யாத்திராகமம் 40

40 ¹பின்பு எங்கள் பிதா மோசேயை நோக்கி:

²"முதலாம் மாதத்தின் முதலாம் நாளில் ஆசரிப்புக் கூடாரமாகிய வாசஸ்தலத்தை நிறுவுவாயாக. ³அதிலே சாட்சிப் பெட்டியை வைத்து, திரையினால் பெட்டியை மறைப்பாயாக. ⁴மேஜையை உள்ளே கொண்டுவந்து அதன் பொருட்களை ஒழுங்குபடுத்தி, குத்துவிளக்கை உள்ளே கொண்டுவந்து அதன் அகல்களை ஏற்றுவாயாக. ⁵பொன்னினாலான தூபபீடத்தை சாட்சிப் பெட்டிக்கு முன்பாக வைத்து, வாசஸ்தலத்தின் வாசலிலே தொங்குதிரையைத் தூக்கிவைப்பாயாக. ⁶தகனபலிபீடத்தை ஆசரிப்புக் கூடாரமாகிய வாசஸ்தலத்தின் வாசலுக்கு முன்பாக வைத்து, ⁷ஆசரிப்புக் கூடாரத்திற்கும் பலிபீடத்திற்கும் நடுவே தொட்டியை வைத்து, அதிலே தண்ணீர் ஊற்றுவாயாக. ⁸சுற்றிலும் பிராகாரத்தை நிறுவி, பிராகாரத்தின் வாசலிலே தொங்குதிரையைத் தூக்கிவைப்பாயாக.

⁹"அபிஷேகத் தைலத்தை எடுத்து, வாசஸ்தலத்தையும் அதிலுள்ள யாவற்றையும் அபிஷேகம் செய்து, அதையும் அதன் எல்லாத் தட்டுமுட்டுகளையும் பரிசுத்தப்படுத்துவாயாக; அப்பொழுது அது பரிசுத்தமாயிருக்கும். ¹⁰தகனபலிபீடத்தையும் அதன் எல்லாப் பணிமுட்டுகளையும் அபிஷேகம் செய்து, பலிபீடத்தைப் பரிசுத்தப்படுத்துவாயாக; அப்பொழுது அந்தப் பலிபீடம் மகா பரிசுத்தமாயிருக்கும். ¹¹தொட்டியையும் அதன் பாதத்தையும் அபிஷேகம் செய்து, அதைப் பரிசுத்தப்படுத்துவாயாக.

¹²"பின்பு ஆரோனையும் அவன் குமாரரையும் ஆசரிப்புக் கூடாரத்தின் வாசலண்டையில் அழைத்துவந்து, அவர்களைத் தண்ணீரால் கழுவுவாயாக. ¹³ஆரோனுக்குப் பரிசுத்த வஸ்திரங்களை உடுத்தி, எனக்கு ஆசாரிய ஊழியம் செய்யும்படி அவனை அபிஷேகம் செய்து பரிசுத்தப்படுத்துவாயாக. ¹⁴அவன் குமாரரையும் அழைத்துவந்து, அவர்களுக்கு அங்கிகளை உடுத்துவாயாக. ¹⁵அவர்கள் எனக்கு ஆசாரிய ஊழியம் செய்யும்படி, அவர்கள் தகப்பனை அபிஷேகம் செய்ததுபோல அவர்களையும் அபிஷேகம் செய்வாயாக. அவர்களுடைய அபிஷேகம் தலைமுறைதோறும் நிலைத்திருக்கும் ஆசாரியத்துவத்தை அவர்களுக்குக் கொடுக்கும்."

