Pitri laga Hukum khan
Saal laga prothom din te sob jinis khara korise, abhishek korise aru jaga te rakhise, Aaron aru tai laga bacha khan ke dhuise aru kapra pindhai dise. Titia meghla pora tombu ke dhaki dise aru amar Pitri laga mohima itu ke etu pura bhori dise ki Moses bhitor te jabo para nai. Etiya pora, meghla he thik kore kitia tarkhan aage jabo.
40 1Titia amar Pitri pora Moses ke eneka koise,
2“Poila mohina laga poila din te, pobitro tombu, mane milon laga tombu tu, khara kori lobi. 3Hei bhitor te sakhi laga sinduk ke rakhibi, aru porda pora sinduk tu ke dhaki dibi. 4Mej tu anibi aru etu uporte saman khan sajai thobi, deeya laga thaan ke anibi, aru etu laga deeya khan jolai dibi. 5Suna laga dhoop bedi tu sakhi laga sinduk laga age te rakhibi, aru pobitro tombu laga dorja te porda lagai dibi. 6Hom-boli laga bedi tu pobitro tombu, mane milon laga tombu laga dorja age te rakhibi, 7aru milon laga tombu aru bedi laga majot te chukti tu rakhibi, aru etu bhitor te pani halibi. 8Chari phale aangina tu khara kori lobi, aru aangina laga phatok te porda lagai dibi.
9“Abhishek laga tel loi kene pobitro tombu aru etu bhitor te thaka sob saman ke abhishek koribi; etu aru etu laga sob saman ke pobitro kori dibi, aru etu pobitro hobo. 10Hom-boli laga bedi aru etu laga sob saman ke abhishek koribi; bedi tu pobitro kori dibi, aru bedi tu sob pora bisi pobitro hobo. 11Chukti aru etu laga thaan ke abhishek koribi, aru etu pobitro kori dibi.
12“Titia Aaron aru tar laga chokra khan ke milon laga tombu laga dorja te anibi, aru pani pora tarkhan ke dhulai dibi. 13Aaron ke pobitro kapor khan pindhai dibi, aru Moi laga purohit kaam koribole, tar ke abhishek kori kene pobitro kori dibi. 14Tar laga chokra khan ke anibi; aru tarkhan ke cholla khan pindhai dibi. 15Tumi tarkhan laga baba ke abhishek kora nisena, tarkhan ke bhi abhishek koribi, titia tarkhan Moi laga purohit kaam koribo. Tarkhan laga abhishek pora tarkhan ke sob jamana tak hodai thaka purohit laga kaam dibo.”
16Amar Pitri pora Moses ke hukum diya nisena, tai sob eneka korise. 17Dusra saal laga poila mohina te, mohina laga poila din te, pobitro tombu tu khara kori dise. 18Moses pora pobitro tombu tu khara korise: tai etu laga bheti khan rakhise, takta khan khara korise, argol khan lagaise, aru khuta khan khara korise. 19Amar Pitri pora Moses ke hukum diya nisena, tai pobitro tombu uporte tombu tu bisarai dise, aru etu uporte dhaki diya kapor halai dise. 20Tai sakhi tu loi kene sinduk bhitor te rakhise, sinduk uporte danda khan lagaise, aru sinduk laga uporte doya laga ason rakhise. 21Amar Pitri pora Moses ke hukum diya nisena, tai sinduk tu pobitro tombu bhitor te anise, dhaki diya porda lagaise, aru sakhi laga sinduk ke dhaki dise. 22Tai mej tu milon laga tombu bhitor te, pobitro tombu laga uttor phale, porda laga bahar te rakhise, 23aru amar Pitri pora Moses ke hukum diya nisena, tai amar Pitri laga age te etu uporte roti khan sajai rakhise. 24Tai deeya laga thaan tu milon laga tombu bhitor te, mej laga samne, pobitro tombu laga dakshin phale rakhise, 25aru amar Pitri pora Moses ke hukum diya nisena, tai amar Pitri laga age te deeya khan jolai dise. 26Tai suna laga bedi tu milon laga tombu bhitor te, porda laga age te rakhise, 27aru amar Pitri pora Moses ke hukum diya nisena, tai etu uporte sugandh dhoop jolaise. 28Titia tai pobitro tombu laga dorja te porda lagai dise. 29Amar Pitri pora Moses ke hukum diya nisena, tai hom-boli laga bedi tu pobitro tombu, mane milon laga tombu laga dorja te rakhise, aru etu uporte hom-boli aru anaj laga boli dise. 30Tai milon laga tombu aru bedi laga majot te chukti tu rakhise, aru dhulabole etu bhitor te pani halise, 31aru etu pani pora Moses, Aaron, aru tar laga chokra khan pora tarkhan laga haat aru theng dhulaise. 32Amar Pitri pora Moses ke hukum diya nisena, jitia bhi tarkhan milon laga tombu bhitor te ghusise na bedi usorte ahhise, tarkhan dhulaise. 33Tai pobitro tombu aru bedi laga chari phale aangina khara korise, aru aangina laga phatok te porda lagai dise. Eneka kori kene Moses pora kaam tu khotom korise.
Tar laga Mohima pora Pobitro Tombu ke Bhorai Dise
34Titia badal pora milon laga tombu ke dhaki dise, aru amar Pitri laga mohima pora pobitro tombu ke bhorai dise. 35Moses milon laga tombu bhitor te ghusibole para nai, kilemane etu uporte badal bohi thakise, aru amar Pitri laga mohima pora pobitro tombu ke bhorai dise. 36Jitia bhi pobitro tombu uporte pora badal uthi jaise, Israel laga manuh khan tarkhan laga jatra te age berhai jaise; 37kintu jodi badal tu uthi najai, tene hole badal uthi ja-a din tak tarkhan berhai ja-a nai. 38Kilemane amar Pitri laga badal tu din te pobitro tombu uporte thakise, aru rati te etu bhitor te jui thakise, aru Israel laga sob ghor pora tarkhan laga sob jatra te etu dikhise.