د پلار هدايتونه
د کال په لومړۍ ورځ هر څه ودرول کېږي، مسح کېږي او خپل ځای ته ایښودل کېږي، هارون او زامن یې مینځل کېږي او جامې ورته اغوستل کېږي. بیا ورېځ خیمه پوښي او زموږ د پلار جلال یې داسې ډکوي چې موسیٰ ننوتلی نه شي. له دې وروسته، ورېځ پرېکړه کوي چې دوی کله حرکت وکړي.
40 1بيا زمونږ پلار موسىٰ ته وفرمائيل چې،
2”د اول مياشتې په اوله ورځ خېمه، يعنې د ملاقات خېمه، ودروه. 3د شاهدۍ صندوق په هغې کښې کېږده او صندوق په پردې سره پټ کړه. 4مېز دننه راوړه، د هغۀ سامان برابر کړه، چراغدان دننه راوړه او د هغۀ ډيوې بل کړه. 5د سرو زرو د خوشبوئى قربانګاه د شاهدۍ د صندوق په وړاندې کېږده او د خېمې په دروازه باندې پردۀ راوويشته. 6د سوزولو د قربانۍ قربانګاه د خېمې، يعنې د ملاقات د خېمې، د دروازې په وړاندې کېږده، 7او لګن د ملاقات د خېمې او قربانګاه په مينځ کښې کېږده او اوبۀ په کښې واچوه. 8چاره ګېرچاپېره ودروه او د چارې په دروازه باندې پردۀ راوويشته.
9”د مسح تېل واخله او خېمه او هر څۀ چې په کښې دى مسح کړه؛ هغه او د هغې ټول سامان وقف کړه، نو هغه به پاکه شى. 10د سوزولو د قربانۍ قربانګاه او د هغۀ ټول سامان مسح کړه؛ قربانګاه وقف کړه، نو قربانګاه به تر ټولو پاکه شى. 11لګن او د هغۀ تهداب مسح کړه او وقف يې کړه.
12”بيا هارون او د هغۀ زامن د ملاقات د خېمې دروازې ته راوله او په اوبو سره يې ووينځه. 13هارون ته پاک جامې واغونده، مسح يې کړه او وقف يې کړه، چې زما عبادت د اِمام په حېث وکړى. 14د هغۀ زامن راوله؛ قميصونه ورته واغونده. 15هغوئ داسې مسح کړه لکه څنګه چې تا د هغوئ پلار مسح کړو، چې زما عبادت د اِمامانو په حېث وکړى. د هغوئ مسح کول هغوئ ته د ټولو پيړو دپاره د تل دپاره د اِمامت حق ورکوى.“
16موسىٰ هر څۀ هم هغه شان وکړل لکه څنګه چې زمونږ پلار هغۀ ته حُکم ورکړے وو. 17د دوېم کال په اوله مياشت کښې، د مياشتې په اوله ورځ، خېمه ودرولے شوه. 18موسىٰ خېمه ودروله: د هغې تهدابونه يې کېښودل، د هغې چوکاټونه يې ودرول، د هغې کړکۍ يې کېښودې او د هغې ستنې يې ودرولې. 19هغۀ خېمه د خېمې پر سر خوره کړه او د هغې پوښ يې پر هغې کېښودو، لکه څنګه چې زمونږ پلار موسىٰ ته حُکم ورکړے وو. 20هغۀ شاهدى واخسته، په صندوق کښې يې کېښوده، په صندوق باندې يې ستنې ولګولې او سرپوښ يې د صندوق پر سر کېښودو. 21هغۀ صندوق خېمې ته دننه راوړو، پټوونکې پرده يې راوويشته او د شاهدۍ صندوق يې پټ کړو، لکه څنګه چې زمونږ پلار موسىٰ ته حُکم ورکړو. 22هغۀ مېز د ملاقات په خېمه کښې، د خېمې په شمالى اړخ، د پردې نه بهر کېښودو، 23او ډوډۍ يې پر هغې د زمونږ پلار په وړاندې برابره کړه، لکه څنګه چې زمونږ پلار موسىٰ ته حُکم ورکړے وو. 24هغۀ چراغدان د ملاقات په خېمه کښې، د مېز په مقابل کښې، د خېمې په جنوبى اړخ کېښودو، 25او ډيوې يې د زمونږ پلار په وړاندې ودرولې، لکه څنګه چې زمونږ پلار موسىٰ ته حُکم ورکړے وو. 26هغۀ د سرو زرو قربانګاه د ملاقات په خېمه کښې د پردې په وړاندې کېښودله، 27او خوشبوئى يې پر هغې وسوزوله، لکه څنګه چې زمونږ پلار موسىٰ ته حُکم ورکړے وو. 28بيا هغۀ د خېمې په دروازه باندې پردۀ راوويشته. 29هغۀ د سوزولو د قربانۍ قربانګاه د خېمې، يعنې د ملاقات د خېمې، په دروازه کېښودله او پر هغې يې د سوزولو قربانى او د دانو قربانى وړاندې کړه، لکه څنګه چې زمونږ پلار موسىٰ ته حُکم ورکړو. 30هغۀ لګن د ملاقات د خېمې او قربانګاه په مينځ کښې کېښودو او د وينځلو دپاره يې اوبۀ په کښې واچولې، 31او په هغو سره موسىٰ، هارون او د هغۀ زامنو خپل لاسونه او پښې ووينځلې. 32کله چې به هغوئ د ملاقات خېمې ته ننوتل يا قربانګاه ته نژدې شول، نو هغوئ به ووينځل، لکه څنګه چې زمونږ پلار موسىٰ ته حُکم ورکړو. 33هغۀ چاره د خېمې او قربانګاه ګېرچاپېره ودروله او د چارې په دروازه باندې پردۀ راوويشته. نو موسىٰ کار پوره کړو.
د هغۀ جلال خېمه ډکوى
34بيا ورېځ د ملاقات خېمه پټه کړه او د زمونږ پلار جلال خېمه ډکه کړه. 35موسىٰ د ملاقات خېمې ته ننوتلے نۀ شو، ځکه چې ورېځ پر هغې کېناسته او د زمونږ پلار جلال خېمه ډکه کړه. 36کله به چې ورېځ د خېمې د سره پورته شوه، نو بنى اِسرائيلو به د خپل سفر هرې مرحلې ته رهى شول؛ 37خو کۀ ورېځ به پورته نۀ شوه، نو هغوئ به تر هغې ورځې پورې رهى نۀ شول چې کله به هغه پورته شوه. 38ځکه چې د زمونږ پلار ورېځ به د ورځې خېمه پټوله، او د شپې به په هغې کښې اور وو، چې د اِسرائيل ټول کور ته د هغوئ په ټولو سفرونو کښې ښکارېده.