¹⁶எங்கள் பிதா தனக்குக் கட்டளையிட்டபடியெல்லாம் மோசே செய்தான். ¹⁷இரண்டாம் வருஷத்தின் முதலாம் மாதம், மாதத்தின் முதலாம் நாளிலே, வாசஸ்தலம் நிறுவப்பட்டது. ¹⁸மோசே வாசஸ்தலத்தை நிறுவினான்: அதன் பாதங்களை வைத்து, அதன் பலகைகளை நிறுத்தி, அதன் தாழ்ப்பாள்களைப் பாய்ச்சி, அதன் தூண்களை நாட்டினான். ¹⁹எங்கள் பிதா மோசேக்குக் கட்டளையிட்டபடியே, வாசஸ்தலத்தின்மேல் கூடாரத்தை விரித்து, அதன்மேல் மூடியை போட்டான். ²⁰அவன் சாட்சியை எடுத்து, பெட்டிக்குள்ளே வைத்து, பெட்டியிலே தண்டுகளைப் பாய்ச்சி, பெட்டியின்மேல் கிருபாசனத்தை வைத்தான். ²¹எங்கள் பிதா மோசேக்குக் கட்டளையிட்டபடியே, அவன் பெட்டியை வாசஸ்தலத்திற்குள்ளே கொண்டுவந்து, மறைவின் திரையைத் தூக்கிவைத்து, சாட்சிப் பெட்டியை மறைத்தான். ²²அவன் ஆசரிப்புக் கூடாரத்தில், வாசஸ்தலத்தின் வடபுறமாக, திரைக்கு வெளியே மேஜையை வைத்து, ²³எங்கள் பிதா மோசேக்குக் கட்டளையிட்டபடியே, எங்கள் பிதாவுக்கு முன்பாக அதின்மேல் அப்பங்களை ஒழுங்காக அடுக்கிவைத்தான். ²⁴அவன் ஆசரிப்புக் கூடாரத்தில், மேஜைக்கு எதிராக, வாசஸ்தலத்தின் தென்புறமாகக் குத்துவிளக்கை வைத்து, ²⁵எங்கள் பிதா மோசேக்குக் கட்டளையிட்டபடியே, எங்கள் பிதாவுக்கு முன்பாக அகல்களை ஏற்றிவைத்தான். ²⁶அவன் ஆசரிப்புக் கூடாரத்தில் திரைக்கு முன்பாகப் பொன்னினாலான பீடத்தை வைத்து, ²⁷எங்கள் பிதா மோசேக்குக் கட்டளையிட்டபடியே, அதின்மேல் நறுமணத் தூபவர்க்கத்தைக் காட்டினான். ²⁸பின்பு அவன் வாசஸ்தலத்தின் வாசலிலே தொங்குதிரையைத் தூக்கிவைத்தான். ²⁹எங்கள் பிதா மோசேக்குக் கட்டளையிட்டபடியே, அவன் தகனபலிபீடத்தை ஆசரிப்புக் கூடாரமாகிய வாசஸ்தலத்தின் வாசலண்டையில் வைத்து, அதின்மேல் தகனபலியையும் போஜனபலியையும் செலுத்தினான். ³⁰அவன் ஆசரிப்புக் கூடாரத்திற்கும் பலிபீடத்திற்கும் நடுவே தொட்டியை வைத்து, கழுவுதலுக்காக அதிலே தண்ணீர் ஊற்றினான். ³¹அதிலே மோசேயும் ஆரோனும் அவன் குமாரரும் தங்கள் கைகளையும் கால்களையும் கழுவினார்கள். ³²எங்கள் பிதா மோசேக்குக் கட்டளையிட்டபடியே, அவர்கள் ஆசரிப்புக் கூடாரத்திற்குள் பிரவேசிக்கும்போதும் பலிபீடத்தை அணுகும்போதும் கழுவினார்கள். ³³அவன் வாசஸ்தலத்தையும் பலிபீடத்தையும் சுற்றிலும் பிராகாரத்தை நிறுவி, பிராகாரத்தின் வாசலிலே தொங்குதிரையைத் தூக்கிவைத்தான். இவ்விதமாக மோசே வேலையை முடித்தான்.

அவருடைய மகிமை கூடாரத்தை நிரப்புகிறது

³⁴அப்பொழுது மேகம் ஆசரிப்புக் கூடாரத்தை மூடிற்று, எங்கள் பிதாவின் மகிமை வாசஸ்தலத்தை நிரப்பிற்று. ³⁵மேகம் அதின்மேல் தங்கியிருந்தபடியாலும், எங்கள் பிதாவின் மகிமை வாசஸ்தலத்தை நிரப்பினபடியாலும், மோசே ஆசரிப்புக் கூடாரத்திற்குள் பிரவேசிக்க முடியவில்லை. ³⁶வாசஸ்தலத்தின்மேலிருந்து மேகம் எப்பொழுது எழும்பியதோ, அப்பொழுது இஸ்ரவேலர் தங்கள் பிரயாணத்தின் ஒவ்வொரு கட்டத்திலும் புறப்பட்டுப் போனார்கள்; ³⁷ஆனால் மேகம் எழும்பாதிருந்தால், அது எழும்பும் நாள்வரைக்கும் அவர்கள் புறப்படாதிருந்தார்கள். ³⁸ஏனெனில் இஸ்ரவேல் வம்சத்தார் அனைவரும் தங்கள் எல்லாப் பிரயாணங்களிலும் காணும்படி, எங்கள் பிதாவின் மேகம் பகலிலே வாசஸ்தலத்தை மூடியிருந்தது, இரவிலே அதிலே அக்கினி இருந்தது.