പുറപ്പാട് 40 FHB Father's Heart Bible™

40 ¹അപ്പോൾ നമ്മുടെ പിതാവ് മോശയോട് അരുളിച്ചെയ്തു:

²“ഒന്നാം മാസം ഒന്നാം ദിവസം നീ സമാഗമകൂടാരമായ തിരുനിവാസം ഉയർത്തി സ്ഥാപിക്കണം. ³സാക്ഷ്യപെട്ടകം അതിൽ വച്ച് തിരശ്ശീലകൊണ്ട് പെട്ടകം മറയ്ക്കണം. ⁴മേശ അകത്തു കൊണ്ടുവന്ന് അതിന്മേൽ വയ്ക്കേണ്ടവ ക്രമീകരിക്കുകയും വിളക്കുതണ്ട് അകത്തു കൊണ്ടുവന്ന് അതിന്റെ ദീപങ്ങൾ കൊളുത്തുകയും ചെയ്യണം. ⁵സ്വർണംകൊണ്ടുള്ള ധൂപപീഠം സാക്ഷ്യപെട്ടകത്തിനു മുമ്പിൽ വയ്ക്കുകയും തിരുനിവാസത്തിന്റെ വാതിൽക്കൽ മറശ്ശീല തൂക്കുകയും ചെയ്യണം. ⁶ഹോമയാഗപീഠം സമാഗമകൂടാരമായ തിരുനിവാസത്തിന്റെ വാതിലിനു മുമ്പിൽ വയ്ക്കണം; ⁷സമാഗമകൂടാരത്തിനും യാഗപീഠത്തിനും ഇടയിൽ തൊട്ടി വച്ച് അതിൽ വെള്ളം ഒഴിക്കണം. ⁸ചുറ്റും അങ്കണം ഉണ്ടാക്കുകയും അങ്കണവാതിൽക്കൽ മറശ്ശീല തൂക്കുകയും ചെയ്യണം.

⁹“അഭിഷേകതൈലം എടുത്ത് തിരുനിവാസവും അതിലുള്ള സകലവും അഭിഷേകം ചെയ്യണം; അതും അതിന്റെ സകല ഉപകരണങ്ങളും ശുദ്ധീകരിക്കണം; അപ്പോൾ അതു വിശുദ്ധമായിരിക്കും. ¹⁰ഹോമയാഗപീഠവും അതിന്റെ സകല ഉപകരണങ്ങളും അഭിഷേകം ചെയ്യണം; യാഗപീഠം ശുദ്ധീകരിക്കണം; അപ്പോൾ ആ യാഗപീഠം അതിവിശുദ്ധമായിരിക്കും. ¹¹തൊട്ടിയും അതിന്റെ കാലും അഭിഷേകം ചെയ്ത് ശുദ്ധീകരിക്കണം.

¹²“പിന്നെ അഹരോനെയും അവന്റെ പുത്രന്മാരെയും സമാഗമകൂടാരത്തിന്റെ വാതിൽക്കൽ കൊണ്ടുവന്ന് വെള്ളംകൊണ്ട് കഴുകണം. ¹³അഹരോനെ വിശുദ്ധവസ്ത്രം ധരിപ്പിച്ച് എനിക്കു പുരോഹിതശുശ്രൂഷ ചെയ്യേണ്ടതിന് അവനെ അഭിഷേകം ചെയ്ത് ശുദ്ധീകരിക്കണം. ¹⁴അവന്റെ പുത്രന്മാരെ കൊണ്ടുവന്ന് അവരെ അങ്കികൾ ധരിപ്പിക്കണം. ¹⁵അവരുടെ പിതാവിനെ അഭിഷേകം ചെയ്തതുപോലെ അവരും എനിക്കു പുരോഹിതശുശ്രൂഷ ചെയ്യേണ്ടതിന് അവരെ അഭിഷേകം ചെയ്യണം. അവരുടെ ഈ അഭിഷേകം തലമുറതലമുറയായി അവർക്കു ശാശ്വതമായ പൗരോഹിത്യം നല്കുന്നു.”

