ịba nʼụlọ ikwu nzute ahụ, nʼihi na igwe ojii ahụ dakwasịrị nʼelu ya, ebube Nna anyị jupụtakwara nʼụlọ nzute ahụ. ³⁶Mgbe ọbụla igwe ojii ahụ si nʼelu ụlọ nzute ahụ kwụlie, ụmụ Izrel na-ebili njem ha, nʼusoro ọbụla nke njem ha; ³⁷ma ọ bụrụ na igwe ojii ahụ ebilighị, ha anaghị ebili njem, ruo ụbọchị ọ ga-ebili. ³⁸Nʼihi na igwe ojii Nna anyị na-ekpuchi ụlọ nzute ahụ nʼehihie, ọkụ na-adịkwa nʼime ya nʼabalị, nke ụlọ Izrel niile na-ahụ anya, nʼoge njem ha niile.