¹⁶നമ്മുടെ പിതാവ് തന്നോടു കല്പിച്ചതുപോലെ തന്നെ മോശ സകലവും ചെയ്തു. ¹⁷രണ്ടാം വർഷം ഒന്നാം മാസം ഒന്നാം ദിവസം തിരുനിവാസം ഉയർത്തി സ്ഥാപിക്കപ്പെട്ടു. ¹⁸മോശ തിരുനിവാസം ഉയർത്തി; അതിന്റെ ചുവടുകൾ വച്ചു, പലകകൾ നിർത്തി, അന്താഴങ്ങൾ ഇട്ടു, തൂണുകൾ നാട്ടി. ¹⁹നമ്മുടെ പിതാവ് മോശയോടു കല്പിച്ചിരുന്നതുപോലെ അവൻ തിരുനിവാസത്തിനു മീതേ കൂടാരം വിരിച്ച് അതിന്മേൽ പുറമൂടി ഇട്ടു. ²⁰അവൻ സാക്ഷ്യം എടുത്ത് പെട്ടകത്തിൽ വച്ച്, പെട്ടകത്തിന്മേൽ തണ്ടുകൾ ഇട്ട്, പെട്ടകത്തിനു മീതേ കൃപാസനം വച്ചു. ²¹നമ്മുടെ പിതാവ് മോശയോടു കല്പിച്ചതുപോലെ അവൻ പെട്ടകം തിരുനിവാസത്തിൽ കൊണ്ടുവന്ന്, മറയ്ക്കുന്ന തിരശ്ശീല തൂക്കി, സാക്ഷ്യപെട്ടകം മറച്ചു. ²²അവൻ സമാഗമകൂടാരത്തിൽ, തിരുനിവാസത്തിന്റെ വടക്കുവശത്ത്, തിരശ്ശീലയ്ക്കു പുറത്ത് മേശ വച്ചു; ²³നമ്മുടെ പിതാവ് മോശയോടു കല്പിച്ചിരുന്നതുപോലെ അവൻ അതിന്മേൽ നമ്മുടെ പിതാവിന്റെ സന്നിധിയിൽ അപ്പം ക്രമീകരിച്ചുവച്ചു. ²⁴അവൻ സമാഗമകൂടാരത്തിൽ, മേശയ്ക്ക് എതിരേ, തിരുനിവാസത്തിന്റെ തെക്കുവശത്ത് വിളക്കുതണ്ട് വച്ചു; ²⁵നമ്മുടെ പിതാവ് മോശയോടു കല്പിച്ചിരുന്നതുപോലെ അവൻ നമ്മുടെ പിതാവിന്റെ സന്നിധിയിൽ ദീപങ്ങൾ കൊളുത്തിവച്ചു. ²⁶അവൻ സമാഗമകൂടാരത്തിൽ തിരശ്ശീലയ്ക്കു മുമ്പിൽ സ്വർണധൂപപീഠം വച്ചു; ²⁷നമ്മുടെ പിതാവ് മോശയോടു കല്പിച്ചിരുന്നതുപോലെ അവൻ അതിന്മേൽ സുഗന്ധധൂപം കത്തിച്ചു. ²⁸പിന്നെ അവൻ തിരുനിവാസത്തിന്റെ വാതിൽക്കൽ മറശ്ശീല തൂക്കി. ²⁹നമ്മുടെ പിതാവ് മോശയോടു കല്പിച്ചതുപോലെ അവൻ സമാഗമകൂടാരമായ തിരുനിവാസത്തിന്റെ വാതിൽക്കൽ ഹോമയാഗപീഠം വച്ച് അതിന്മേൽ ഹോമയാഗവും ഭോജനയാഗവും അർപ്പിച്ചു. ³⁰അവൻ സമാഗമകൂടാരത്തിനും യാഗപീഠത്തിനും ഇടയിൽ തൊട്ടി വച്ച് കഴുകുന്നതിന് അതിൽ വെള്ളം ഒഴിച്ചു; ³¹അതിൽനിന്ന് മോശയും അഹരോനും അവന്റെ പുത്രന്മാരും കൈകാലുകൾ കഴുകി. ³²നമ്മുടെ പിതാവ് മോശയോടു കല്പിച്ചതുപോലെ അവർ സമാഗമകൂടാരത്തിൽ പ്രവേശിക്കുമ്പോഴും യാഗപീഠത്തിന് അടുത്തു ചെല്ലുമ്പോഴും കഴുകിവന്നു. ³³അവൻ തിരുനിവാസത്തിനും യാഗപീഠത്തിനും ചുറ്റും അങ്കണം ഉണ്ടാക്കി അങ്കണവാതിൽക്കൽ മറശ്ശീല തൂക്കി. അങ്ങനെ മോശ ആ വേല പൂർത്തിയാക്കി.

അവിടുത്തെ തേജസ്സ് തിരുനിവാസത്തെ നിറയ്ക്കുന്നു

³⁴അപ്പോൾ മേഘം സമാഗമകൂടാരത്തെ മൂടി; നമ്മുടെ പിതാവിന്റെ തേജസ്സ് തിരുനിവാസത്തെ നിറച്ചു. ³⁵മേഘം അതിന്മേൽ ആവസിച്ചിരുന്നതിനാലും നമ്മുടെ പിതാവിന്റെ തേജസ്സ് തിരുനിവാസത്തെ നിറച്ചിരുന്നതിനാലും മോശയ്ക്കു സമാഗമകൂടാരത്തിൽ പ്രവേശിക്കുവാൻ കഴിഞ്ഞില്ല. ³⁶തിരുനിവാസത്തിനു മീതേനിന്ന് മേഘം ഉയരുമ്പോഴൊക്കെ ഇസ്രായേൽമക്കൾ തങ്ങളുടെ യാത്രയുടെ ഓരോ ഘട്ടത്തിലും പുറപ്പെട്ടു; ³⁷എന്നാൽ മേഘം ഉയരാതിരുന്നാൽ അത് ഉയരുന്ന ദിവസംവരെ അവർ പുറപ്പെട്ടില്ല. ³⁸എന്തെന്നാൽ നമ്മുടെ പിതാവിന്റെ മേഘം പകൽ തിരുനിവാസത്തെ മൂടിയിരുന്നു, രാത്രി അതിൽ തീയും ഉണ്ടായിരുന്നു; ഇസ്രായേൽഗൃഹം മുഴുവനും തങ്ങളുടെ സകല യാത്രകളിലും അതു കണ്ടിരുന്നു.